‘Manam kay pachamantachu kankichik’
‘Runakunapa cheqnisqanmi kachkanku manaña kay pachapaq kasqankurayku.’ (JUAN 17:14)
¿Imatam Jesusqa chaywan niyta munarqa? Jesusqa manam kay pachapi gobiernokunawanqa chaqrukurqachu nitaq ima chaqwa ruraykunawanpas. Chaymi nirqa: “Munaychakuyniyqa manam kay pachamantachu, kay pachallamanta kaptinqa qatiwaqniykunachá peleanmanku judiokunapa jefenkunaman mana entregasqa kanaypaq”, nispan (Juan 18:36). Chaymantapas qatiqninkunatam nirqa Bibliapa yachachisqanman hina rimanankupaq chaynataq kawsanankupaqpas (Mateo 20:25-27).
Ñawpa cristianokunapa ejemplon. Jonathan Dymond sutiyoq religioso runam ñawpa cristianokunamanta nirqa: ‘Manam runamasinku wañuchiytaqa munarqakuchu penqaypi kananku kaptinpas nitaq carcelpi otaq wañunanku kaptinpas’, nispa. Gobiernokunapa tanteasqankuwan chaqrukunankumantaqa ñakariytam akllarqaku. Manataqmi huchallikurqakuchu wakin runakuna hinaqa. Chaymi paykunamanta Biblia kaynata nin: “Diospi mana iñiqkunam admirakunku mana allin rurayninkunapi manaña ruraysiptikichik chaymi qamkunamantaqa mana allintaña rimanku”, nispa (1 Pedro 4:4). Ñawpa tiempopi pasasqanmanta estudiaq Will Durant sutiyoq runapa nisqanman hinam ‘cristianokunaqa kuyapayakuyninkuwan hinaspa allinta kawsasqankuwan Diospi mana iñiq hinaspa mana allin kawsaqkunata penqaypi churarqaku’.
¿Pikunataq kunanpas chaynata ruranku? Catolica iglesiapa huk qellqanmi sayapakuymanta nirqa: ‘Concienciapa nisqanman hina rurayqa manam allinchu’, nispa. (New Catholic Encyclopedia.) Ruanda nacionpi 1994 kaq watapi lliw religionkuna wañuchinakuypi chaqrukusqankumantam huk periodico nirqa: ‘Jehová Diospa testigonkunallam mana chaqrukurqakuchu chay wañuchinakuypiqa’, nispa. (Reformierte Presse.)
Alemania nacionpi runakunata kañaspa wañuchisqankuta yuyarispanmi llakikuywan huk profesor nirqa: ‘Manam chaytaqa mayqen religionpas nitaq pi runapas denunciarqachu, llullakuspa tukuy imawan ñakarichisqankumantaqa’, nispa. Chayna pasasqanmanta allinta yachaykuspanmi chay profesorqa cuentata qokurqa Jehová Diospa testigonkuna chayna pasasqanmanta mana upallasqankuta. Imawan ñakarichiptinkupas paykunaqa manam chaqrukurqakuchu chay mana allin ruraykunapiqa.
Chuya kawsaypi, ¿pikunataq qatipakunku ñawpa cristianokunapa ejemplonta? Huk revistam nin: “Catolica religionpi kaq mozo-sipaskunam yaqa llapanku allinpaq qawanku servinakuyta otaq manaraq casarakuchkaspa warmi-qari puñuytapas”, nispa. (U.S. Catholic.) Huk curapa kayna nisqanmantapas nirqam: “Consejanaypaq hamuq achka warmi-qarikunaqa manaraq casarakuchkaspam servinakunkuña”, nispa. Huk qellqam nirqa: “Jehová Diospa testigonkunaqa chuya kawsanankupaqmi kallpanchakunku”, nispa. (The New Encyclopædia Britannica.)