¿Imanasqam llumpayta ñakarinchik?

1, 2. ¿Imatam runakunaqa tapukunku?

SAPA punchawmi uyarinchik imapas llakikuypaq willakuykunata. Allpa pacha kuyuspanmi achka runakunata wañuchin, suwa runakunapas mana manchakuspankum runakunata wañuchinku, wakinpim taytakunapas churinkuta abusanku.

² Kayna llakikuna kaptinmi achka runakuna tapukunku: “¿Imanasqataq runakunaqa chiqnikuqllaña kanku hinaspa imanasqam ñakarinchik?”, nispanku. ¿Tapukurqankichu chaynata?

3, 4. (1) ¿Imatam Habacucqa Jehova Diosta tapurqa? (2) ¿Imatam Jehova Diosqa nirqa?

³ Bibliam willakun Diospa wakin yupaychaqninkuna chaynata tapukusqankumanta. Diosmanta willakuq Habacucmi Jehova Diosta kaynata tapurqa: “¿Imanasqataq huchallikuytawan ñakariyllata qawachiwanki? Wañuchinakuywan tuñichinakuyllam munaychakuchkan, piñanakuywan wañuchinakuyllañam tukuy hinastinpi kachkan”, nispa (Habacuc 1:3, Chuya Qellqa 2012).

⁴ Jehova Diosmi nirqa Habacucpa qawasqan sasachakuykunata allichananmanta (Habacuc 2:2, 3). Diosqa anchatam runakunata kuyan. Bibliam Diosmanta kaynata nin: “Qamkunamantam nanachikun”, nispa (1 Pedro 5:7). Diosqa ñuqanchikmantapas astawanmi llakikun ñakarisqanchikta qawaspan (Isaias 55:8, 9). Hinaptinqa, ¿imanasqataq runakunaqa anchata ñakarinchik? Qawasunyá.

¿IMANASQAM LLUMPAYTA ÑAKARINCHIK?

5. (1) ¿Imatam pastorkunawan sacerdotekuna ninku ñakariymanta? (2) Ichaqa ¿imatam biblia nin?

⁵ Pastorkuna hinaspa sacerdotekunam ninku Dios munaptin ñakarisqanchikta. Ninkutaqmi Dios munaptin imapas desgraciakuna pasakusqanmanta. Chayrayku ichapas ninmanku manam yachanchikchu imanasqa ñakarisqanchikmanta. Ninkuraqmi hanaq pachapi Dioswan kuska kananchikpaq wañusqanchikmanta. Chaytam ninku warmachakuna wañuptinkupas. Ichaqa tukuy chaykuna nisqankuqa manam chaynachu. Jehova Diosqa manam mana allintaqa ruwanchu. Bibliam nin: ‘Mana allin ruwayqa Diosmanta karunchasqayá kachun. Hucha ruwayqa tukuy atiyniyuq Diosmanta karunchasqayá kachun’, nispa (Job 34:10).

6. ¿Imanasqam runakunaqa Diosman tumpanku imapas ñakariykunamanta?

⁶ Kay pachata Dios kamachisqanta piensaspankum, runakunaqa Diosman tumpanku imapas ñakariykuna kasqanmanta. Ichaqa kimsa kaq yachachikuypim yachamurqanchik kay pachataqa satanas munaychakusqanmanta.

7, 8. ¿Imanasqam kay pachapiqa ñakariyllaña kachkan?

⁷ Bibliam nin: “Diosta mana yupaychaq runakunam ichaqa llapallanku satanaspa munaychakusqan kachkanku”, nispa (1 Juan 5:19). Kay allpa pachataqa satanasmi munaychakuchkan, payqa mana allinkuna ruwaqmi. Chaymi “kay pachapi llapallan runakunata pantachichkan” (Apocalipsis 12:9). Runakunapas satanastam qatipakunku. Chayraykum kay allpa pachapiqa kan llullakuyllaña, chiqninakuyllaña hinaspa mana allin ruwaykunallaña.

⁸ Chaymantapas, ¿imanasqam kay pachapiqa ñakariykuna kan? Diospa contranpi hatariruspankum, Adanwan Evaqa huchallikuqña karqaku. Chaymi churi-wawankunaqa pantaq runakuna kanku hinaspa hukkunatapas ñakarichinku. Wakinpiqa runamasinkumanta aswan allinpaqmi hapikunku. Chaymi runakunata maqapanku hinaspa guerrakunamanpas rinku (Eclesiastes 4:1; 8:9). Chaymantapas qunqayllamanta imapas pasawaptinchikmi ñakarinchik (Eclesiastes 9:12). Kaywanqa nichkanmi, maypipas utaq mana allin tiempopi kasqanchikrayku imapas llaki qatiruwaptinchik ñakarisqanchikmantam.

