Chuya espiritumanta: ¿imanasqam runakunaqa pantaypi kachkanku?
¿IMATAQ chuya espirituqa? Achka runakunam mana entiendeyta atinkuchu. Papa Benedicto XVI sutichasqa sacerdotem Australia nacionpi achka runakunapa qayllanpi rimaspan nirqa: “[Chuya espiritumanta] allin entiendeytaqa manachusmi atichwanchu”, nispa.
Arí, chuya espiritu ima kasqanmanta achka yachachikuykuna kasqanraykum wakinpaqqa sasa kaymanta yachachiyqa. Wakinmi ninku:
• Chuya espirituqa Jesuspa qatiqninkunapa sonqonpim kachkan.
• Kay pachapi Diospa kasqanmi.
• Hukllapi kimsa Dioskunapa hukninmi.
¿Imanasqataq chayna achka yachachikuykuna kan? 300 wata ñawpaqtaraqmi religioso runakuna yachachiyta qallaykurqaku chuya espirituqa Dios hina runa kasqanta. Reqsisqa católico librom nin, “Ñ[awpaq] T[estamentopiqa] manam yachachinchu chuya espiritu runa kasqantaqa”, aswanmi Diospa “atiynin kasqanta”, nispa. Nintaqmi, ‘M[osoq] T[estamentopiqa] achka kutipim [. . .] Chuya Espiritumanta rimaspanqa, manam runa kasqanmantachu rimachkan’, nispa. Chaymantapas ninmi ‘Chuya Espiritu hinaspa kallpa otaq atiyqa yaqa chayna rimayllam’ nispa (Diccionario de la Biblia, Serafín de Ausejo runapa rurasqanmi).
Ichaqa, ¿imatam kaymanta runakuna piensanku? Achka runakunam mana creenkuchu huk kallpa otaq chuya espiritu, runa hina kasqantaqa. Estados Unidos nacionpi runakunata tapuptinkum, yaqa llapallanku nirqaku chuya espirituqa Diosmanta chaynataq Jesusmanta mana sapaq runa kasqanta. Religioso runakunañataqmi ninku, “Chuya Espirituqa Diosmanta hinaspa Jesusmanta sapaq runa kasqanta”. Hinaptinqa, ¿imaynatam yachachwan mayqan cheqap kasqanta?
Chaypaqqa Bibliapa cheqap yachachisqantam qawananchik. Apostol Pablopa nisqanman hinam Diosqa Palabranta qowarqanchik “yachachiwananchikpaq”, “pantaypi puriptinchikpas allin ñanman kutirichiwananchikpaq” (2 Timoteo 3:16).
¿Imapitaq yanapawasun chuya espiritumanta cheqapta yachayqa? Anchatamá yanapawasun. Diospa yanapakuyninta chaskinapaqqa mañakunanchikmi espiritunta. Ejemplopaq, ¿haykapipas hukmanyasqa mana kallpayoq tarikurqankichu? Chayna tarikuspaqa Jesuspa kayna nisqantam kasukunanchik: ‘Mañakuptikichikqa Diosqa qosunkichikmi [. . .]. Qamkunaqa [. . .] churikichikmanqa allin kaqkunatam qonkichik, ¿chaychu mañakuqkunamanqa hanaq pachapi kaq Taytaykichik mana qosunkichikman Chuya Espirituta?’, nispa (Lucas 11:9, 13).
Qatiqnin yachachikuykunapim qawasunchik chuya espiritumanta Biblia ima yachachisqanta hinaspa imayna yanapawananchikmantapas.
[19 kaq paginapi suti rikuylla kaq willakuy]
Bibliaqa yachachinmi chuya espiritu ima kasqanta