Diosman asuykuychik
¿Imatam Dios munan ñoqanchikmanta?
KASUKUYQA sasaniraqmi. Achka runakunam piñakuq patronninkuta mana munastin kasukunku. Jehová Diospa serviqninkunaqa manamá chaynachu kanku. Paykunaqa munasqankuraykum Diosta kasukunku. Deuteronomio 10:12, 13 nisqanpi Moisespa rimasqanmi qawachiwanchik imanasqa chayna kasqanmanta.a
Serviqninkunamanta Dios ima munasqanmanta rimaspanmi, Moisesqa kay tapukuyta rurarqa: “¿Imatataq Tayta Diosqa qamkunamanta munan?”, nispa (12 versiculo). Payqa tukuy ima kamachiqmi, unanchawaqninchik hinaspa kawsachiwaqninchikpas (Salmo 36:9; Isaias 33:22). Hinaptinqa, derechoyoqmi kachkan imatapas mañawananchikpaq. Chaymi kasukunanchikpaqpas mañawanchikman. Ichaqa mana munastin kasukunanchiktaqa manam munanchu. Aswanmi ‘tukuy sonqonchikmanta kasukunanchikta’ munan (Romanos 6:17).
Ichaqa, ¿imataq kallpanchawasun sonqomanta kasukunapaq? 12 versiculopa nisqanman hinam ‘payta respetananchik [otaq manchakunanchik]’.b Moisesqa manamá nichkarqachu mana allin rurasqanchikmanta katkatataspa manchakuymantachu. Rimachkarqam Diostawan kamachisqankunata respetaymanta, kaymi harkawasun mana allinkunata mana ruranapaq.
Ichaqa manam chayraykuchu Jehová Diostaqa kasukuna. Moisespa nisqanman hinaqa, Jehová Diosqa munanmi ‘tukuy sonqonchikwan tukuy vidanchikwan’ servinanchikta (12 versiculo). Huk rimaypiqa, kuyasqanchikraykum Diostaqa kasukuna. Kuyakuyqa manam “kuyanim” niyllachu. Huk librom nin: “Hebreo rimaypiqa imapas sientesqanchikqa tupanmantaqmi chay sientesqanchikrayku imapas rurasqanchikwan”. Hinaptinqa, Diosta kuyaq runaqa rurasqanwanmi qawachin chay sientesqanta. Chaymi cheqaptapuni Diosta kuyaspanchikqa, kallpanchakusunmi munayninta ruranapaq (Proverbios 27:11).
Hinaptinqa, ¿wakillanpichu Diosta kasukuna? Moisesmi nirqa: “Payqa munan [. . .] tukuy munasqanman hina kawsanaykichiktam”, nispa (12 versiculo). Jehová Diosqa munanmi tukuy imapi kasukunanchikta. Wakin runakunaqa piensanmankuchá tukuypi kasukuyqa mana allin kasqanta. Ichaqa manam chaynachu.
Diosta kasukuyqa allinnillanchikpaqmi. Chaytam Moises sutillata qawachirqa 13 versiculopi, nirqam: “Munantaqmi [. . .] kamachikuyninkunata hinaspa decretonkunata kasukunaykichiktapas chaynapi alli-allinña kanaykichikpaq”, nispa. Imataña mañawaptinchikpas allinninchikpaqmi kanqa. Yuyariy “Diosqariki kuyakuqllañam” (1 Juan 4:8). Chaynaqa kamachikuyninkunaqa kunanpas wiñaypaqpas allinninchikpaqmi (Isaias 48:17). Paypa kamachiwasqanchikta kasukuspaqa, sasachakuykunamantam librakusun hinaspa hamuq tiempopiñataq Diospa Gobiernonpi wiñaypaq bendicionkunata chaskisun.c
Hinaptinqa, imataña Dios mañawaptinchikpas, allinmi sonqomanta lliwta kasukuyqa. Chaynapim kuyakuq Jehová Diosman asuykusun, payqa yachanmi imam allinninchikpaq kasqanta.
[Willakuykuna]
a Kay textopiqa israelitakunatam Moisesqa rimachkarqa, chaywanpas rimasqankunaqa kunan tiempopi Dios agraday munaqkunataqa yanapanmanmi (Romanos 15:4).
b Deuteronomio libropiqa achka kutipim riman Jehová Diospa serviqninkuna payta respetaspa kawsanankumanta (Deuteronomio 4:10; 6:13, 24; 8:6; 13:4; 31:12, 13).
c Aswan yachachikuytam tarinki, ¿Imatapunim Bibliaqa yachachin?, libropa 3 capitulonpa yachachikuyninpi; kay libroqa Jehová Diospa testigonkunapa rurasqanmi.