Imaynatam cartata servichikuchwan

CARTA apachinakusqankum waranqantin runakunata vidankupi yanaparqa. Griego Rimaypi Diospa Palabranqa yaqa llapanmi qallariypiqa cartakunalla karqa. Kunanpas servichikunchikraqmi cartakunataqa chayllaraq iñiqkunata kallpanchananchikpaq, amistadninchikkuna imayna tarikusqankumanta yachanapaq. Chaynataq Diospa llaqtanpi tukuy tiemponkuwan serviq iñiqmasinchikkunata hinaspa sasachakuypi tarikuqkunatapas kallpanchanapaq. Hinaspapas willakuykunatam chaskinchik congregacionpi imapas allin rurakunanpaq (1 Tes. 1:1-7; 5:27; 2 Ped. 3:1, 2).

Chaymantapas cartakunataqa allintam servichikuchwan predicananchikpaq. Achka runakunam vigilasqa wasikunapi yachanku otaq tiyanku. Wakin runakunaqa manam wasinkupichu tarikunku, chaymi mana tarinchikchu wasin-wasin predicaspaqa. Wakinñataqmi karu sitiokunapi tarikunku.

Hukkunañataqmi wasillankupi kanku onqosqankurayku, llumpay wayra-para kasqanrayku otaq wasinkumanta mana lloqsinankupaq gobierno kamachisqanrayku. Chaynapi tarikuqkunaman otaq maypipas rimasqayki runakunaman, ¿atiwaqchu cartantakama hinalla predicayta? ¿Huklaw llaqtamanchu estudiantiki pasakun? Cartata apachisqaykiqa yanapanmanpaschá Diosmanta yachay munasqanta mana saqerunanpaq. Apachiwaqtaqmi Bibliamanta qellqakunata chayraq casarakuqkunaman, chayraq wawa-churiyoqkunaman otaq mayqen familianpas wañukuptin llakipi tarikuqkunaman.

Cartawan predicanapaq

Mana reqsisqayki runaman cartaspaykiqa pim kasqaykitaraqmi puntata willanayki. Willawaqmi Allpantinpi runakunaman yachachiypi debaldella yanapakusqaykimanta. Atikuptinqa willay Jehova Diospa testigon kasqaykita hinaspa niytaq wasinman rinaykimantaqa imanasqa cartalla apachisqaykimanta. Paywan rimachkawaqpas hina qellqay, ichaqa allinta tanteaspa willay pim kasqaykita (Mat. 10:16).

¿Imaynatataq predicawaq wasinman rispaqa? Kay tapukuypi reparaspa ima ninaykipaq kaqta qellqay, ichapas chaypaqqa servichikuwaq Razonamiento nisqa libropi kaq yanapakuykunata otaq Diospaq Llamkayninchik qellqapi imayna predicanapaq yanapakuykunatapas. Imamantapas tapuspaykim piensarichiwaq. Wakin iñiqmasinchikkunam cartasqankupi ninku Bibliamanta tapukuykunata mana imallapaq contestaypi yanapakusqankumanta hinaspam Bibliata estudiachinapaq mayqen qellqanchikmantapas titulonkunata qellqanku. Cartata imayna qellqanaykipaqmi 73 kaq paginapi huk ejemplo kachkan, ichaqa manam chay cartapi yachachikuyman hinallachu sapakuti qellqanayki, chaynata ruraptikiqa wasiyoqmi hina kaqllata sapakuti chaskinman.

Wakin runakunaqa manam leeyta munankuchu mana reqsisqanku runapa cartan unaypi leenapaq kasqanrayku, chaymi allin kanman pisillapi qellqayniki. Qellqasqaykiqa mana aburrikunanpaq hinam kanan. Allinmi kanman huñunakuyninchikman hamunanpaq huk invitacionta apachiyqa otaq mayqen tratadotapas, folletotapas, Willakuq otaq ¡Rikchariy! revistatapas. Niwaqtaqmi kay revistakunata sapa kutilla hinalla chaskinanmantapas. Chaymantapas wasiyoqtam tapuwaq: “¿Munawaqchu wasikiman hamuptiy kaykunamanta yachayta?”, nispa.

