Manaraq bibliata estudiachkaspa imata ruwanamanta

Bibliata estudiaspaqa munanchikmi Diosmanta yachasqanchikkuna sunqunchikman chayananta. Munanchiktaqmi pay hina piensayta hinaspa imapas munasqanchikkuna paypa munasqanman hina kananta. Chaypaqqa Esdrastam qatipakunanchik, ‘payqa tukuy sunqumantam tantiakururqa Diospa kamachikuyninkunamanta yachananpaq’ (Esd. 7:10). Chaynaqa, ¿imakunatam ruwachwan?

Diostam mañakuna. Manaraq bibliata estudiachkaspam Diosta mañakunanchik leesqanchikta entiendeykachiwananchikpaq chaynataq yachasqanchikman hina kawsakunapaq (Sal. 119:​18, 34).

Humildem kana. Hatuntukuq runakunataqa chaynataq piensasqallankupi hapipakuq runakunataqa Diosninchikqa manam yanapanchu bibliamanta chiqap kaqta yachanankupaqqa (Luc. 10:21). Amayá estudiasunqa hukkuna alabawanallanchikpaqchu. Chaymantapas sichu bibliata estudiachkaspa imapipas pantasqanchikta cuentata qukusun hinaspaqa chayta riqsikuspam tukuyta ruwananchik cambiananchikpaq.

Takinchiktam uyarina. Takikunaqa sunqunchiktam kusichin. Chaymi ancha allin kanman manaraq bibliata estudiachkaspa takita uyariyninchik, chayqa yanapawasunmi Diospi astawan yuyaymananapaq hinaspa yachasqanchikman hina kawsakunapaq.