‘Tukuy hinastinpim testigoykuna kankichik’
‘Tukuy hinastinpim testigoykuna kankichik [. . .], allpapa tukuyninkama’ (HECH. 1:7, 8, Sagrada Biblia [SB], escritura actualizada).
1, 2. (1) ¿Pitaq Jehova Diospa aswan allin testigonqa? (2) ¿Ima ninantaq Jesus sutiqa? (3) ¿Imatam sutinpa nisqanman hina Jesus ruwarqa?
JUZGASQA kaspanmi Jesucristoqa Judea llaqtapi Poncio Pilato sutiyoq kamachiqta nirqa: “Chaypaqmi ñoqaqa nacerqani, chaypaqtaqmi hamurqani kay pachamanpas chaynapi cheqapmanta rimanaypaq”, nispa (leey Juan 18:33-37). Chaymanta qepamanmi apostol Pablo willakurqa, Jesusqa mana manchakuspan testigo hina ‘Poncio Pilatopa ñawpaqninpi’ Diosmanta willakusqanta (1 Tim. 6:13). Satanaspa munaychakusqan kay Pachapiqa sasaniraqmi kanman “cheqap” hinaspa “allin testigo” kayqa (Apoc. 3:14).
2 Jesusqa Juda castamanta kasqanraykum Jehova Diospa testigon karqa nacesqanmantapuni (Is. 43:10). Arí, Jesus hina Jehova Diospa testigonqa manam haykapipas karqachu. Jesusqa sutinpa ima ninan kasqantam anchata chanincharqa. Chay sutitaqa kikin Jehova Diosmi churarqa. Diospa angelninmi Joseyman nirqa chuya espiritupa atiyninwan Maria wiksayakunanmanta. Nirqataqmi: “Qari wawatam wachakunqa, paytam sutichanki Jesuswan, paymi runankunata salvanqa huchankumanta”, nispa (Mat. 1:20, 21). Hebreo rimaypi Jesus sutiqa “Jehova Diosmi salvaq” ninanmi. Chaymi sutinpa nisqanman hina, payqa ‘Israel casta chinkasqa ovejakunata’ yanaparqa huchankumanta wanakuspa Diospa chaskisqan kanankupaq (Mat. 10:6; 15:24; Luc. 19:10). Chaymi Diospa Munaychakuyninmanta tukuy sonqonwan willarqa. Marcos libropim nin: “Jesus[mi] Galilea lawman rirqa Diospa munaychakusqanmanta allin noticiakunata willakustin, paymi nirqa: ‘Tiempom chayaramunña. Diospa munaychakunan tiempom hichparamunña. Huchaykichikmanta wanakuspaykichikyá chaskikuychik Diospa allin noticianta’”, nispa (Mar. 1:14, 15). Chaymantapas, Jesusqa mana manchakuspanmi religionpi punta apaqkunata nirqa mana allin ruwasqankumanta, chayraykum paykunaqa tantearqaku qerupi wañurachinankupaq (Mar. 11:17, 18; 15:1-15).
“DIOSPA ADMIRAKUYPAQ RURASQANKUNAMANTA”
3. ¿Imam pasarqa Jesuspa wañukusqan kimsa punchaw qepaman?
3 Jesusta wañurachisqanku kimsa punchaw qepamanmi Taytanqa kawsarirachirqa. Ichaqa, manam aycha cuerpopiñachu aswanqa mana wañuq espiritu cuerpopiñam (1 Ped. 3:18). Kawsarimusqanta qawachinanpaqmi Jesusqa qatiqninkunaman rikuriykurqa aycha cuerpopi. Chay kawsarimusqan punchawpim yaqa pichqa kutita qatiqninkunaman rikuriykurqa (Mat. 28:8-10; Luc. 24:13-16, 30-36; Juan 20:11-18).
4. (1) ¿Imatam Jesusqa kawsarimusqan punchawllapi ruwarqa? (2) ¿Ima ruwayniyoq kanankupaqmi Jesusqa qatiqninkunata nirqa?
4 Pichqa kaq kutipi Jesus rikuriykuptinqa, apostolninkuna hinaspa chaypi kaq runakunam huñunasqa kachkarqaku. Bibliamanta yachachichkaq hinam, chaypiqa paykunapa ‘yuyayninkuta kichaykuptin chayraq entiendeykurqaku Bibliapa nisqanta’. Hinaptinmi musyakurqaku Bibliaqa ñawpaqmantaraq Jesuspa wañukunanmantawan kawsarimunanmanta willakusqanta. Chay huñunakuy tukuytam, hina chay kawsarimusqan punchawllapi, Jesusqa ima ruwayniyoq kanankumanta qatiqninkunata nirqa: ‘Jerusalenpipas hinaspa tukuy nacionkunapipas willakuptikichikmi runakuna wanakuspa huchankumanta pampachasqa kanqaku’, nispa. Nirqataqmi: “Kaykunamantaqa qamkunam testigo kankichik”, nispa (Luc. 24:44-48).
