Moisesqa iñiyniyoqmi karqa

¿IMATAQ IÑIYQA?

Manaraq rikusqanchikta cheqap kasqanpaqña hapiymi. Diospi iñiqqa manam iskayrayananchu paypa prometesqankuna cumplinanmantaqa.

¿IMAYNATAM MOISESQA QAWACHIRQA IÑIYNIYOQ KASQANTA?

Ima ruwananpaqpas Diospa promesankunapi confiaspam (Genesis 22:15-18). Egiptopi tukuy imayoq hucha vidapi kawsananmantaqa ‘Diospa runankunawan kuska ñakariytam akllakurqa’ (Hebreos 11:25). ¿Chaypaqqa mana piensarispachu tantearqa? ¿Ñakakurqachu chay tanteakusqanmanta? Manam, Bibliam nin: “Mana rikuna Diosta qawachkaq hinam kallpanchakurqa”, nispa (Hebreos 11:27). Payqa manam haykapipas ñakakurqachu iñiyninman hina tanteakusqanmantaqa.

Hukkunatapas iñiyninkupim kallpancharqa. Faraonpa tropankuna Puka lamar qocha lawman asuykamuptinkum, israelitakunaqa llumpayta mancharikuspanku Jehova Diostawan Moisesta qayakurqaku. ¿Imatam Moisesqa ruwarqa?

Manapaschá piensarqachu Puka lamar qochata Dios rakiruptin chayninta ayqekunankupaq kasqantaqa. Ichaqa manam iskayrayarqachu paykunata Dios amparananmantaqa, chayna kasqanta qawachinanpaqmi Moisesqa runamasinkunaman nirqa: “Ama manchakuychikchu, sayaychik hinaspa qawaychik Tayta Diospa kunan salvawasqanchikta”, nispa (Exodo 14:13). ¿Atirqachu israelitakunata iñiyninkupi kallpanchayta? Awriki, Moisesmantawan lliw runakunamantam Biblia nin: ‘Puka lamar-qocha kicharikuykuptinmi chaki allpanta pasarqaku’ chaytaqa ruwarqaku iñiyniyoq kasqankuraykum (Hebreos 11:29). Moisespa iñiyninqa yanaparqam kikintapas chaynataq hukkunatapas.

¿IMATAM YACHACHIWANCHIK?

Diospa promesankunapi confiaspam ima ruwananchikpaqpas tanteakunanchik. Dios serviyninchikta puntapi churaptinchikqa ima pisipuwaqninchiktapas payqa qowasunmi (Mateo 6:33). Qollqella maskaymanta karunchakuyqa sasam, ichaqa Jehova Diospim confiananchik payqa necesitasqanchiktam qowasun, kapuqllanchikwan contentakuspa payta serviypi kallpanchakuptinchikqa. Jehova Diosmi prometewanchik: ‘Manapunim saqesqaykichu’, nispa (Hebreos 13:5).

Chaymantapas hukkunatam iñiyninkupi kallpanchananchik. Tayta mamakunaqa wawa-churinkumanmi yachachinanku Diospi iñinankupaq. Taksachankumantam yachananku Dios kasqanta chaynataq ima ruwaykuna allin otaq mana allin kasqanmantapas. Yachanankutaqmi Diospa kamachikuyninkuna kasukuyqa allinninpaq kasqantapas (Isaias 48:17, 18). Diosqa tukuy sonqowan ‘maskaqninkunatam favorecen’, ¡mayna allinmi Diospi iñinankupaq yanapayqa! (Hebreos 11:6.)