LLAQTAKUNAMANTAWAN RUNANKUNAMANTA

Camerún nacionta watukuspa

BAKA otaq pigmeos sutiwan reqsisqa runakunachusmi puntataqa Camerún nacionpi karqaku. Chaymantañam, 1500 watakunapi Portugal runakuna chayarurqa hinaspa achka watakuna qepatañataq islam religionniyoq Fulani runakuna norte lawninman yaykururqaku. Kunanqa sapa chunka runakunamantam tawa ninku cristiano kasqankuta, iskay musulman kasqankuta hinaspa tawa ninku África lawpi huk religionkunapa parten kasqankuta.

Jehova Diospa testigonkunaqa Bibliamanta qellqakunatam ruwarqaku Bassa rimaypi, chaytam Camerunpi runakunaqa rimanku

Camerún nacionpa chakra lawninpi yachaq runakunaqa reqsisqam kanku chaskikuykuq kasqankuwan. Watukuqnin runakunataqa rimaykunkum hinaspam wasinkupi chaskispa yakutawan mikuyta qonku. Paykunapaqqa manam allinchu chayna qosqankuta wischupakuyqa, qosqankuta chaskiyñataqmi allin qawasqa.

Chay lawpi runakunaqa rimaytam qallarinku saludakuspanku hinaspa familianku imayna kasqanmanta tapuspanku. ¡Tapunkutaqmi animalninku imayna kasqanmantapas! Camerún nacionniyoq Joseph runam nin: “Pipas watukuqqa manam ‘ripullani’ nispallachu wasinmantaqa sapallan kutikunku. Yaqa llapanpim wasiyoqqa watukuqninwan kuska rimastin rinku tanteasqan partekama. Chaymantañam despedikuspan wasinman kutikun. Pitapas mana chaynata chaskiptinkuqa, mana valorasqa kasqantachá piensanman”, nispa.

Sanaga sutiyoq mayupiqa kanmi taksa lanchakuna. Wayrawan lancha rinanpaqqa imapas chaypi kaqtam servichikunku

Amistadninkunawan mikuspankupas huk platollamantam kuska mikunku hinaspa wakinpiqa makillawan. Camerún nacionpi chay ruwasqankuqa qawachinmi huk sonqolla kasqankuta. Arí, chaytaqa ruwanku wakinkupa amistadnin imanasqapas puntata hina manaña kaptinmi, chaynapi kaqmanta huk sonqolla kanankupaq. Achka huñunakuspa kuska chaynata mikuyqa: “Hawkañam kunanqa kachkanchik” niy hinam.