Wakin cumplikuptinpas yaqa llapanmi mana cumplikurqachu

¿Munawaqchu hamuq tiempomanta yachayta? Wakin runakunaqa yachaytam munanku. Chaymi achka runakuna allinta otaq mana allintaraq hamuq tiempomanta willakunku. Qawasun wakiqninta:

• YACHAYSAPA RUNAKUNAM achka qollqeta gastanku hinaspa chayllaraq lloqsimuq maquinakunatapas servichikunku allpa Pachata runakuna qachachasqankurayku imapi tukunanmanta hinaspa sapa punchaw imayna kananmantapas willakunankupaq.

• HAMUQ TIEMPOMANTA YACHAQ RUNAKUNAM tanteanku qollqepas hinaspa gobiernokunapas imayna kananmanta. Warren Buffett runam qollqe imayna kananmanta willakuyta atisqanrayku ancha reqsisqa, payqa huk kaqnin apu runam. Nate Silver runapas, runakunapa piensasqankuta qawaspam allinta tantean gobiernoman pi yaykunanmanta hinaspa premiokunatapas pi apakunanmanta.

• ÑAWPA TIEMPOPI WAKIN QELLQAKUNAPA nisqantam, hamuq tiempomanta willakunankupaq servichikunku. Wakin runakunam piensanku Michel de Notredame (Nostradamus) runapa ñawpa tiempopi mana entiendenapaq qellqasqankuna, kunan tiemponchikpi cumplikusqanta. Piensarqakutaqmi maya sutiyoq almanaque 21 diciembre 2012 watapi tukusqanrayku imapas desgraciakuna pasakunanmanta.

• RELIGIONKUNAPI PUNTA APAQKUNAM, runakunata huñunankurayku nirqaku imapas desgraciakuna enteron Pachapi kananmanta. Hamuq tiempopi imapas desgracia pasakunanmanta willakuq Harold Camping runam, qatiqninkunapiwan tukuy hinastinpi willakurqaku 2011 watapi allpa Pacha chinkachisqa kananmanta. Ichaqa, ¡pantarurqakumá!

• LAYQA RUWAQ runakunam ninku hamuq tiempopi imapas pasakunanmanta yachanankupaq atiyniyoq kasqankuta. Edgar Cayce runawan Jeane Dixon runapa wakin nisqankum cumplikururqa, wakinñataqmi mana. Dixon runam nirqa 1958 kaq watapi kimsa kaq hatun guerra qallarinanmanta, Cayce runañataqmi nirqa 1970 watakunapi Nueva York llaqta lamar qochaman chinkaykunanmanta.

¿Yaqachu hamuq tiempopi imapas kananmanta mana pantaspa yachachwan? Chayna kaptinqa, ima allinchá kanman.