Éxodo
16 Chaymantataq Israel runakunaqa Elinmanta ripurqanku, jinaspa Elinwan Sinaí orqowan tupaypi Sin ch’inneqman+ chayarqanku. Iskay kaq killa chunka pisqayoq p’unchaypin paykunaqa chayman chayarqanku. Egiptomanta lloqsimusqankumantaqa ñan juj killaña karurqan.
2 Chay ch’inneqpin llapa Israel runakuna Moisesmanta Aaronmantawan rimapakuyta qallarirqanku.+ 3 Paykunatan nirqanku: “¿Llaqtantin yarqaypi wañunaykuta munaspachu kay ch’in ladoman pusamuwarqankiku?+ ¡Egiptopi aswan Jehová Dios wañuchimpuwankuman karqan! Chaypiqa mankakuna junt’araqmi aychaykupas kaq,+ sajsanaykukaman t’antatapas mijuq kayku”, nispa.
4 Chaymantan Jehová Diosqa Moisesta nirqan: “Cielomantan t’antata parachimusaq.+ Chaytan llapa runakuna mijunankupaq sapa p’unchay juñunqaku.+ Chaywanmi paykunata pruebaman churasaq, simiyta kasukunqakuchus icha manachus chayta yachanaypaq.+ 5 Soqta kaq p’unchaymi ichaqa iskay p’unchaypaq juñunqaku,+ chaytataq qhepantin p’unchaypaqwan wayk’unqaku”, nispa.
6 Chaymi Moiseswan Aaronpiwanqa llapa Israel runakunata nirqanku: “Tardeyaykuytan allinta yachankichis Jehová Dios Egiptomanta pusamuqniykichis Dios kasqanta.+ 7 Tutamantantaq rikunkichis Jehová Diospa lliflli kayninta. Jehová Diosqa allintan yachan pay contra rimapakusqaykichista. Ichaqa, ¿imaraykutaq qankunari noqaykumanta rimapakushankichis? Noqaykuqa manan imapaschu kayku”, nispa. 8 Moisesqa nillarqantaqmi: “Tardeyaykuytan Jehová Diosqa aychata qosunkichis, tutamantantaq t’antata qosunkichis sajsanaykichiskama mijunaykichispaq. Chaypin yachankichis Jehová Dios rimapakusqaykichista uyarisqanta. ¿Pitaq noqaykuri kayku noqayku contra rimapakunaykichispaq? Qankunaqa manan noqayku contrachu rimapakushankichis, Jehová Dios contran rimapakushankichis”,+ nispa.
9 Chaymantan Moisesqa Aaronta nirqan: “Llaqtantin Israel runakunata niy: Jehová Diospa ñaupanman jamuychis, payqa uyarinmi rimapakusqaykichista,+ nispa”. 10 Aarón rimayta tukuqtin jinan Israel runakunaqa kutirispa ch’in ladota qhawarirqanku, chayllamanmi Jehová Diospa lliflli kaynin phuyupi k’ancharimurqan.+
11 Yapamantan Jehová Diosqa Moisesta nirqan: 12 “Uyarinin Israel runakunaq rimapakusqanta.+ Paykunata niy: Tardeyaykuytan aychata mijunkichis, tutamantantaq t’antata sajsanaykichiskama mijunkichis.+ Chhaynapin yachankichis noqaqa Diosniykichis Jehová Dios kasqayta,+ nispa”.
13 Chay tardenpachan askha codorniz urpikuna Israel runakunaq karpa-karpanman junt’aykurqan.+ Tutamantantaq lliu karpa-karpa muyuriq sulla* kashasqa. 14 Chay sulla wajsipuqtintaq chay ch’inneq pampantinpi qheparqan rit’i jina mujuchakuna.+ 15 Chayta rikuspan Israel runakunaqa imachus kasqanta mana yachaspa ninakurqanku: “¿Imataq kayri?”, nispa. Jinan Moisesqa nirqan: “Chayqa mijunaykichispaq Jehová Diospa qosqasuykichis t’antan.+ 16 Jehová Diosmi nin: Mijuy atisqallaykichista sapanka runapas chayta juñuychis. Jayk’a runakunachus karpaykichispi tiyanku chayman jina juñuychis. Omer tupunaman*+ jaykuqtan sapanka runapaq juñunkichis, nispa”. 17 Chayman jinan ruwarqanku Israel runakunaqa. Wakinmi juñurqanku askhata, wakintaq pisillata. 18 Omer tupunaman jich’aykuspataq askhata juñuqpas pisita juñuqpas igual-llata apakurqanku.+ Sapankankun juñurqanku mijuy atisqallankuta.
