Makiwan uyawan yanapachikunapaq

WAKIN llaqtakunapiqa makinkuwan otaq uyankuwanmi ima niy munasqankuta astawan entiendechinku, wakinpiñataqmi mana chaynatachu. Ichaqa yaqa lliw runakunam piwanpas rimaspankuqa otaq discursota qospankuqa uyankuwan otaq makinkuwan yanapachikuspa entiendechinku.

Jesuspas qatiqninkunapas makinkuwan yanapachikuspam rimaqku otaq ima niy munasqankutam uyankupi qawachiqku. Huk kutipim Jesusta nirqaku mamaykiwan wawqekikunam qanwan parlayta munachkanku nispa, hinaptinmi Jesusñataq nirqa: “¿Pitaq mamayqa, pitaq wawqeykunaqa?”, nispa. Chaymantam “discipulonkunaman makinta haywarispa nirqa: Paykunam mamaywan wawqe-paniykunaqa”, nispa (Mat. 12:48, 49). Hechos 12:17 hinaspa 13:16 nisqanpas willawanchikmi apostol Pedropas chaynataq Pablopas makinkuwan yanapachikuspa rimasqankumanta.

Imamanta yachachisqanchikta hinaspa tukuy sonqomanta rimasqanchiktam entiendechichwan makinchikwan otaq uyanchikwan yanapachikuspa. Yachachisqanchikman hina tupaqnin palabrakunapi chaynata rimaspaqa allintam entiendechisun. Telefonowan rimaspapas musyachikuchwanmi imayna rimasqanchiktaqa. Chaymi leespapas otaq yachachispapas uyariwaqninchikkuna qawawananchik otaq mana qawawananchik kaptinpas makinchikwan otaq uyanchikwan yanapachikuspa rimasqanchikqa allintapuni yanapawasun.

Makinchikwan otaq uyanchikwan yanapachikuspa ima niy munasqanchikta qawachinapaqqa manam librokunamantaraqchu yachananchik. Asinaykipaq otaq piñakunaykipaqqa manam pipas yachachisurqankichu. Chaynallataqmi uyanchikwan otaq makinchikwan ima niy munasqanchikta entiendechinapaqqa sonqomanta kanan. Rimasqanchikpi tupasqanman hina chaynata rurayninchikqa allinmi kanqa.

Makinchikwanpas cuerponchikwanpas yanapachikuspam ima niy munasqanchikta qawachichwan. Makiwan yanapachikuspam willachwan imapas imayna pasasqanta, imapas mayna sayayniyoq kasqanta hinaspa maypi pasasqanmantapas. Rimasqaykipiqa manam huk-iskay kutillatachu makikiwanqa yanapachikunayki. Kallpanchakuy discurso qosqaykipi tupasqanman hina ima niy munasqaykita makikiwan entiendechinaykipaq. Sasachakuspaqa makikiwan yanapachikuspa qawachiy imapas may lawpi kasqanta, karupi otaq hichpapi kasqanta, hatun otaq taksa kasqantapas. Hukkuna imayna qawasusqaykipi piensanaykimantaqa yachachinaykipaq kaqpi reparaspam kay yachachikuyman hina allinta rimanki. Hawkalla tarikuspaykiqa manam sasachakunkichu makikiwan ima niy munasqayki entiendechiytaqa.

Cuerponchikwanpas qawachichwanmi mana iskayrayaspa otaq sentimientowan rimasqanchikta. Chaynata rimaspanchikmi yachachisqanchikta allinta entiendechisun, ichaqa tupaqnin palabrakunallapim chaynataqa ruranayki. Hina kaqllata sapa kuti chaynata ruraptikiqa uyarisuqnikikunam mana entiendenqakuchu. Escuelata dirigeq anciano chayna rurasqaykiwan sasachakusqaykimanta nisuptikiqa kallpanchakuy makillaykiwanraq yanapachikuspa rimanaykipaq, chaymantaña cuerpoykiwan yanapachikuspa rimanaykipaq kallpanchakuy.

Yachachisqaykita makikiwan otaq uyaykiwan entiendechinaykipaq kaptinqa uyarisuqnikikunapi reparay. Paykunata tuqpispa rimaptikiqa uyarisuqnikikunam hukman sientekunmanku. Wakin llaqtakunapiqa warmi tukuqpaqmi qarikunata hapinku makinkuwan siminkuta tapakuspa admirakuptinkuqa. Wakin llaqtakunapiñataqmi makinwan yanapachikuspa rimaq warmikunataqa hatun tukusqankupaq hapinku, chaymi cristiana warmikunaqa rimasqankuta entiendechinankupaq uyankuwan yanapachikunku. Hukkunapa qayllanpi makinchikwan yanapachikuspa sapa kutilla rimaptinchikqa asikunapaq hinam kanman.

Discursokunata qosqaykiman hinam makikiwan otaq uyaykiwan yanapachikuspa mana sasachakuspalla tukuy sonqoykimanta rimanki, chaynata ruraspam allinta entiendechinki.

Uyanchikpim qawachichwan. Uyanchikpim sutilla qawakun imayna tarikusqanchikqa. Chaytataqmi qawachin ñawinchikpas kumuykusqanchikpas. Mana rimaspallam qawachichwan hukmanyasqa kasqanchikta, cheqnipakusqanchikta, iskayrayasqanchikta, admirakusqanchikta otaq kusikusqanchiktapas. Chaykuna uyanchikpi sutilla kaptinqa uyariwaqninchikkunam astawan entiendenqaku. Unanchaqninchikmi uyanchikpi 30 masnin ankuchayoqta unanchawarqanchik. Asiriptinchikmi yaqa 15 ankuchanchikkuna kuyukachan.

Discursota qospapas otaq predicaspapas allinta rimanapaq kallpanchakusqanchikmi uyariwaqninchikkunapa sonqonta kusirichin. Chayna kasqantam asirisqanchikpas qawachin, hukmanrayasqanchikñataqmi iskayrayaspa rimasqanchikta qawachinman.

Chaymantapas kusisqa rimasqanchikmi amistad hina kasqanchikta qawachin, chaynata rimayqa ancha allinmi wasiyoqkuna mana recelaspa hawkalla uyariwananchikpaq.