7 KAQ TAPUKUY
¿Imatam ruwayman huchallikunaypaq hikutawaptinku?
¿IMATAM RUWAWAQ?
Huk kutipim Hedher sutiyuq sipas Mike sutiyuq mozowan yaqa iskay killallaraq riqsinakuchkarqaku. Hedherpaqmi ichaqa una-unayñapas riqsinakunmanku hina karqa. Paykunaqa tukuy punchawmi celularwan qayanakuqku utaq qillqanakuqku, hinaspapas kuska kayllatañam munaqku. Mikem ichaqa manaña chayllatachu munarqa.
Hedherwan Mikeqa makimantam hapiylla-hapinakurqaku hinaspa wakinpi muchanakurqaku. Ichaqa Mike Hedherwan puñuytaña munaptinmi Hedherqa mana munarqachu, chayna kaptinpas Hedherqa manataqmi munarqachu Mike saqirunantaqa paylla kuyaqnin kasqanrayku. Chaymi Hedherqa sunqullanpi nikuq: “Imataña mañawaspanpas Mikeqariki kuyakusqaymi”, nispa.
Piwanpas riqsinakunaykipaq hinaña kaspaykiqa. ¿Imatam qamqa ruwawaq Hedher hina sasachakuypi kaspaqa?
KAYPI YUYAYMANAY
Warmi-qari puñuyqa casarasqakunallaman Diospa qusqanmi. Chaymi manaraq casarakuchkaspa piwanpas puñuruspaykiqa chay qususqaykita pampaman churaruwaq. Chayqa pipas musuq pachata churakunaykipaq quykusuptiki wasiki pichakunaykipaq servichikuy hinam kanman.
Sichum sachaman qispiruspa chaymanta anka hina pawayta munaspaykiqa, wichiykuspachiki imaykitapas imanakuruwaq ¿aw? Yaqa chayna sasachakuymanmi wichiykunki Diospa kamachisqanta mana kasukuspaykiqa. Payqa manam munanchu manaraq casado kachkaspa piwanpas puñunaykitaqa (1 Tesalonicenses 4:3).
¿Imataq kanqa mana kasukuptikiqa? Bibliapim nin: ‘Huchapakuqqa kikinpa cuerponpa contranpim huchallikun’, nispa (1 Corintios 6:18). ¿Ima ninantaq chayqa?
Manaraq casarakuchkaspa puñuq achka mozo-sipaskunata tapuptinkum tukuywan ñakarisqankuta willakurqaku.
Willakurqakum piwanpas manaraq casarakuchkaspa puñuruspaqa llumpa-llumpayta pesapakusqankumanta.
Willakurqakutaqmi puñuruspaqa riqsinakusqanku qarimanta utaq warmimanta iskayrayasqankuta. ¿Imanasqa? “Ichapas hukkunawanpas puñukurqa” nispanku.
Chaymantapas achka sipaskunam willakurqaku puñuylla munaq qariwan kaytaqa mana munasqankuta, aswanqa kuyaqnin hinaspa respetaqnin qariwan kayta munasqankuta. Achka qarikunañataqmi willakurqaku puñusqanku warmitaqa manaña kuyasqankumanta.
Chaynaqa, manaraq casarakuchkaspa piwanpas puñuruspaykiqa cuerpoykitam pinqayman churachkawaq (Romanos 1:24). Cuerpoykitaqa kuyapayanaykim. ¡Amayá chayllaqa pimanpas quykuychu!
Amapuniyá manaraq casarakuchkaspaqa piwanpas puñuychu (1 Tesalonicenses 4:3). Casarakuspañam warma-yanaykiwan puñuspayki kusisqa kawsakunki. Manam manaraq casarakuchkaspa puñuq mozo-sipaskuna hinachu pesapakunki hinaspa hukmanyasqallaña kanki (Proverbios 7:22, 23; 1 Corintios 7:3).
¿IMA NIWAQTAQ?
Pipas kuyasuspaykiqa hawkalla hinaspa allinlla kawsakunaykitachiki munanman ¿aw?
Chaymantapas kuyasuspaykiqa manachá Diospa contranpi imatapas ruwanaykipaqqa nisunkimanchu ¿aw? (Hebreos 13:4).