Pantaq runa kasqanchiktam riqsikunanchik

Danielmi warmichan Margaritawana kusisqallaña tarikurqaku warmi wawan qusanpiwan hinaspa iskay wawankunapiwan watukamusqankurayku, chaymi allinta yanukuy yachaq Margaritaqa canuto fideosta quesoyuqtab yanunanpaq alistakurqa, chay mikuyta willkankuna munasqanrayku.

Yanukuyta tukuruspanmi mesaman churaykurqa mikunankupaqña. Hinaptinmi mankata kichaykuptinqa mana fideosninta hinasqachu. Chaymi llapallanku mana ima niyta atirqakuchu.

Arí, yuyayniyuqpas warmakunapas pantanchikmi rimasqanchikwan utaq imapas ruwasqanchikwan. Wakinpiqa qunqay sunqum kanchik. Ichaqa ¿imanasqataq imapipas pantanchik? ¿Imatam ruwachwan imapipas pantaruspaqa? ¿Yaqachum imapas yanapawachwan mana sapa kuti pantanapaq? Chaykunamantam qatiqninpi yachasunchik.

DIOSQA MANAM PANTASQALLANCHIKTACHU QAWAN

Allin ruwasqanchikmanta pipas alabaykuwaptinchikqa anchatam kusikunchik. Ichaqa mana allinta ruwaruspanchikqa, ¿yaqachum riqsikunchik pantarusqanchikta? Mana hatun tukuq kaspaqa riqsikusunmi.

Hatun tukuq kaspanchikqa pantasqanchiktam mana kaqpaqpas hapisunchik, manam riqsikusunchu utaqmi hukman tumpasun. Chayna kaptinchikqa sasachakuy rikurichisqanchikmi mana allichakunqachu, aswanmi mana huchayuqkunata ñakarichisunchik. Huchanchikta mana riqsikuspanchikpas sapakamam ‘Diosninchikmanqa cuentata qusunchik’ (Romanos 14:12).

Diosqa yachanmi pantaq runakuna kasqanchikta, chaymi pantasqallanchiktaqa mana qawanchu. Salmos qillqam nin: ‘Diosqa llakipayakuqmi hinaspa kuyapayakuqmi’, nispa. Chaymi pantasqanchikkunamantaqa ‘mana wiñaypaqchu anyawasun nitaq wiñaypaqchu piñakuwasun’. ‘Diosqa yuyanmi allpamanta ruwasqa kasqanchikta’ (Salmo 103:8, 9, 14).

Chaymi Diosqa munan pay hina llakipayakuq hinaspa pampachakuq kananchikta (Salmo 130:3). Chayna runa kanapaqmi palabranpi niwanchik, niwanchiktaqmi pantaruspanchikqa ima ruwanamantapas.

PANTASQANCHIKTA RIQSIKUQ HINASPA PAMPACHAKUQMI KANANCHIK

Wakin runaqa imapipas pantaruspanqa manam riqsikuyta munanchu, aswanmi tukuyta ruwan hukman tumpananpaq utaq mana huchayuq kasqanta qawachikunanpaq. Sichum pantaruspanchikqa, ¿chaynachu kananchik? Manam, aswanqa pantasqanchikta riqsikuspam allichananchik, chay ruwaymi aswan allinqa ¿aw? Manataqmi allinchu kanman pantasqanchikmanta llumpayta ñakakuspa mana ima ruwayqa. Sichum pantasqanchikta mana riqsikuspaqa aswan sasachakuypim tarikusunchik. Chaymi aswan allinqa pantasqanchikta riqsikuspa allichay, chaynataq imanasqa pantarusqanchikmanta yachay hinaspa pantasqanchikta manaña yuyarayay.

