Warma kasqaypi tanteasqaymanta
Jason warmachallaraq
1985 watapim 10 wataypi kachkaptiy, Camboya nacionmanta warmakuna chayaramurqa estudiasqay Columbus (Ohio, Estados Unidos) escuelaman. Huk kaqninmi iskay-kimsa palabrakunata ingles rimaypi yachasqa, hinaspam dibujopi qawachiwaspan willawarqa manchakuypaq wañuchinakuymanta hinaspa ayqekuymantapas. Chay warmakunapi piensaspaymi sapa tuta waqaq kani. Munarqanim mosoq pachamanta hinaspa kawsarimuymanta willayta, ichaqa manam ingles rimayta entiendeqkuchu. Warmallaraq kachkaspaypas camboyano rimayta yachanaypaqmi tantearqani, chaynapi Jehova Diosmanta willanaypaq. Manam piensayllapas-piensarqanichu chay tanteasqay allinpi tukunanmantaqa.
Camboyano rimayta yachayqa sasam karqa. Chayraykum iskay kutikama saqeruyta munarqani, ichaqa Jehova Diosmi tayta-mamayta servichikurqa kallpanchawananpaq. Profesorniywan estudiaqmasiykunam ichaqa niwarqaku allin estudioyoq kanaypaq, chaynapi achka qollqeta chaskinaypaq. Ichaqa precursor kaytam munarqani, chaymi estudiarqani iskay-kimsa punchawlla llamkanaypaq. Estudiayta tukuruspayñataqmi precursorkunawan kuska Diosmanta willakuq kani. Yanaparqanitaqmi ingles yachay munaqkunatapas, chaymi hamuq punchawkunapi yanapawarqa.
16 wataypi kachkaspaymi uyarirqani Long Beach (California, Estados Unidos) lawpi camboyano rimaypi huk grupo qallaykusqanta. Chaymi watukurqani hinaspa chay rimaypi leeyta yacharqani. Estudiayta tukuruspallaymi precursor karqani hinaspam hinalla camboyano rimaypi vecinoykunaman Diosmanta willakurqani. 18 wataypi kachkaspaymi Camboya nacionman astakuyta piensarqani. Chay nacionpi hinalla sasachakuykuna kaptinpas, 10 millon runakunamantaqa pisillam Jehova Diosmanta uyarirqaku. Chaypiqa enteron nacionpim huk congregacionlla karqa 13 iñiqmasinchikkunawan. 19 wataypi kachkaspaymi chayllaraq chay nacionman rirqani, hinaspam iskay watamanta chaypiña yacharqani. Ingles rimayta yachachispay hinaspa tikraspaymi llamkarqani hinalla Diosmanta willakunaypaq. Chaymantañataqmi casarakurqani hinaspam kuskayku achka runakunata camboyano rimaypi Diosta reqsinankupaq yanaparqaniku.
Jehova Diosmi ‘sonqoypa munasqanta’ qoykuwarqa (Sal. 37:4). Runakunaman Diosmanta yachachiymi aswan allinqa ima estudioyoq kaymantapas. 16 watañam Camboya nacionpi kachkani, kunanqa 12 congregacionkuna hinaspa 4 grupokunam kachkan. (Kaytam willakun Jason Blackwell)