¿Chinkanqachu kay allpa pachaqa?

Ichapas yachanki Diospa piñakuynin punchawmanta bibliapa nisqanta (1 Juan 2:17). Chay punchaw chayamuptinqa ¿llapallan runakunachu chinkasun? ¿Allpa pachanchikpas chinkanqachu?

MANA CHAYNA KANANMANTAM BIBLIAPIQA RIMAN.

¿Imakunataq mana chinkanqachu?

RUNAKUNA

¿Ima nintaq biblia runakunamanta? Diosqa kay allpa pachataqa unancharqa runakuna yachanapaqmi (ISAIAS 45:18).

Hatu-hatun qucham urqukunapa chawpinpi kachkan.

KAY ALLPA PACHA

¿Ima nintaq biblia kay allpa pachamanta? Kaynatam nin: ‘Runaqa nacechkanraq wañuchkanraqmi, allpa pacham ichaqa hinalla kachkan’, nispa (ECLESIASTES 1:4).

¿IMA NIYTATAQ KAYWANQA MUNACHKAN? Bibliapiqa niwanchik kay allpa pacha haykaqpas mana chinkananmantam, aswanqa kay allpa pachapi runakuna yachananmantam. Hinaptinqa, ¿imataq chinkanqa Diospa piñakuynin punchawpiqa?

KAYPI YUYAYMANAY. Diospa piñakuynin punchawmanta rimaspanmi bibliaqa Noeypa tiemponpi ima pasakusqanwan tupachin. Chay tiempopiqa mana allin ruwaqllañam runakunaqa karqaku (Genesis 6:13). Chayna kaptinpas, Noeyqa Diosta kasukuq runam karqa, chayraykum Diosqa paytawan ayllunta waqaychaykuspan wakin runakunatañataq llumpa-llumpay parawan chinkarachirqa. Bibliam chaymanta nin: ‘Chay tiempopi runakunam chinkachisqa karqaku kay allpa pachata yaku pamparuptin’, nispa (2 Pedro 3:6). Chaynaqa ¿imataq chinkarurqa? Manam kay allpa pachachu, aswanqa mana allin runakunam. Chaynaqa, Diospa piñakuynin punchawpiqa manam kay allpa pachanchikchu chinkanqaqa, aswanqa mana allin runakunam.

¿Imakunataq chinkanqa?

SASACHAKUYKUNA

¿Ima nintaq biblia sasachakuykunamanta? Ninmi: ‘Mana allin ruwaqkunaqa chayllapunim kanqañachu. Maskaspapas paykunataqa manapunim tarinkichu. Ñakariqmi ichaqariki dueñoyanqa allpatapas. Paykunaqa kusikuywanmi hawkayaypi kawsanqapas’, nispa (SALMO 37:10, 11).

Fotokuna: 1 kaq fotopim suwakuna tienda ukumanta tukuy ima aparisqa lluqsichkanku. 2 kaq fotopim huk autoridadman huk runa qullqita munachichkan payllata yanapaykunanpaq.

¿IMA NIYTATAQ KAYWANQA MUNACHKAN? Noeypa tiemponpi llumpa-llumpay parawanqa mana allin runakunam chinkarqa. Ichaqa, chaymanta qipamanqa kaqmantam mana allin runakuna rikurirqaku. Chayraykum pisillamantaña Diosqa llapallan mana allin ruwaqkunata chinkachinqa. Salmos qillqaqpa nisqanman hinam ‘mana allin ruwaqkunaqa manaña kanqakuñachu’. Chay mana allin runakunatam Diosqa gobiernonwan chinkachinqa.

KAYPI YUYAYMANAY. ¿Imataq pasanqa kay pachapi kamachiqkunawan? ¿Allinpaqchu qawanqaku Diospa gobiernonta? Manam, chayna kananmantam bibliapi nin, aswanqa contranpim hatarinqaku (Salmo 2:2). Chayraykum Diospa gobiernonqa llapallan kamachiqkunata tukunqa hinaspam wiñaypaq kamachiwasunchik (Daniel 2:44). ¿Imaynanpitaq runapa gobiernon chinkanan?

MANAÑAM munanchikñachu runakuna gobiernawananchikta

¿Ima nintaq biblia runamanta? Ninmi: “Yachanim runaqa mana kikillanmanta kawsasqanta. Yachanim runaqa mana kikillanmanta purisqanta”, nispa (JEREMIAS 10:23).

Autoridad kay munaqkunapa fotonkunam huk callepa pirqanpi laqasqa kachkan, chaynintam runakuna purichkan.

¿IMA NIYTATAQ KAYWANQA MUNACHKAN? Runakunaqa unanchasqa karqanchik manam kamachinakunapaqchu. Chaymi mana atinchikchu runamasinchikkunapa sasachakuynin allichayta nitaq allin kamachinakuytapas.

KAYPI YUYAYMANAY. Ancha riqsisqa qillqapim nin: “Nacionkunapi gobiernokunaqa manam chinkachiyta atinkuchu wakchayaytawan muchuytaqa, unquykunataqa, llumpa-llumpay parakunatawan wayrakunataqa nitaq wañuchinakuytapas”, nispa. Ichaqa chay qillqam nin: “Sichum huk gobiernolla enteron allpa pachanchikta gobiernaspanqa chay sasachakuykunataqa chinkarachinmanmi”, nispa. Chaywanpas, llapallan gobiernokuna hukllawakuruspankupas manam chay sasachakuykunataqa chinkachiyta atinmankuchu pantaq runakuna kasqankurayku. Diospa gobiernollanmi chay sasachakuykunataqa wiña-wiñaypaq chinkachinqa.

Chaynaqa, allin ruwaq runakunaqa manam manchakunankuchu Diospa piñakuynin punchawtaqa. Chay punchawpiqariki mana allin ruwaqkunallam chinkanqaku. Aswanmi allin ruwaq runakunaqa kusikunanku. ¿Imaynanpi? Hamuq punchawkunapi allinña kawsakunankuraykum.

¿Haykapitaq chayqa kanqa? Qatiqnin yachachikuypim chaymanta yachasunchik.