9. Mana allinkuna kananta Dios saqiptinpas, ¿imamantam mana iskayrayanchikchu?

⁹ Jehova Diosqa manam ñakarichiwanchikchu. Manam paychu guerrakunata hinaspa imapas mana allinkunataqa rikurichin. Manataqmi paychu kay allpa pachataqa kuyuchin, llumpayta parachimun hinaspa huk sasachakuykunatapas rikurichin. Chaynaqa, ichapas kaynata tapukunki: “Jehova Dios tukuy atiyniyuq kaspanqa, ¿imanasqataq tukuy chay mana allinkunataqa mana harkayta atinchu?”, nispa. Yachanchikmi Diosqa anchata kuyawasqanchikta, chayraykum mana iskayrayanchikchu imanasqa mana allinkuna kananta saqisqanmanta (1 Juan 4:8).

¿IMANASQAM DIOSQA MANA TUKUCHINCHU ÑAKARIYKUNATA?

10. ¿Ima llullakunatam satanasqa Jehova Diosmanta nirqa?

¹⁰ Eden huertapim diabloqa Adantawan Evata pantarachirqa Diosta mana kasukunankupaq. Satanasqa nirqam Diosqa mana allin kamachiq kasqanta. Nirqataqmi allin kaqkunata paykunaman Dios mana quy munasqanmanta. Chaymantapas satanasqa Adantawan Evatam qawachiyta munarqa Diosmantapas aswan allin kamachiq kasqanta hinaspa kikillankumanta imatapas ruway atisqankuta (Genesis 3:2-5; qaway 27 kaq willakuyta).

11. ¿Ima tapukuykunamantam yachananchik?

¹¹ Adanwan Evaqa mana kasukuspankum Diosta qipancharurqaku. Kikinkumantam tantearqaku imam allin utaq mana allin kasqanta. Chaynaqa, ¿imaynatam Jehova Diosqa qawachinman karqa Adanwan Eva pantaypi kasqankuta? Hinaspa ¿imam allinninchikpaq kasqanta paylla yachasqantapas?

12, 13. (1) ¿Imanasqam Jehova Diosqa mana chaypunillachu Adantawan Evataqa chinkarachirqa? (2) ¿Imanasqam Jehova Diosqa kay allpa pachata satanas kamachinanpaq saqirqa hinaspa runakunapas kikinku kamachinakunankuta?

¹² Jehova Diosqa kay allpa pacha sumaq huerta kanantam munarqa hinaspa Adanpawan Evapa mirayninwan huntanankuta. Ichaqa satanas harkakuptinpas Jehova Diosqa tanteasqanman hinam ruwanqa (Genesis 1:28; Isaias 55:10, 11). Chayraykum Adantawan Evataqa mana chaylla chinkarachirqachu, aswanqa saqirqam churi-wawayuq kanankuta. Chaynapim Adanpa mirayninkunaqa akllakunanku karqa pi kamachiqninku kananpaq.

¹³ Satanasqa wara-waranqantin angelkunapa qayllanpim Jehova Diosmanta mana allinta rimarqa (Job 38:7; Daniel 7:10). Chaymi Jehova Diosqa satanaspa rimasqan llulla kasqanta qawachinanpaq tiempo pasananta saqirqa. Chaymantapas satanaspa munaychakusqan pachapi runakuna kikinku kamachinakunankupaqmi tiempo pasananta saqirqa. Chaynapim runakunaqa Diospa mana yanapakuyninwan imayna kamachinakusqankuta qawachinanku karqa.

14. ¿Imam sutillata qawakurqa watakuna pasasqanman hina?

¹⁴ Waranqantin watakunam runakunaqa kamachinakurqaku, ichaqa manam mayqanninkupas allintaqa kamachirqachu. Chaymi sutillata qawachin satanasqa llulla kasqanta hinaspa runakunaqa Diospa yanapakuyninta necesitasqankuta. Chaychá Diosmanta willakuq Jeremiasqa kaynata nirqa: “Dios taytalláy, yachanim runaqa mana kikillanmanta kawsasqanta. Yachanim runaqa mana kikillanmanta purisqanta”, nispa (Jeremias 10:23).

¿IMANASQAM JEHOVA DIOSQA ACHKA WATAKUNA PASANANTA SAQICHKAN?

15, 16. (1) ¿Imanasqam Jehova Diosqa unay watakuna ñakariy kananta saqichkan? (2) ¿Imanasqam Jehova Diosqa mana allichanchu satanaspa rikurichisqan sasachakuykunataqa?