Sichum pipas imapas rimasqanwan utaq ruwasqanwan sunqunchikta nanarachiptinqa chayllam imatapas nirunchik. Ichaqa aswan allinqa Jesuspa kayna nisqanta kasukuymi, nirqam: “Imaynam qamkunapas munankichik runamasikichik qamkunapaq imapas ruwananta, chaynatayá qamkunapas paykunapaq ruwaychik”, nispa (Mateo 7:12). Sichum pipa sunquntapas imapas ruwasqanchikwan nanarachispanchikqa munanchikmi pampachaykuwananchikta. Chaynaqa ¿allinchu kanman pampachakuq kanapaq kallpanchakuyninchik? (Efesios 4:32).

BIBLIAM YANAPAWANCHIK SAPA KUTI MANA PANTANAPAQ

Huk qillqapa nisqanman hinaqa pantanchikqa mana allinta tanteasqanchikraykum, imamantapas mana allinta yachasqanchikraykum utaq mana allinta uyarisqanchikraykum. Ichaqa sapa kuti mana pantanapaqmi qatiqninpi bibliapa yachachikuyninkuna yanapawasun.

Proverbios 18:13 nin: ‘Manaraq allinta uyarichkaspan rimaq runaqa mana tanteoyuq kasqantam qawachikun. Mana allinta uyarichkaspan rimaq runaqa pinqaypi kasqantam qawachikun’, nispa. Sichum imamantapas allinta uyariykuspaña allin tanteowan rimaspanchikqa manam yanqatachu rimasun utaqmi mana chayllaqa piñakusunchu. Arí, uyariy yachaq runa kaspanchikqa allintam tanteasunchik, manam pantasunchu.

Romanos 12:18 nin: “Atisqaykichikman hinayá kallpanchakuychik llapallan runakunawan hawkalla kanaykichikpaq”, nispa. Lliw runawan hawkalla kawsakunapaqqa respetakuq hinaspa kuyapayakuq runam kana. Kallpanchakunataqmi allin ruwasqankumanta alabanapaqpas. Chayna runa kaspanchikqa manam sasachakusunchu pitapas pampachanapaqqa. Mana piñanakuspallam allichasun pantanakusqanchiktapas.

Imapipas pantaruspaqa riqsikunanchikmi, chayna kayninchikmi yanapawasun aswan allin runa kanapaq. Ichapas kallpanchakuna kanqa pacienciakunapaq, controlakuyta yachanapaq utaq aswan kuyakuq kanapaq (Galatas 5:22, 23). Pantasqanchikta riqsikuspaqa yachasunmi yapapiqa imata mana ruwanamanta. Ichaqa manam allinchu llumpayta ñakakuyqa nitaq allichanapaq imatapas mana ruwayqa. Imapipas pantaruspaqa manam llumpaytaqa hukmanyanachu, aswanmi asirikuna.

PANTAQ RUNA KASQANCHIKTA RIQSIKUSPAQA ALLINMI KAWSAKUSUN

Pantaq runakuna kasqanchikta riqsikuspaqa, pantaspanchikpas utaq hukkunaña pantaptinpas manam llumpaytaqa hukmanyasunchu. Aswanmi kallpanchakusun lliw runawan hawkalla kawsakunapaq. Chaymantapas, pantasqanchikmanta yachaspanchikqa aswan allin runam kasunchik. Hukkunapas ñuqanchik hina pantaq kasqankuta yachaypas yanapawanchikmi kuyapayakuq kanapaq. Hinaspapas, pampachakuq runa kaspanchikqa kuyakuq Jehova Diostam qatipakuchkanchik (Colosenses 3:13).

Qallariyninpi rimamusqanchik Margaritapa ayllunqa, ¿piñakurqakuchu mana allinta yanukusqanrayku? Manam. Aswanmi llapanku asikurqaku, hinaspankum imaynachallatapas mikururqaku. Chay pasakusqantam unay watakunaña pasaruptinpas willkankunaqa churinkumanpas willankuraq abuelonkumanta rimaspanku. Margaritapa pantasqanqa manam llumpay pantaychu karqa.