Lliw runapaq discurso preparakuymanta

JEHOVA DIOSPA testigonkunapa yaqa lliw congregacionninkupim Bibliamanta horqosqa discursota lliw runakunapa qayllanpi sapa semana ruranku. Anciano otaq siervo ministerial kaspaykiqa, ¿allin yachachiq kasqaykitachu qawachinki discursota qospa? Chayna kaptinqa chay discurso qonaykipaqmi nisqa kawaq. Diosmanta Yachachinapaq Escuelam wara-waranqantin hermanokunata chayna discursota qonankupaq yanapan. ¿Imaynatataq preparakuwaq lliw runakunapa qayllanpi yachachinaykipaq nisqa kaspaykiqa?

Bosquejoykita estudiay

Manaraq preparakuchkaspa bosquejota entiendenaykikama allinta leey hinaspa imam nisqankunapi yuyaymanay. Discursopa titulonman hina imamanta yachachisqanpi reparay. ¿Imamantataq yachachiyta munanki? ¿Yachachisqaykiwanchu yanapayta munanki?

Sapa subtitulonpa nisqanpi reparay hinaspa chayman hina allinta estudiay. ¿Imapim tupan imamanta yachachisqanwan? Sapa subtitulopa qatiqninpim allinnin kaq yachachikuykuna kachkan, qatiqnillanpitaqmi chaywan tupaq wakin yachachikuykunapas kachkan. Reparay bosquejopi yachachikuykuna tupasqanman hina qatinasllanpi kasqanta chaynataq imamanta yachachisqanpipas. Chayna kasqanta hinaspa yachachikuynin imamanta kasqanta chaynataq uyarisuqnikikunata imayna yanapananta entienderuspaqa preparakuytaña qallariy.

Discursota qonaykipaq bosquejoqa yaqapaschá rakisqa kachkan tawapi otaq pichqa partepi, sapakamapitaqmi kachkan allinnin kaq yachachikuykuna, chaykunamanta allinta preparakuy.

Bosquejo chaskisqaykiqa preparakunaykipaq yanapasuqnillaykim, manam chaypi imayna qellqasqa kasqanman hina leenaykipaqchu. Bosquejoqa chayraq qespichisqa wasimanmi rikchakun; mosoq wasiqa punkunta, ventananta hinaspa tukuy iman churanatam necesitan.

Bibliata servichikuy

Jesucristopas chaynataq discipulonkunapas Diospa Palabranman hinam yachachirqaku (Luc. 4:16-21; 24:27; Hech. 17:2, 3). Qampas chaynatam yachachiwaq. Discursota qospaqa Diospa Palabrantam servichikunayki. Bosquejopi nisqankunata explicanaykimantaqa otaq imapi yanapasqanta qawachinaykimantaqa yachachisqaykiwan Bibliapa nisqan imayna tupasqantam qawachinayki.

Discursoykita preparaspaqa chaypi rikuriq textokunata leey hinaspa reparay hananpi otaq qatiqninpi nisqankunata. Wakin textokunaqa imamantapas willayllam-willan, chaymi uyarisuqnikikunata yanapananpaq kaqkunallata servichikunayki. Bosquejopi kaq textokunata servichikuspaykiqa manañam necesitankichu huk textokunataqa.

Discurso qosqayki allin kananpaqqa manam achka textokunata leesqallaykimantachu, aswanqa entiendekunanpaq hina yachachisqaykimantam. Leenaykipaq textokunata akllaspaqa tanteanaykim imanasqa leesqaykimanta. Reparaytaq imayna yanapasqanpipas. Textota leeruspayki explicanaykikama Bibliaykita mana wichqaptikiqa uyarisuqnikikunapas manapaschá Bibliankuta wichqanqakuchu. ¿Imaynatataq uyarisuqnikikunata yanapawaq Diospa Palabranmanta allinta entiendenankupaq? (Neh. 8:8, 12.) Yanapawaqmi explicaspa, rikchanachispa hinaspa imayna yanapasqanta qawachispapas.

Explicay. Mayqen textomantapas explicanaykipaq preparakuspaqa tapukuy: “¿Imamantataq yachachichkan? ¿Imaynatam yanapanman kay discurso qosqaypi? ¿Imatataq uyariqniykuna tapukunmanku kay textomanta?”, nispa. Leesqayki textopa hananpi otaq qatiqninpi kaqtapaschá leenayki kanqa, maypi hinaspa haykapi imapas pasasqanmanta otaq imanasqa qellqasqa kasqanmanta yachanaykipaq. Chaypaqmi sumaqta yachanayki ‘allin yuyayniyoq confianza sirvientepa’ qowasqanchik qellqakunapi, chaypim achka yachachikuykunata tarinki (Mat. 24:45-47). Versiculopa nisqanmantaqa ama llapantachu explicay. Aswanqa qawachiy yachachisqaykiwan imaynanpi tupasqanta chaynataq uyarisuqnikikuna imanasqa leenanpaq kallpanchasqantapas.

