Imam kaqta leenapaq

‘DIOSQA munachkanmi llapallan runakuna cheqap yachachikuy reqsinankuta’ (1 Tim. 2:4). Diospa Palabranta hukkunaman willay munasqanchikmi kallpanchawananchik imam kaqta kallpawan allinta leenapaq.

Mozo-sipas otaq yuyayniyoq kaspapas ancha allinmi Bibliata chaynataq qellqanchikkunatapas allinta leeyqa. Jehova Diospa testigon kasqanchikraykum Diospa yachachikuyninta hinaspa kamachikuyninta hukkunaman yachachinanchik, chaymi allintapuni leenanchik hukpa otaq achka runakunapa qayllanpipas. Familianchikwanpas chaynatam leenanchik. Diosmanta Yachachinapaq Escuelam llapanchikta yanapawanchik hukkunapa qayllanpi kallpawan hinaspa allinta leenapaq.

Llapanchikmi kallpanchakunanchik Bibliata allinta leenapaq hukkunapa qayllanpi otaq huñunakuypipas. Chuya espiritunwan guiasqanraykum Diospa ‘Palabranqa kawsachkan hinaspapas atiyniyoqmi’. Chaymi runapa ‘piensasqankunatawan munapayasqankuta reqsichin’ (Heb. 4:12). Diospa Palabranmanta yachayqa allinpunim, manam chay yachachikuytaqa ima qellqapipas tarichwanchu. Runakunatam yanapan cheqap Diosta reqsinankupaq, paywan allin amistadta ruranankupaq chaynataq vidankupi ima sasachakuytapas atipanankupaq. Yachachintaqmi hamuq tiempopi wiñay kawsayta imayna chaskinankumantapas. Chayraykum anchata kallpanchakunanchik Bibliata allintapuni leenanchikpaq (Sal. 119:140; Jer. 26:2).

Imaynatam imam kaqta leechwan. Allinta leenapaqqa kaykunatam rurana: imayna qellqasqa kasqanman hinam lliw palabrakunata otaq letrakunata leena, manataqmi huk palabrakunawanqa cambianachu.

Palabrakunata allinta leenaykipaqqa allintam entiendenayki ñawpaqninpi otaq qatiqninpi kaq palabrakunata, chaypaqqa allintapunim preparakunayki. Leesqayki palabrapa qatiqninpi kaq palabrakunapi reparaspaqa imam kaqtam leeyta atinki.

Puntonkunapi hinaspa kallpawan leenapaq kaq palabrakunapi reparasqanchikmi yanapawanchik qellqasqa kaqkunata allinta entiendenapaq. Puntonkunam yanapawanchik leespanchik maykama leenanchikpaq, mayqen palabrapi samanapaq hinaspa imayna toqyasqanman hina leenapaqpas. Chaynata mana leesqaqa wakin idiomakunapim mana allintachu entiendekunman, leesqanchikmi uyarikunman tapukuy hina otaq huktaña entiendechinman. Chay puntokunaqa rimasqanchik idiomapi necesitakusqanman hinam kachkan. Kallpawan leenapaq kaq palabrakunata tupasqanman hina mana leesqaqa wakin idiomakunapim huktaña entiendechinman. Leesqayki entiendekunanpaqqa puntonkunatawan kallpawan leenapaq kaq palabrakunatam allinta reqsinayki. Leespaqa imam nisqaykita entiendekunanpaqmi leenayki, manam sapa palabrata allinta rimanallaykipaqchu.

Imam kaqta leenaykipaqqa sapa parrafota achka kutikama leey, chaymantaña qatiqnin kaqkunata. Chaymantapas achka paginakunata leey ichaqa ama kuti-kutirispachu nitaq panta-pantatachu. Chaykunata ruraruspaykiqa pitapas niy leesqaykita uyarisunaykipaq hinaspa pantasqaykimanta nisunaykipaq.

Wakinqa leeypim sasachakunku ñawinku mana allinta qawakuptin otaq achki mana allinta kanchaptin. Chaykunawan mana sasachakunanpaq tanteaqqa allinta leeypim astawan ñawparinqa.

Allin leeq hermanokunaqa yaqapaschá leenmanku tiempopa risqanman hina Biblia Estudianapaq Huñunakuypi otaq Willakuq Revistamanta Estudiopi. Chaykunapi allinta leeq kanapaqqa manam palabrakunata allinta leeyllachu. Congregacionpi allin leeq kayta munaspaykiqa kallpanchakunaykim sapaykipi allinta leenaykipaq. Chaypaqqa entiendenaykim leesqaykiwan sapa palabra imayna tupasqanta. Mayqen palabratapas allinta mana leespaykiqa manam entiendenkichu imamanta leesqaykita. Wakin kutipiqa panta-pantatam leewaq mana tupasqanpi kallpawan leespa chaynataq ñawpaqninpi otaq qatiqninpi kaq palabrakunapi mana reparaspaykiqa. Kallpanchakuy rimasqayki idiomapi sapa palabra ima nisqanmanta entiendenaykipaq. Chaymantapas imamanta leesqayki entiendekunanpaqmi qawarinayki puntonkuna maypi kasqanta. Hinaspapas palabrakunata tupachispam ima niy munasqanchikta entiendechinchik. Kallpawan leespaykiqa ama sapa palabratachu leey, aswanqa imamanta yachachisqanman hina llapanta otaq wakillantapas qatinasllanpi leey. Imam kaqta huñunakuypi leenapaqqa allintam entiendena leesqanchikta.

Timoteo experienciayoq anciano kachkaptinpas apostol Pabloqa nirqam: ‘Diospa palabranta leey huñunakuykunapi’, nispa (1 Tim. 4:13). Chaymi ñoqanchikpas hinalla kallpanchakunanchik allin leeq kanapaq.