Uyariwaqninchikkunata kallpanchanapaq

IÑIQMASINCHIKKUNAQA imawan sasachakuspankupas huñunakuyninchikkunapi kallpanchasqa kanankupaqmi hamunku. Chaymi ancianokunaqa yachachispapas otaq consejaspapas kallpanchanankupaq hina rimananku, qawachinankum ‘wayramanta harkachikuna hina kasqankuta. Chaki allpapi mayukuna hina kasqankuta. Mana yakuyoq allpapi qaqapa llantuynin hina kasqankuta’ (Is. 32:2).

¿Discursoykiqa kallpanchanchu hinaspa consuelanchu uyarisuqnikikunata? ¿Kallpanchanchu tukuy sonqonkuwan Jehova Diosta hinalla servinankupaq? ¿Kallpanchanchu mana uyariyta munaptinkupas hinalla predicanankupaq? ¿Kachkanchu uyarisuqnikikunapi hukmanyasqakuna, qollqemanta sasachakuqkuna otaq mana hampiy atina onqoywan onqoqkuna? Chayna tarikuqkunatam sumaq rimasqaykikunawan ‘kallpanchawaq’ (Job 16:5).

Iñiqmasikikunaman yachachispaqa Jehova Diospa tukuy ima qowasqanchikpi piensarichispa kallpanchay (Rom. 15:13; Efes. 6:10).

Jehova Diospa rurasqankunamanta yuyarichiy. Uyarisuqnikikunata kallpanchay, Jehova Diosta serviqkuna ñawpa tiempopi sasachakuptinku pay imayna yanapasqanmanta willaspa (Rom. 15:4).

Jehova Diosmi Moisesta kamachirqa Prometesqan Allpaman manaraq yaykuchkaptinku Josueyta ‘kallpanchaspan valorchananpaq’. ¿Imaynatam Moisesqa Josueyta kallpancharqa? Josueypa qayllanpim llapallan israelitakunaman yuyarichirqa imakunata ruraspan Jehova Diosqa Egiptomanta librasqanta (Deut. 3:28; 7:18). Yuyarichirqataqmi Jehova Diospa yanapayninwan amorreokunata vencesqankumantapas. Hinaspam Josueyta nirqa: ‘Kallpanchakuspayá qarinchakuy’, nispa (Deut. 31:1-8). Iñiqmasikikunata kallpanchaspaqa, ¿yaqachu yuyarichinki Jehova Diospa rurasqankunamanta?

Wakinqa imawanpas sasachakusqankuraykum llumpay hukmanyasqa tarikunku, chaymi iskayrayanku Diospa Gobiernonpi bendicionkuna chaskinankumanta. Chayna tarikuptinkuqa qawachiy Diospa prometesqankuna confianapaq kasqanta (Jos. 23:14).

Predicayninchik harkakusqanku nacionkunapiqa ancianokunam iñiqmasinkunata kallpanchanmanku apostolkunapa experiencianmanta willaspa (Hech. 4:1–5:42). Kallpanchanmankutaqmi Esterpa tiemponpi serviqninkunata Dios imayna librasqanmanta willaspapas.

Wakinqa unayñam huñunakuykunaman rinku ichaqa manam Diosta servinankupaqqa ñawparinkuchu. Ichapas Diosta manaraq reqsichkaspa mana allin kawsasqankumanta hukmanyasqa tarikunku. Chayna tarikuptinkuqa willawaqmi Manasesta Jehova Dios kuyapayasqanmanta otaq Corinto llaqtapi kaqkuna huchankumanta wanakuptinku mana huchayoqpaqña Dios qawasqanmantapas (2 Cron. 33:1-16; 1 Cor. 6:9-11).

Ichapas wakinqa sasachakuykunapi kasqankuwan piensanmanku Diosqa manaña favorecesqanmanta. Chayna tarikuptinkuqa imakuna Jobta pasasqanmanta yuyarichiy chaynataq Jehova Diosman sonqo kasqanrayku ima bendicionkuna chaskisqanmantapas (Job 1:1-22; 10:1; 42:12, 13; Sal. 34:19). Amistadnin tukuqkunam Jobta nirqaku huchallikusqanrayku sasachakuypi kasqanmanta (Job 4:7, 8; 8:5, 6). Apostol Pablowan Bernabeymi ichaqa iñiqmasinkuta kallpancharqaku ‘iñiyninkupi qaqa hina sayanankupaq’, chaymi nirqaku: ‘Diospa Munaychakusqanman yaykunapaqqa achka sasachakuytam’ aguantananchik, nispa (Hech. 14:21, 22). Kay tiempopipas kallpanchawaqmi sasachakuyninkuta hinalla aguantasqankuqa Jehova Diospa agradonpaq kasqanta qawachispa (Prov. 27:11; Mat. 24:13; Rom. 5:3, 4; 2 Tim. 3:12).