5, 6. (1) ¿Imanasqataq Jesus nirqa ‘testigoykuna kankichik’ nispa? (2) ¿Imatam Jesuspa qatiqninkunaqa willakunanku karqa?
5 Chaynaqa, tawa chunka punchaw pasayta otaq ripukunanpaqña apostolninkunaman rikuriykusqanpiqa, paykunaqa allintachá entienderqaku: ‘Tukuy hinastinpim testigoykuna kankichik Jerusalenpi, Judeapi, Samariapi, maypiñapas, allpapa tukuyninkama’, nispa Jesuspa kamachisqantaqa (Hech. 1:8, SB). Ichaqa, ¿imanasqataq Jesusqa Jehova Diospa testigon kanankupaqqa mana nirqachu? Jesusqa chayna niytaqa atinmanmi karqa, ichaqa Israel runakunaman rimasqanraykum mana chaynatachu nirqa, paykunaqa Jehova Diospa testigonkunañam karqaku.
Jesuspa qatiqninkunaqa hinallam willakunchik hamuq tiempopi Jehova Dios imakuna ruwananmanta (Qaway 5 hinaspa 6 kaq parrafokunata)
6 Chaymanta qepamanmi Jesuspa qatiqninkunaqa willakunanku karqa, Jehova Diosqa Churin Jesustaña runakunata salvananpaq servichikusqanta. Chay salvacionqa manam Israel runakuna sirviente kachkaspanku Egiptomanta hinaspa Babiloniamanta salvasqa kasqanku hinallachu. Jesucristopa wañukusqanwan kawsarimusqanmi runakunata salvan huchamantawan wañuymanta. Pentecostes 33 watapi Jesuspa chayllaraq hanaq pachaman rinankupaq akllasqan qatiqninkunam, “Diospa admirakuypaq rurasqankunamanta” willakurqaku hinaptinmi chay willakuyta achka runakuna chaskirqaku. Hanaq pachapi Taytanpa alleq lawninpi tiyaykuspanmi, Jesusqa qawarqa imayna achka runakuna huchankumanta wanakusqankuta hinaspa runakunata salvananpaq Jehova Dios payta servichikusqanpi iñisqankutapas (Hech. 2:5, 11, 37-41).
‘ACHKA RUNAKUNAPA RANTINPI WAÑUKUSQAN’
7. ¿Imatam qawachirqa Pentecostes 33 watapi tukuy ima pasakusqan?
7 Pentecostes 33 watapi tukuy ima pasakusqanmi qawachirqa runakunarayku Jesuspa wañukusqanta Dios chaskisqanta (Heb. 9:11, 12, 24). Jesusmi nirqa: “Manam servichikunaypaqchu hamurqani aswanqa servinaypaqmi hinaspa achka runakunapa rantinpi wañunaypaqmi”, nispa (Mat. 20:28). Jesuspa wañukusqanwan yanapachikuq “achka” runakunaqa manamá huchankumanta wanakuq judiokunallachu kananku karqa. Aswanqa, “Diosninchikqa munachkanmi llapallan runakuna salvakunankuta”. Arí, Jesuspa wañukuyninmi ‘runakunapa huchanta pampachan’ (1 Tim. 2:4-6; Juan 1:29).
8. (1) ¿Imataq Jesuspa qatiqninkunata yanaparqa mana manchakuspa willakunankupaq? (2) ¿Pikunamanwanmi chayarqa “cheqap allin noticia” willakusqanku?
8 Jesuspa qatiqninkunaqa, ¿hinallachu mana manchakuspa paymanta willakurqaku? Arí, ichaqa manam kikinkumantachu chayqa karqa aswanqa Jehova Diospa chuya espiritunpa atiyninwanmi (leey Hechos 5:30-32). Pentecostes 33 watamanta 27 watakuna qepatam “cheqap allin noticia” willakusqa karqa judiokunaman hinaspa “kay pachapi llapallan” runakunamanpas (Col. 1:5, 23).
9. ¿Imataq pasarqa Jesuspa willakusqanman hina cheqap yachachikuykunawan?