19 Qhepamantaq Moisesqa paykunata nirqan: “Aman pipas qhepantin p’unchaypaqqa puchunqachu”,+ nispa. 20 Wakin runakunaqa manan kasurqankuchu Moisesta. Paykunaqa puchurqankun qhepantin p’unchaypaq, ichaqa kurun tukurqan chay puchusqankuta, millaytataqmi asnarqanpas. Chaywanmi Moisesqa paykunapaq phiñakurqan. 21 Sapa tutamantanmi paykunaqa mijuy atisqallankuta juñuqku. Inti q’oñiriqtinqa chullupuqmi pampapi qhepaq mijuyqa.
22 Soqta kaq p’unchayqa iskay p’unchaypaqmi juñurqanku,+ sapankapaqmi iskay omerta juñurqanku. Chayta willaqmi llaqta umalli runakunaqa Moisespa kasqanman jamurqanku. 23 Moisestaq paykunata nirqan: “Kaymi Jehová Diospa nisqan: Paqarinqa samana p’unchaymi kanqa, Jehová Diospaq t’aqasqa samana p’unchay.+ Chhaynaqa imapas hornopaq kaqtaqa kunan horneaychis, imapas t’impuchina kaqtaqa kunan t’impuchiychis.+ Puchuqtaqa paqarinpaq waqaychankichis”, nispa. 24 Jinan paykunaqa Moisespa kamachisqanman jina qhepantin p’unchaykama waqaycharqanku. Chay waqaychasqankutaqa manan kurupas tukurqanchu nitaq asnarqanpaschu. 25 Moisesmi paykunata nirqan: “Kunanqa Jehová Diospaq t’aqasqa samana p’unchaymi, manan imatapas jawapiqa tarimunkichischu, chayrayku chay waqaychasqaykichista mijuychis. 26 Soqtantin p’unchaymi qankunaqa juñunkichis. Qanchis kaq p’unchayqa samana p’unchaymi kanqa,+ chay p’unchayqa manan imapas kanqachu”, nispa. 27 Chaytaña Moisés nirqan chaypas, wakinqa lloqsirqankupunin qanchis kaq p’unchaypas t’antata maskhaq, ichaqa manan tarirqankuchu.
28 Chaymi Jehová Diosqa Moisesta nirqan: “¿Jayk’aqkaman mana simiyta ni kamachisqaykunatapas kasukunkichischu?+ 29 Aman qonqankichischu noqa Jehová Dios samana p’unchayta qankunapaq churasqayta.+ Chaymi soqta kaq p’unchaypiqa iskay p’unchaypaq t’antatapas qoshaykichis. Qanchis kaq p’unchayqa llapaykichismi maypichus kasqallaykichispi qhepakunkichis, aman pipas lloqsinkichischu”, nispa. 30 Jinan Israel runakunaqa qanchis kaq p’unchaypi samarqanku.+
31 Israel runakunaqa maná* nispan suticharqanku chay juñusqankuta. Chayqa culantro ruru jinan yuraq karqan, malliykusqataqmi mielniyoq t’anta jina karqan.+ 32 Moisesmi nirqan: “Jehová Diosmi kamachimuwan: Juj omer manata waqaychaychis chayta mirayniykichiskuna+ qhawananpaq. Chhaynapin yachanqaku imaynatachus Egiptomanta orqomushaspa ch’inneqpi mijuchirqaykichis chayta, nispa”. 33 Jinamantaq Moisesqa Aaronta nirqan: “Juj p’uyñuman churay juj omer manata, chaytataq Jehová Diospa
ñaupanman churanki. Chaymi waqaychasqa kanqa llapa qhepa wiñay runakuna rikunankupaq”,+ nispa. 34 Jinan Aaronqa Diospa rimanakuynin arcaq* ñaupanman chay manata churarqan,+ imaynatachus Jehová Dios Moisesta kamachirqan chayman jina. 35 Israel runakunaqa tawa chunka watan manata mijurqanku,+ chaymantañan runaq tiyasqan jallp’aman chayamurqanku.+ Arí, Canaán jallp’awan tupayman chayamunankukaman manata mijurqanku.+ 36 Chunka omer tupunan juj efá tupunaman* jaykuq.