Uyarisuqnikikunata piensarichiy Jehova Diospa promesankuna paykunapi imayna cumplikusqanmanta reparanankupaq. Piensarinankupaqmi yanapawaq Salmo 32:8 nisqanta leespa, chaypim nin: “Ñoqam entiendechisqayki qamtaqariki. Ñoqam yachachillasqayki kawsakuytaqa. Ñoqam qawariykullaspay consejasqayki”, nispa. Jehova Dios Palabranwan imayna yanapasqanta yuyarichiptikiqa convencesqam kanqaku paykunapi Dios reparasqanmanta chaynataq ima sasachakuyninkupipas yanapananmanta (Is. 41:10, 13; 1 Ped. 5:7).

Diosmi yachachikuyninkunawan yanapawachkanchik. Iñiqmasikikunata kallpanchay serviqninkunarayku Jehova Dios kay tiempopipas imakuna rurasqanta qawachispa. Chayta qawachiy kusisqa rimasqaykiwan, chaynata yachachispaqa uyarisuqnikikunatam kallpanchanki.

Reparay sasachakuyninchikkunata atipanapaq Jehova Dios imaynata sapa punchaw yanapawasqanchikpi. Paymi yachachiwanchik allinta kawsanapaq (Is. 30:21). Willawanchikmi imanasqa wañuchinakuy, mana allin ruraykuna, wakchayay, onqoykuna hinaspa wañuypas kasqanmanta chaynataq chaykuna imayna tukunanmantapas. Maymantaña kaptinchikpas iñiqmasinchikkunawan huk sonqolla kawsanapaqmi yanapawanchik, mañakusqanchiktapas uyarinmi. Testigonkuna kananchikpaqmi favorecewanchik. Willawanchiktaqmi rey kananpaq Jesucristo nombrasqa kasqanmanta chaynataq tukupay tiempopi kawsasqanchikmantapas (Apoc. 12:1-12).

Qawachiytaq Salonpi huñunakuyninchikkuna chaynataq asambleanchikkunapas Diospa bendicionnin kasqanta. Chaykunamanta tukuy sonqoykiwan agradecekusqaykita qawachispaqa uyarisuqnikikunatam kallpanchanki iñiqmasinchikkunawan sapa kutilla huñunakunankupaq (Heb. 10:23-25).

Predicasqanchikta Jehova Dios imayna bendecisqanmanta willaspapas kallpanchawaqmi. Pablowan Bernabeymi Jerusalenman risqankupi willakurqaku mana judio kaqkuna Diosman iñikusqankumanta, chaywanmi ‘iñiqmasinkuta llumpayta kusichirqaku’ (Hech. 15:3). Qampas iñiqmasikikunatam kusirichiwaq chayna experienciakunamanta willaspaqa.

Uyarisuqnikikunataqa astawanmi kallpanchawaq rurasqanku allinpuni kasqanta qawachispa. Predicaq lloqsisqankumanta alabaykuy, yuyaqña kasqankuwan otaq onqosqankurayku atisqankuman hina Dios serviyninkupi aguantasqankumanta kallpanchaykuy. Kuyakuywan servisqankuta Jehova Dios mana qonqasqanmanta yuyarichiy (Heb. 6:10). Iñiqmasinchikkunaqa kallpanchasqam tarikunqaku iñiyninkupi pruebakunata aguantasqanku allinpaq kasqanmanta entiendespankuqa (1 Ped. 1:6, 7).

Hamuq tiempomanta tukuy sonqoykiwan rimay. Dios serviqkunataqa hamuq tiempopaq prometesqankunam anchata kallpanchan. Ichapas uyarisuqnikunaqa chaykunamanta sapa kuti uyarinku. Diospa prometesqankunamanta kusisqa rimaspaykiqa uyarisuqnikikunatapas kallpanchankim tukuy sonqonkuwan Diospi confiaspa agradecekunankupaq. Diosmanta Yachachinapaq Escuelapi yachachikuykunaman hina yachachispaqa uyarisuqnikikunatam allinta kallpanchanki.

Jehova Diosmi serviqninkunataqa kallpanchan, chayna kaptinpas yanapakuwaqmi iñiqmasikikuna kallpanchaypi. Anchata kallpanchakuy sapa yachachisqaykipi iñiqmasikikunata kallpanchanaykipaq.