9 Ichaqa, tiempopa risqanman hinam cristianokunaqa Dios yupaychayninkuta yanqachayta qallaykurqaku (Hech. 20:29, 30; 2 Ped. 2:2, 3; Jud. 3, 4). Jesuspa willakusqanman hinam Satanasqa pantay yachachiqkunata servichikurqa cheqap yachachikuykunata tutayarachinanpaq. Chayqa kanan karqa ‘tukupay tiempo’ chayamunankamam (Mat. 13:37-43). Chaymantam Jehova Diosqa Churin Jesusta Rey kananpaq churarqa 1914 watapa octubre killanpi. Chaymanta qepamanmi kay Pachapi ‘tukupay tiempokuna’ qallaykurqa (2 Tim. 3:1).
10. (1) ¿Imatam ñawpaqmantaraq hanaq pachapaq suyakuyniyoq cristianokuna willakurqaku? (2) ¿Imam pasarqa 1914 watapa octubre killanpi, hinaspa imakunataq qawachin chayna kasqanta?
10 Hanaq pachaman rinankupaq suyakuyniyoq cristianokunaqa, ñawpaq watakunamantaraqmi willakurqakuña 1914 watapa octubre killanpi Diospa Gobiernon kamachiyta qallaykunanmanta. Paykunaqa chaytam yacharurqaku Daniel libropi willakusqan hatu-hatun sacha kuchusqa kaspan ‘qanchis watamanta’ kaqlla wiñamunanta entienderuspanku (Dan. 4:16). Jesuspas chay ‘qanchis watakunatam’ suticharqa ‘mana judio runakunapa munaychakusqan tiempowan’, chaytam willakurqa hamuq tiempopi ‘rikurimunanmantawan tukupay tiempokunamanta’ rimaspan. 1914 watamantapacha kay Pachapi tukuy pasakusqankunam sutillata qawachin Jesucristo Rey kasqanta (Mat. 24:3, NM 7, 14; Luc. 21:24). Kunan tiempopi ‘Diospa admirakuypaq rurasqankunamanta’ willakuspaqa, willakunchiktaqmi 1914 watapi Rey kananpaq Jesucristota Jehova Dios churarusqanmanta.
11, 12. (1) ¿Imataq pasakurqa 1919 watapi? (2) ¿Pikunatam Jesucristoqa 1935 watamantapacha huñuyta qallaykurqa? (Qaway 28 kaq paginapi dibujota.)
11 Jesusqa Rey karuspanmi kay Pachapi qatiqninkunata librayta qallaykurqa ‘hatu-hatun Babiloniamanta’ (Apoc. 18:2, 4). 1919 watapim, Enteron Pachapi Punta Kaq Hatun Guerra tukurusqan qepaman, hanaq pachapaq cristianokunaqa tukuy hinastinpi astawan willakuyta atirqaku. Willakurqakumá Jehova Diospa Gobiernonmanta hinaspa Jesuspa rantinchikpi wañukusqan imayna salvawasqanchikmanta. Chayna willakusqankuwanmi waranqantin runakuna cheqap yupaychayta qallaykurqaku hinaspam Jesucristowan kuska hanaq pachapi kamachinankupaq akllasqa karqaku.
12 Chaymantam 1935 watamanta Jesucristoqa waranqantin runakunata huñurqa ‘sapaq ovejankuna’ kanankupaq. Paykunaqa kanku llapallan nacionkunamanta ‘achkallaña runakunam’. Hanaq pachapaq suyakuyniyoq cristianokunapa yanapakuyninwanmi, kay achkallaña runakunaqa Jesuspa mana manchakuq kasqanta qatipakunku hinaspam willakunku salvacionninkuqa Jehova Diosmantawan Jesucristomanta kasqanta. Diosmanta hinalla willakusqankuraykum hinaspa Jesucristo rantinchikpi wañukusqanpi iñisqankuraykum, paykunaqa ‘hatu-hatun ñakariymanta’ librasqa kanqaku. Chaypitaqmi Satanaspa munaychakusqanpas chinkachisqa kanqa (Juan 10:16; Apoc. 7:9, 10, 14).
ALLIN NOTICIAKUNATAYÁ MANA MANCHAKUSPA HINALLA WILLAKUSUN
13. (1) ¿Imapaqmi Jehova Diospa testigonkunaqa kallpanchasqa kanchik? (2) ¿Imataq yanapawasun chayta ruwanapaq?