¹⁵ ¿Imanasqam Jehova Diosqa achka watakuna ñakariy kananta saqichkan? ¿Imanasqam mana allinkuna kananta saqin? Satanaspa kamachisqan mana allin kasqanta yachanapaqqa tiempom pasanan karqa. Runakunaqa tukuy imaymanatam kamachirqaku, ichaqa manam allintaqa kamachiyta atirqakuchu. Chaymantapas runakunaqa tukuy imakunatam ruwayta yacharunku, chaywanpas astawanmi kachkan mana allin ruwaykuna, wakchayay hinaspa guerrakunapas. Manam pipas allintaqa kamachinmanchu Dios mana yanapaptinqa.

¹⁶ Chaymantapas, Jehova Diosqa manam allichanchu satanaspa rikurichisqan imapas sasachakuykunataqa. Chayta ruwaspanqa satanaspa munaychakusqantam yanapachkanman, Diosqa manamá chaytaqa ruwanmanchu. Runakunapas piensanmankuchá allinta kamachinakusqankuta. Diosqa manam chaypaqqa yanapanmanchu, payqa mana llullakuq kasqanraykum chaytaqa mana haykapipas ruwanmanchu (Hebreos 6:18).

17, 18. Satanaspa tukuy mana allinkuna ruwasqanta allichananpaq, ¿imatam Jehova Diosqa ruwanqa?

¹⁷ Jehova Diosqa atinmanmi satanaspa hinaspa runakunapa tukuy mana allinkuna ruwasqanku allichaytaqa. Diospaqqa manam imapas sasachu. Jehova Diosqa yachanmi haykapi satanaspa llulla kasqanta qawachiyta. Hinaspam qallariypi munasqanman hina kay allpa pachata sumaqta huertayachinqa. ‘Sepulturapi llapallan kaqkunapas’ kawsarimunqakum (Juan 5:28, 29). Runakunapas manañam unqunqakuñachu nitaq wañunqakuñachu. Jehova Diosqa Jesuswanmi ‘diablopa ruwasqankunata chinkachinqa’ (1 Juan 3:8). Anchatam Jehova Diosta agradecekunchik ñuqanchikta mana amiruwasqanchikmanta. Chayqa yanapawanchikmi payta riqsinanchikpaq hinaspa kamachiwananchikpaq payta akllakunapaqpas (qaway 2 Pedro 3:9, 10). Jehova Diosqa ñakariptinchikpas yanapawasunmi aguantananchikpaq (Juan 4:23; qaway 1 Corintios 10:13).

¹⁸ Jehova Diosqa manam hikutawanchikchu payta kamachiwananchikpaq akllakunapaqqa. Kikinchik imatapas tanteakunapaqmi Diosqa saqiwanchik. Qawasunchik imaynatam chayqa yanapawanchik.

¿IMATA RUWANAYKIPAQMI TANTEAKUNAYKI?

19. (1) ¿Uywakuna hinaspa maquinakuna hinachu kanchik? ¿Imanasqa? (2) ¿Imanasqam Diosta agradecekunanchik?

¹⁹ Jehova Diosqa imatapas kikinchik tanteakunanchikpaqmi saqiwanchik. Chayraykum tanteakuyta atichwan imata ruwanapaq hinaspa Jehova Diosta yupaychanapaq utaq manapas. Manam uywakuna hinachu kanchik, uywakunaqa mana piensaspankum imatapas ruwanku (Proverbios 30:24-28). Manataqmi maquinakuna hinachu kanchik, maquinakunaqa imapas ruwanallankutam ruwanku. Ñuqanchikmi ichaqa tanteakuyta atinchik imayna runa kananchikpaq, pikuna amistadninchik kananpaq hinaspa kawsakuyninchikwan imata ruwananchikpaqpas. Jehova Diosqa munanmi kusisqa kawsakunanchikta.

20, 21. ¿Imata ruwanaykipaqtaq kunanqa tanteakunayki?

²⁰ Jehova Diosqa munanmi payta kuyananchikta (Mateo 22:37, 38). Taytaqa kusisqam tarikun churin sunqumanta kuyaptinqa, chay tayta hinam Jehova Diospas kusisqa tarikun. Jehova Diosqa saqiwanchikmi kikinchik tanteakuspa payta yupaychananchikpaq utaq manapas. Satanasqa hinaspa Adanwan Evaqa Jehova Diosta qipanchanankupaqmi tanteakururqaku. Qamqa, ¿imata ruwanaykipaqmi tanteakunki?

²¹ Jehova Diosta yupaychanaykipaq tanteakuynikim aswan allinqa. Waranqantin runakunam tanteakurunku Jehova Diosta yupaychanankupaq hinaspa satanastañataq qipanchanankupaq (Proverbios 27:11). Yachamusqanchikman hinam, Diosqa ñakariykunata chinkachispan kay allpa pachata sumaqta huertayachinqa. ¿Imatam ruwanayki chaypi kanaykipaq? Chaymantam qatiqnin yachachikuypi yachasunchik.