Qellqayta imayna qallarinaykipaq

Reparay 73 kaq paginapi carta imayna qellqasqa kasqanta: 1) Ordenninpi qellqasqam kachkan. 2) Carta chaskiqqa hinallam yachanqa qellqaqninpa sutintawan direccionninta sobren chinkaruptinpas. 3) Qallariq parrafonpim sutilla qawakun imapaq qellqasqa kasqanmanta. 4) Imamanta willay munasqanmi sapa parrafonpi kachkan. 5) Predicanapaq kasqanraykum cartaqa manam familiapaq nitaq autoridadpaq hinachu qellqasqa kachkan.

Pimanpas ancha respetowan qellqayqa Betel wasiman congregacionpi secretariopa carta apachisqan hinam kanan, chaypiqa qellqananmi may congregacionpi kasqanta, sutinta, direccionninta hinaspa haykapi qellqasqantapas. Qellqanaykitaqmi carta chaskiqpa sutintawan direccionninta hinaspañam ima niy munasqaykita respetowan qellqawaq. Wakin idiomakunapiqa carta qellqaytam tukunku “Qellqamusuqniki” nispa, chaypa uranpiñataqmi firmanku.

Cartata qellqaspaykiqa reparanaykim palabrakuna imayna qellqasqa kasqanpi, puntonkunapi hinaspa limpio kasqanpipas, chaykunam qawachinqa respetowan willay munasqaykita.

Qellqanaykitaqmi sutikita sobrepa hawanpi hinaspa direccionnikitapas. Mana reqsisqayki runaman direccionnikitawan sutikita mana willayta munaspaykiqa congregacionpi ancianokunatam tapuwaq Salonpa direccionninta qellqanaykipaq. Ichaqa manam haykapipas Betel wasipa direccionnintaqa churanaykichu, mana chayqa piensanmankum chay oficinamanta carta apachisqankuta, chaynatataqmi piensanmanku qellqanchikkunata cartapi apachispayki sutikitawan direccionnikita mana qellqaptikiqa.

Chaymantapas pagasqaña kasqanmantam sellota churachinayki cartapi mayqen qellqanchiktapas apachispaykiqa, mana chayqa chaskiqtam kaqmanta pagachinmanku; chayna kaptinqa predicanaykipaq carta apachisqaykitam manaña allinpaqchu hapinman. Folletotapas otaq revistatapas correontakama apachiyta munaspaqa reparanaykim wakin nacionkunapiqa achka qollqepaq kasqanta, chaymi pagasqataña apachinayki.

Qellqasqaykiqa imayna kasqaykitam qawachinan

Qellqayta tukuruspaqa kaqmanta leey imayna qellqasqa kasqanmanta cuentata qokunaykipaq. ¿Imaynataq qellqasqayki uyarikun? ¿Qawachinchu amistadnin hina kasqaykita chaynataq respetasqaykitapas? Kuyakuq hinaspa llakipayakuq kasqanchiktam runamasinchikmanqa qawachinanchik (Gal. 5:22, 23). Mana kuyakuywan otaq mana amistadpaq hina qellqasqayki rikchakuptinqa kaqmanta leespa sumaqyachiy.

Cartakunaqa mana chayasqayki sitiokunamanmi chayan, chaymi cartata servichikuyqa ancha allin Diosmanta willakunapaq. Rantikipi rimasqanraykum qellqasqaykitaqa allinta revisanayki, ordenninpi kasqanta chaynataq imayna sentimientowan nisqaykitapas. Carta apachisqaykiqa ichapas llampu sonqo runamasinchikta yanapanman wiñay kawsayta haypananpaq.