Jesuspa yachachisqankuna

Imaynatam familiapi kusisqa kachwan

¿Imaynatam qawana casado vidata?

Casado vidaqa sagradom. Divorciakuymanta Jesusta tapuptinkum pay nirqa: “¿Manachu Bibliapi leerqankichik kay pachapa qallariyninpi qaritawan warmita unanchaqpa nisqanta? Paymi nirqa: ‘Qarim tayta-mamanta saqespa hukllawakunqa warminmanña chaymi iskayninku huk runa hinallaña kanqaku’ nispa. Chaynaqa manam iskayñachu kanqaku aswanqa hukllañam. Chayraykum runaqa mana rakinmanchu Diospa kuskanchasqantaqa”, nispa. Nirqataqmi: “Huk qariwan mana pierdekuchkaptin yanqamanta warminta wischuspan hukwan casarakuqqa hukwan pierdekuy huchapim kachkan”, nispa (Mateo 19:4-6, 9). Jesuspa kayna nisqanta casadokuna kasukuspanku respetanakuptinkuqa, lliw familiam kusisqa kanqaku.

¿Imanasqataq Diosta kuyana familiapi kusisqa kanapaq?

Jesusmi nirqa: “‘Diosnikitam kuyanki tukuy sonqoykiwan, tukuy vidaykiwan hinaspa tukuy yuyaynikiwan’ nispa. Kaymi punta kaq hatun kamachikuy. Qatiqninñataqmi nin: ‘Kuyankim runamasikita kikikita hina’”, nispa (Mateo 22:37-39). Hinaptinqa, familianchikpi kusisqa kanapaqqa Jehová Diostam kuyana, payta kuyaspaqa kuyasuntaqmi runamasinchiktapas. Arí, punta kaq runamasinchikqa familianchikpi kaqkunam.

¿Imaynam kananku casado kaqkuna?

Jesusmi qosakunapaq sumaq ejemplo: Payqa qatiqninkunata kuyaspanmi paykunapaq entregakurqa (Efesios 5:25). Paymi nirqa: “Manam servichikunaypaqchu hamurqani aswanqa servinaypaqmi”, nispa (Mateo 20:28). Jesusqa manam kamachikuqllañachu karqa nitaq qaqchakuqchu. Aswanmi kallpanchakurqa paywan kusisqa tarikunankupaq (Mateo 11:28). Chaynam qosakunapas kananku familiankuwan.

Qosayoq warmikunapas Jesusmantaqa anchatam yachanmanku. Bibliaqa ninmi ‘Diosqa Cristopa uman’ kasqanta hinaspa ‘qariñataq warminpa uman’ kasqanta (1 Corintios 11:3). Jesusqa Taytan kasukuytaqa allintapunim qawarqa hinaspa tukuy sonqonwanmi respetarqa. Paymi nirqa: ‘Paypa agradonpaqmi tukuy tiempo rurani’, nispa (Juan 8:29). Diosta kuyaspa respetaq casada warmiqa, qosanpa kamachikuynintapas kasukunmi.

¿Imatam Jesusmanta yachanmanku tayta-mamakuna?

Jesusqa warmachakunapaq tiempochakuspanpas, yacharqam piensasqankutawan sientesqankuta. Huk kutipim Jesusman warmachakuna asuykunankuta qatiqninkuna mana munarqakuchu, chaymi nirqa: “Ama harkaychikchu wawakuna ñoqaman hamunanta”, nispa (Lucas 18:15, 16). Huk kutipipas Jesuspi iñisqankumanta warmachakuna qayaykachakuptinkum Jesusqa alabarqa, chayrayku piñakuq runakunatañataqmi nirqa: “¿Manachu Bibliapi leerqankichik: ‘Llapa wawakunapiwan ñuñuqraq wawakunawanmi alabaykachikunki’ niqta?”, nispa (Mateo 21:15, 16).

¿Imaynatam wawa-churikuna Jesusta qatipakunmanku?

Jesusqa Diosmantam anchata interesakurqa. Chunka iskayniyoq watachanpi kachkaptinmi tayta-maman “templopi tarirurqaku, Diospa leynin yachachiqkunata uyarispan hinaspa tapuspan paykunawan tiyachkaqta”. Chay yachachiqkunaqa ‘admirakurqakum yachasqanwan hinaspa contestasqanwanpas’ (Lucas 2:42, 46, 47). Chayna yachasqanwanqa manam Jesusqa hatunchakurqachu, aswanmi tayta-mamantaqa respetarqa, Diospa Palabranpa nisqanman hinaqa ‘paykunata kasukuspam’ kawsarqa (Lucas 2:51).

Astawan yachayta munaspaqa, qawariy ¿Imatapunim Bibliaqa yachachin?a libropa 14 kaq yachachikuyninta.

[Willakuy]