Rikchanachiykuna. Rikchanachiykunaqa uyarisuqnikikunatam allinta entiendenankupaq yanapan chaynataq imamanta otaq mayqen textomanta yachasqankuta mana qonqanankupaq hinaspa nisqaykikunata yachasqankuwan tupachinankupaqpas. Rikchanachiykunawanmi Jesuspas yachachirqa. ‘Alton pawaq urpikunamanta’, ‘purun waytakunamanta’, ‘kichki punkumanta’, ‘taqra rumipa hawanpi wasichakuymanta’ hinaspa huk rikchanachiykunawanpas allintam entiendechirqa, chayna yachachisqantaqa manam qonqarqakuchu (Mat. 5–7 caps.).

Imapi yanapasqanta qawachiy. Bibliapa textonkunamanta rikchanachispa explicayqa yanapanmi entiendenankupaq, ichaqa vidankupi imaynata yanapachikunankupaq nisqaykim astawan yanapanqa. Kasukuyninku paykunamantaña kaptinpas yanapawaqmi yachasqankuman hina kasukuyta. Leesqayki texto yachachisqaykiwan imayna tupasqanmanta allinta entiendeptinkuqa qawachiy iñisqankupi hinaspa vidankupi imayna yanapasqanta. Pantasqa yachachikuykuna qepanchayqa allinpaq kasqanta entiendechiy, qawachiytaq Bibliapa nisqan kasukuypas allinpaq kasqanta.

Uyarisuqnikikunata imapi kallpanchanaykipaq textokunata akllaspaykiqa reparanaykim llapanku mana igualla kasqankupi. Huñunakuypiqa kachkanku ichapas chayllaraq hamuqkuna, mozo-sipaskuna, yuyaqkuna otaq imawan sasachakuqkunapas. Paykunata yanapanaykipaq hina preparakuy. Amataq consejaychu pitapas sientechinaykipaq hinaqa.

Wakintaqa discurso qoqmi tanteanan

Bosquejoykipi wakin yachachikuykunaqa tanteasqañam kachkan. Allinnin kaq yachachikuykunaqa sutillam kachkan chaynataq hayka minutopi ruranaykipaqpas. Qatiqninpi yachachikuykunatam ichaqa kikiki tanteanayki. Tanteanaykipaschá kanqa mayqen yachachikuytapas hayka minutopi ruranaykipaq. Ichaqa manam llapan yachachikuywanchu chaynataqa ruranayki, manachayqa yachachinaykipaq achkallaña kaptinmi apurawllamanña rimawaq hinaptinmi uyarisuqnikikuna mana entiendenmankuchu. ¿Imaynatataq tanteawaq mayqen yachachikuytapas hayka minutopi ruranaykipaq? Tapukuy: “¿Mayqen yachachikuykunataq yanapawanman imamanta yachachisqayta entiendechinaypaq? ¿Mayqen kaqtaq huñunakuypi kaqkunata astawan yanapanman? ¿Yanqachanmanchu yachachisqayta Bibliapa textonkunata chaynataq chaywan tupaq yachachikuykunatapas mana servichikuptiyqa?”, nispa.

Ama piensasqaykiman hinallaqa yachachiychu. Diospa Churin Jesuspas ‘manam kikinpa’ piensasqanman hinachu yachachirqa (Juan 14:10). Huñunakuyninchikkunaman hamuq runakunaqa Bibliapa nisqanta uyariqmi hamunku, chaypim reparanayki. Allin yachachiq kasqaykimanta pipas nisuspaykiqa yaqapaschá nichkasunki Bibliapa nisqanman hina yachachiptiki, manam piensasqaykiman hinalla yachachiptikichu. Chaynata yachachiptikim discursoyki uyariyta munanqaku (Filip. 1:10, 11).

Bosquejoykita Bibliapa nisqanman hina sumaqta preparakuruspaqa yachachichkawaqpas hinaña ruray. Kallpawan leespa practicasqaykiqa yanapasunkim, chaywanpas aswan allinqa imakunamanta yachachinaykipaq kaqta entiendesqaykim. Ganaswanmi Diospa Palabranmanta tukuy sonqoykiwan kusisqa yachachinayki. Discursoykita manaraq qochkaspayki kay tapukuykunapi reparay: “¿Imapitaq yanapanman yachachisqay? ¿Sutillachu kanqa uyariwaqniykunapaq allinnin kaq yachachikuykuna? ¿Bibliapa nisqanman hinachu discursoyta preparakuruni? ¿Piwanpas rimachkaq hinachu allinnin kaq yachachikuymanta yachachisaq? ¿Tukuy ima qowasqanchikmanta Jehova Diosta hatunchananpaq hinachu kanqa? Tukunaypaqña rimasqayqa, ¿yaqachu tupan imamanta yachachisqaywan? ¿Kasukunankupaqchu uyariwaqniykunata kallpanchanqa?”, nispa. Kay tapukuykunaman hina discursoyki kaptinqa huñunakuypi kaqkunatam ‘yachachisqaykiwan’ yanapanki hinaspa Jehova Diostapas hatunchanki (Prov. 15:2).