Hamuq tiempo imayna kananmanta yachayta munasqanku

Ñawpaq tiempomantaraqmi runakunaqa ninku: “¡Imaynaraq hamuq tiempopi vida kanqa!”, nispa. Tapukunkutaqmi: “¿Allinchu kasunchik, icha astawanchu sasachakuypi kasun? ¿Unaychu kawsakusun icha chayllachu wañukusun?” nispanku.

Yachaysapa runakunam tukuy imapas imayna kasqanta qawaspanku hamuq punchawkuna imayna kananmanta tukuyta nirqaku. Wakinpiqa nisqankuman hinam karqa, ichaqa yaqa llapanpim pantarurqaku. Chaynam karqa aparatokunata ruwaq Guglielmo Marconi sutiyuq runapa nisqanwan, paymi 1912 watapi nirqa: “Tukuy aparatokunata ruwasqankuraykum guerraqa manaña kanqachu”, nispa. Takikuna grabaq huk runañataqmi nirqa Beatles sutiyuq takiqkunata runakuna manaña uyarinankumanta, chaymi 1962 watapi guitarra tocasqankuta mana grabayta munarqachu, ichaqa Beatles sutiyuq takiqkunataqa achka runakunam uyarirqakuraq.

Wakin runakunañataqmi hamuq tiempopi imayna kanankuta yachayta munaspanku lucerokunata qawaspanku adivinaq runakunata tapukunku, chaymi periodicokunapi runakunapa suertenmanta qillqasqankuta sapa kuti qawanku. Wakin runañataqmi imayna kanankumanta yachanankupaq qatipaqkunaman utaq suerte qawaqkunaman rinku.

Ñawpaq tiempopipas runakunaqa riqkum brujokunaman utaq suerte qawaqkunaman. Chaytachusmi ruwarqa Lidia nacionta kamachiq Creso sutiyuq runapas, paymi Persia nacionta kamachiq Cirowan manaraq guerrapi kachkaspan Grecia nacionpi brujokunaman tukuy imata apachirqa guerrapi pi ganananmanta yachananpaq, chaymi willarqaku Cirowan guerrapi kaspanqa hatun nacionta chinkachinanmanta. Chaymi vencenanta piensaspan guerraman rirqa, ichaqa nacionninmi vencerachikurqa.

Grecia nacionpi brujokunaqa manam imam kaqtachu willakurqaku. Chaymi Creso sutiyuq runaqa vencerachikurqa. Kunanpas, ¿imaynataq tarikunku hamuq tiempopi imayna kanankumanta yachayta munaqkunaqa?