Allinta toqyachinapaq

MANAM lliw cristianokunachu ancha educacionniyoqqa kanku. Apostol Pedrowan Juanpas ‘manam ancha educacionniyoqchu karqaku’ (Hech. 4:13). Chayna kaspapas kallpanchakunanchikmi Diospa Palabranta willakuspa allinta rimanapaq.

Imakunapim reparana. Imam kaqta rimanapaqqa sapa idiomapi imayna rimasqankuman hinam rimana. Wakin idiomakunapim qellqanku abecedarionkuman hina. Castellanopi abecedariomantapas kanmi arabe, cirilico, griego hinaspa hebreo rimaykunapi abecedarionku. Chino rimaypim ichaqa mana kanchu abecedarionku, letrakunapa rantinpim dibujokunata servichikunku ima niy munasqankuta entiendechikunankupaq. Chaynallataqmi japones hinaspa coreano rimaypipas chayna dibujokunata servichikunku, chino rimaypim ichaqa ima niy munasqankuqa mana chay idioma kunapi hinachu entiendekum.

Abecedarioyoq kaq idiomakunapi allinta leenapaqqa yachanam sapa letra otaq sapa palabra imayna toqyasqanta. Castellano rimaypi abecedarionman hina qellqakuna leeyqa manam llumpay sasachu, chaynallataqmi griego, zulu hinaspa wakin rimaykunapipas. Huk idiomakunamanta palabrakunata servichikuspaqa yaqa chay idiomapi rimasqankuman hinam rimana. Chaymi wakin letrakunapa otaq palabrakunapa imayna toqyasqanqa mana iguallachu, wakinpiqa manañam rimankupaschu. Chay palabrakunata servichikuna kaptinqa allinmi kanman imayna toqyasqanta yuyariyqa hinaspa chayman hina rimaypas. Chino rimaypi allinta leenapaqqa waranqantin caracteres nisqa dibujokunatam umallanchikmanta yachananchik allinta toqyachinapaq. Wakin idiomakunapi ima palabratapas imayna toqyachisqankuman hina mana rimaptinchikqa ima niy munasqanchiktam mana entiendenmankuchu.

Qellqasqa palabrakuna silabakunapi rakikuptinqa allinmi kanman tupasqanman hina toqyachiyqa. Chay idiomakunapi wankin palabrakunaqa sutillam maylawninpi kallpawan leenapaq kachkan, wakin kutipiqa tildeyoqmi kachkan. Chaywanmi mana sasachakuspalla leenku. Wakinmi ichaqa mana chaynachu, chaymi imayna toqyasqanman hina achka palabrakunata umanchikpi takyachina.

Ima palabratapas allinta toqyachinaykipaqqa ama rimaychu yachaqtukuspaykiqa otaq manaña rimasqanku palabrakunawanqa, mana chayqa hukpas rimachkanman hinam uyarikunman. Chaynata rimaspaykiqa hatunchakusqaykitam qawachichkawaq. Amataq panta-pantataqa rimaychu. Chaykunamantam yachamurqanchikña “Clarota rimanapaq” niq 2 kaq yachachikuypi.

Huk llaqtakunapi otaq huklaw nacionkunapiqa hina kaq palabrallatam hukniraqtaña toqyachinku. Chaymi wakin palabrakunataqa diccionariopi churanku chay llaqtakunapi imayna toqyachisqankuman hina. Chaymantapas achka nacionkuna huk idiomallata rimaptinkupas sapakamam rimayninkuta hukniraqta toqyachinku. Astawanraqmi mana educacionniyoq kaspankuqa otaq chayraq yachasqanku idiomapi rimaspankuqa, chayraykum chay idiomapi allin rimaqkunata atencionwan uyarinanchik paykuna hina rimananchikpaq. Jehova Diospa testigon kasqanchikraykum chaynataq paymanta willakusqanchik sumaq kananraykum allin rimayta munanchik yachasqanchik otaq tiyasqanchik lawpi kaqkunapas entiendenankupaq.

Piwanpas rimaspaqa sapa punchaw rimasqanchikman hinam rimana, chaynata ruraspaqa rimasqanchiktam allinta qespichisun. Chayna kaptinpas imamantapas kallpawan leespaqa ichapas tarisun mana rimasqanchik palabrakunata. Jehova Diospa testigonkunaqa predicasqanchikpim Bibliata kallpawan leenchik, wakin hermanokunañataqmi Biblia Estudianapaq Huñunakuypi otaq Willakuq Revistamanta Estudiopi kallpawan leenku. Chaymi imam kaqta leenapaq kallpanchakuna, mana chayqa Diosmanta willasqanchiktam mana allintachu uyarinqaku.

Rimasqaykita allinta toqyachinaykipaq. Achkam mana reparankuchu rimasqanku imayna toqyasqanpi. Escuelata dirigeq anciano imayna leenaykipaq nisuptikiqa agradecekuy. Rimasqaykipi imawan sasachakusqaykita reparaspaqa ¿imakunatataq rurawaq chayta atipanaykipaq?

1) Huñunakuypi leenaykipaq preparakuspaykiqa palabrakuna imayna qellqasqa kasqanpi reparay. Mayqen palabrata tupasqanman hina kallpawan rimanaykipaq otaq leenaykipaq kasqanmanta iskayrayaspaqa allin leeqta tapukuy. Sasachasuqniki palabrakunataqa achka kutita kallpawan leey. Wakin idiomapiqa allinmi kanman mana yachasqanchik palabrakunata diccionariopi maskayqa, chaypim qallariq paginankunapi yachachin letrakunata imaynata toqyachispa rimanapaq.

2) Allin leeqpa qayllanpi leey hinaspa niy imapi pantasqaykimanta nisunaykipaq.

3) Imam kaqta leenaykipaqqa allin leeqta atencionwan uyariy. Uyariwaqtaqmi grabasqa kaptinqa Traducción del Nuevo Mundo nisqa Bibliamanta, Willakuq hinaspa ¡Rikchariy! revistakunamanta otaq internetmantapas horqospa. Tiempopa risqanman hinam manaña pantaspa leenki hinaspam allintaña rimanki.