¿Yachachinachu warmakunaman Diosmanta?

Jonathan Swift sutiyoq runam qellqarqa kaynata: ‘Religionmantam pisillata yachanchik ichaqa kuyanakunamantaqa astawanmi cheqninakunchik’, nispa.

CHAY nisqan yaqa 300 wata masninta pasaruptinpas wakin nacionkunapim achka runakuna kay tiempopipas chaynata piensanku. Wakinmi piensanku tayta-mamakuna warmankuman Diosmanta yachachiyninkuqa mana allin kasqanta. Religionniyoq familiapi wiñaq warmakunaqa mana allin kasqankumantam ninku.

¿Imatataq qam piensanki? ¿Ima ninkitaq qatiqninpi tapukuykunamanta?

● Tayta-mamaqa manam yachachinanchu Diosmanta warmankuman.

● Suyanankum warmanku yuyayniyoq kaptinña Diosmanta yachachinankupaq.

● Taksachanmantam warmakunamanqa Diosmanta yachachina. Ichaqa wiñaptinkum kikinkumanta astawan yachanankupaq kallpanchana.

● Wawa-churiqa tayta-mamanpa yachachisqantam upallalla chaskinan.

¿Warmakunapa allinninpaqchu religionmanta yachachiyqa?

Mayqen tayta-mamapas warmankunapa allinnintam munan. Ichaqa, ¿warmakunapa mana allinninkupaqchu kanman religionmanta yachayninkuqa? Unay watakunañam estudianku tayta-mamakuna warmankuman Diosmanta yachachiptinku imayna kasqankumanta. ¿Imatam chaywan yacharunku?

Cuentatam qokurunku, religionmanta yachachiyqa warmakunapa mana allinninpaq kananmantaqa allin wiñananpaq yanapasqanta. Estudiasqankumantam 2008 watapi huk revistapi qellqarqaku kaynata: “Religionmanta yachachiyqa tayta-mamatawan wawa-churikunatam kuyanakuspa kawsanankupaq yanapan”.a Chaymantapas nirqam: “Warmakunaman Diosmanta yachachiyqa allinchusmi kanman, yanapanmi familianwan allinta kawsanankupaq”, nispa (Social Science Research). Tupachiy chay nisqankuta Jesucristopa nisqanwan: “Mayna kusisqam ‘Diostam necesitani’ niqkunaqa” (Mateo 5:3).

¿Ima nichwantaq yuyayniyoqña kaptinku Diosmanta hinaspa religionmanta yachachiymantaqa? Chayna piensaqkunaqa manam yachankuchu warmachakunapa yuyayninqa yuraq papel hina kasqanta. Chaymi tayta-mamaqa tanteanan imayna kawsananpaq, hinaspa allinninpaq kaqta qellqachkaq hina yachachinanpaq otaq saqenmanku kikillanmanta umanta chaynataq sonqonta imawanpas huntachinanpaq.

¿Imataq yanapanman?

Ñawpamantaraqmi religionta servichikunku runamasinta cheqninankupaq. Hinaptinqa, ¿imaynatam tayta-mamaqa warmankunata yanapanmanku runamasinta mana cheqninankupaq? ¿Imaynatam yachachina runamasinta kuyananpaq kallpanchaq religionmanta?

Kay kimsa tapukuykunapa kutichiyninwanmi yanapakuyta tarisun: 1) ¿imamantam yachachinanku?; 2) ¿pitaq yachachinan?; 3) ¿imaynatam allinta yachachinmanku?

[Willakuy]