Paraiso

¿Imataq Paraisoqa?

¿IMATAM RUNAKUNA NINKU?

Wakinkum piensanku Paraisoqa cuento hinalla kasqanta. Wakinkuñataqmi qawanku mosqoyninpi huk sumaq huertata hina chaynataq allin runakuna wiñaypaq kawsaspanku sumaq llamkayniyoq kanankuta.

¿IMATAM BIBLIA NIN?

Bibliapim Paraiso rimaytaqa servichikun Eden huertamanta rimaspan, chaypim runaqa kawsayta qallarirqa (Genesis 2:7-15). Bibliaqa willakuntaqmi chay huertapi punta kaq tayta-mamanchik mana onqoq hinaspa mana wañuq kawsakusqankumanta (Genesis 1:27, 28). Ichaqa Diosta mana kasukusqankuraykum, chay huertamanta qarqorachikurqaku. Chayna kaptinpas Bibliapi willakuykunam qawachin hamuq tiempopi Paraiso kaptin runakuna kusisqa kawsakunankumanta.

¿IMANASQAM KAYMANTA YACHANAYKI?

Kuyakuq Diosqa, ¿manachu qonman payman sonqo runakunamanqa Paraisopi kusisqa kawsakuyta? Hinaspapas, ¿manachu niwanchikman chaskiwananchikpaq imakunata ruwananchikmantapas? Bibliaqa niwanchikmi Diosmanta yachananchikpaq hinaspa kamachikuyninkunata kasukunapaq (Juan 17:3; 1 Juan 5:3).

“[Jehova Diosmi] Edenpi huertata rurarqa. Chaymanmi rurasqan runata churarqa.” (Genesis 2:8.)

¿Maypitaq Paraisoqa kachkan?

¿IMATAM RUNAKUNA NINKU?

Wakinkum ninku Paraisoqa hanaq pachapi kasqanta, wakinkuñataqmi ninku hamuq tiempopi kay Pachapi kananmanta.

¿IMATAM BIBLIA NIN?

Chayllaraq rikuriq Paraisoqa kay Pachapim karqa. Diosqa munarqam kay Pachapi runakuna wiñaypaq kawsananta, Bibliaqa ninmi kay Pachata Dios wiñaypaq unanchasqanta (Salmo 104:5). Chaymantapas ninmi: “[Jehova] Diospam hanaq pachaqa. Kay pachatañataqmi runakunaman qorqa”, nispa (Salmo 115:16).

Bibliaqa yachachinmi kay Pachapi Paraiso kananmanta. Chaypim Diosqa runakunaman wiñay kawsayta qonqa. Chaymantapas hawka kawsakuymi kanqa, manam kanqachu ima nanaypas nitaq ñakariypas. Runakunaqa sumaqtam kawsakunqaku tukuy imakunapa kasqanpi (Isaias 65:21-23).

“Diosqa runakunawanñam yachachkan. [...] Manañam kanqachu wañuypas, lutokuypas, waqaypas nitaq nanaypas.” (Apocalipsis 21:3, 4.)

¿Pikunataq yachanqaku Paraisopiqa?

¿IMATAM RUNAKUNA NINKU?

Paraisopiqa kawsanqaku allin runakunallam nispanku, chaynataqa ninku religionkunapa yachachisqankuman hinam. Ichaqa manam lliwchu allinta entiendenku allin runa kay ima ninan kasqanta. Wakinkum piensanku allin runa kayqa misaman riy hinaspa Diosta mañakuylla kasqanta.

¿IMATAM BIBLIA NIN?

Bibliaqa yachachinmi “allin ruraq” runakuna Paraisopi kawsanankumanta. Ichaqa, ¿pikunataq Diospa qawasqanman hina allin ruwaq runakunaqa? Manam religionpa costumbrekunata ruwachkaspa Diospa kamachisqanta mana kasukuqkunachu. Bibliaqa ninmi: “Diosqa munan manam animalkuna ofrecenatachu nitaq animalkunata wañuchispa kañapunatachu, nisqan kasukunatam payqa munan. Animal ofrendakunamantapas [...] aswan allinqa payta kasukuymi”, nispa (1 Samuel 15:22). “Allin ruraq” runaqa, Diospa kamachisqanta kasukuspa Paraisopi wiñaypaq kawsaqkunam.

¿IMATAM RUWAWAQ?

Diospa kamachikuyninkuna kasukuyqa manam religionkunapa huñunakuyninkuman riyllachu. Diosqa munanmi lliwpi kasukunanchikta. Imakuna gustasqanmanta yachanaykipaqqa Bibliatam allinta estudianayki. Chayta ruwaspaykiqa qawankim ‘kamachikuyninkuna mana llumpay sasa’ kasqanta (1 Juan 5:3). Diosqa munanmi kasukuqkuna Paraisoman yaykunankuta.

“Allin ruraq runakunam allpataqa dueñoyanqaku. Paykunaqa chaypimiki wiñaypaqraq kawsakunqaku.” (Salmo 37:29.)