• Salmos 14:1-7
    Mosoq Pacha Biblia

    • 14 Mana yuyayniyoqkunan sonqonkupi nishanku:

      “Manan Jehová Diosqa kanchu”,+ nispa.

      Ruwasqankunaqa mana chaninmi, sinchi millaymi;

      manan mayqenpas allin ruwaqqa kanchu.+

       2 Jehová Diosqa llapa runakunatan qhawamushan,

      janaq pachamantan payqa qhawamushan,

      kanchus allin reparaq runa icha manachus chaytan qhawamushan,

      kanchus Jehová Diosta maskhaq icha manachus chaytan qhawamushan.+

       3 Llapankun mana allin ñanman jaykupunku,+

      llapankun mana allin ruwaqkuna kanku.

      Manan mayqenninkupas allin kaqtaqa ruwanchu,

      manan ni jujpas allin kaqta ruwaqqa kanchu.

       4 Mana allin ruwaqkunaqa, ¿manachu mayqellanpas imatapas entiendenku?

      Llaqtaytan paykunaqa t’antata jinaraq mijupunku;

      manan Jehová Diostapas maskhankuchu.

       5 Ichaqa sinchi manchakuymi paykunata jap’inqa,+

      Jehová Diosqa chanin runakunawanmi* kashan.

       6 Qankuna mana allin ruwaqkunaqa, pisichasqa runatan jark’ayta munankichis,

      sarunchasqaq imachus ruway munasqantan qolluchiyta munankichis,

      ichaqa Jehová Diosmi paypa pakakunanqa.+

       7 ¡Israelta libraqqa Sionmanta jamuchun!+

      Jehová Dios llaqtanta juñuqtin Jacob kusikuchun,

      apasqa kasqankumanta kutichimuqtin Israel kusikuchun.