13 Hinallayá chaninchasun Jehova Diospa ‘admirakuypaq rurasqankunamanta’ hinaspa hamuq tiempopaq prometesqankunamanta Testigo kasqanchiktaqa. Wakinpim sasaniraq chayqa kanman. Achka iñiqmasinchikkunam Diosmanta willakunku mana uyariy munaqkunapa kasqan lawpi, wakinkuñataqmi qatikachasqa kanku. Apostol Pablopa hinaspa willakuqmasinkunapa ruwasqankutam qatipakuchwan. Paymi nirqa: “Diosninchikmi kallpanchawarqaku chaymi mana manchakuspa willarqaykiku Diosmanta allin noticiata, willarqaykikumá achkallaña runakuna contraykupi sayarichkaptinkupas”, nispa (1 Tes. 2:2). Amayá haykapipas hukmanyasunchu. Aswanqa kay Pachapi Satanaspa munaychakuyninpa puchukaynin chayamunankamayá hinalla Jehova Diosman qokusqanchikman hina ruwanapaq kallpanchakusun (Is. 6:11). Ichaqa, manam kikillanchikmantaqa chay ruwaytaqa atichwanchu, chaymi Jehova Diospa chuya espiritunta mañakunanchik. Paymantam hamun “chay hatu-hatun atiyqa manam ñoqanchikmantachu” (leey 2 Corintios 4:1, 7; Luc. 11:13).
14, 15. (1) ¿Imaynatam runakunaqa punta cristianokunata qawarqaku? (2) ¿Imaynatam apostol Pedroqa kallpancharqa cristianokunata? (3) ¿Imaynam kananchik Jehova Diospa testigon kasqanchikrayku insultawaptinchik?
14 Kunan tiempopiqa millonnintin runakunam ninku cristiano kasqankuta hinaspa Diosta yupaychasqankutapas. “Rurasqankuwanmi ichaqa qawachikuchkanku mana chayna kasqankuta. Paykunaqa kachkan millakuypaqmi, mana kasukuqmi hinaspa allinkunata mana ruray atiqmi” (Tito 1:16). Punta cristianokunatapas yaqa lliw runakunam cheqnirqaku. Chaymi apostol Pedro kaynata kallpancharqa: “Cristorayku insultasuptikichikqa mayna kusisqam kankichik [. . .] Diospa Espiritun qamkunapi kasqanrayku”, nispa (1 Ped. 4:14).
15 Kunan tiempopiqa Jehova Diospa testigonkunapas chayna insultasqam kanchik. Diospa Gobiernonmanta willakuspaqa Jesusmantawanmi willakunchik. Jesuspas Jehova Diosmanta willakusqanraykum qatikachasqa karqa. Chaymi nirqa: ‘Ñoqaqa hamurqani Taytaypa sutinpim ichaqa manam chaskiwankichikchu’, nispa (Juan 5:43). Chaynaqa, Diosmanta willakusqanchikrayku insultawaptinchikqa ama hukmanyasunchu. ¿Imanasqa? Chayna ruwawasqanchikqa qawachiwanchikmi Jehova Diospa chaskisqan kasqanchikta hinaspa chuya espiritun ñoqanchikwan kasqantapas.
16, 17. (1) ¿Imataq pasachkan enteron pachapi Jehova Diospa llaqtanwan? (2) ¿Imatam hinalla ruwananchik?
16 Yuyarisuntaq Jehova Diospa llaqtan enteron pachapi astawan yapakusqanta. Sapa kuti willakusqanchik lawkunapipas hinallam Diosmanta uyariy munaq runakunata tarinchik. Chayna runakunata tarispaqa kaqmantayá kutisun hinaspa Bibliamanta yachachisun, chaynapi Jehova Diosman qokuspa bautizakunankupaq. Sudáfrica nacionmanta Sarie sutiyoq iñiqmasinchik hinapaschá tarikuchwan, payqa 60 wata masninñam Diosmanta willakuchkan. Paymi nin: “Anchatam agradecekuni rantinchikpi Jesuspa wañukusqanrayku Jehova Dioswan allin amistad kasqaymanta. Kusikunitaqmi paypa sutinmanta willakuspaypas”, nispa. Payqa Martinus qosanwanmi, kimsa churinkunatawan achka runakunata yanaparqa Jehova Diospa serviqnin kanankupaq. Nintaqmi: “Manam ima llamkaypas anchataqa kusichiwankuchu. Jehova Diosqa chuya espiritunwanmi kallpata qowanchik munayninta hinalla ruwanapaq”, nispa.
17 Jehova Diospa testigonña kaspanchikpas otaq manaraq kaspanchikpas, ancha kusisqamá tarikunchik Jehova Diospa llaqtanpiqa. Chaymi hinalla Diosmanta willakunanchik hinaspapas kallpanchakunanchikmi kay Pachapi mana allin ruwaykunamanta karunchakunapaq. Chaynata ruwaspaqa, Taytanchik Jehova Diostam hatunchasun hinaspam paypa testigon kasqanchikta anchata chaninchasun.