Éxodo
35 Chaykuna qhepatan Moisesqa llapa Israel runakunata juñuspa nirqan: “Jehová Diosmi nin:+ 2 Soqta p’unchayllan llank’ankichis, qanchis kaq p’unchaymi ichaqa samankichis, chay p’unchayqa jatun p’unchaymi qankunapaq kanqa, noqa Jehová Diospaq t’aqasqa samana p’unchay.+ Pipas chay p’unchaypi llank’anqa chayqa, wañuchisqan kanqa.+ 3 Samana p’unchaypiqa aman may tiyasqaykichispipas ninataqa jap’ichinkichischu, nispa”.
4 Chaymantan Moisesqa llapa Israel runakunata nillarqantaq: “Jehová Diosmi nin: 5 Noqa Jehová Diosniykichispaq ofrendata apamuychis.+ Llapa sonqonkuq kallpachasqan+ runakuna noqa Jehová Diospaq ofrendata apamuychis. Apamuychis qorita, qolqeta, cobreta, 6 azul q’aytuta, azulniraq puka q’aytuta, k’anchaq puka q’aytuta, sumaq lino q’aytuta, cabra pelota,+ 7 puka teñisqa oveja qarata, foca qarata, acacia sach’a maderakunata, 8 mecheropaq* aceiteta, bálsamo aceitetawan; chay bálsamo aceitewanmi jawina aceiteta, sumaq q’apaq inciensotapas+ ruwakunqa. 9 Apamullankichistaqmi ónice rumikunata, juj chhayna rumikunatapas chayta uma sacerdoteq unkunman*+ qhasqo* ch’uspanmanwan k’askachinapaq.+
10 ”Qankuna ukhupi llapa allin yachaq*+ runakuna jamuchunku noqa Jehová Diospa llapa kamachisqayta ruwanankupaq. 11 Paykunan ruwanqaku yupaychana karpata, karpaq qatanankunata, ganchonkunata, marconkunata, jap’inachiq k’aspinkunata, columnankunata, t’oqoyoq sayanankunatawan. 12 Ruwallanqakutaqmi rimanakuyniy arcata,+ k’aspinkunata,+ tapanta,+ t’aqaq cortinantawan;+ 13 mesata,+ k’aspinkunata, llapa imaymanankunata, noqapaq t’aqasqa t’antatawan;+ 14 k’anchanapaq candelerota,+ llapa imaymanankunata, mecheronkunata, mecheropaq aceitetawan;+ 15 incienso q’apachinapaq altarta,+ k’aspinkunatawan; jawinapaq aceiteta, sumaq q’apaq inciensotawan;+ yupaychana karpaman jaykunapi cortinata; 16 ruphachina ofrendapaq altarta,+ cobre rejillankunata, k’aspinkunata, llapa imaymanankunatawan; cobre puruñata tiyanantawan;+ 17 karpa muyuriqta kanchachanapaq cortinakunata,+ postenkunata, postekunaq sayanankunatawan; karpa patioman jaykuna punkupi cortinata; 18 karpapaq estacakunata, karpa kanchachanapaq estacakunata, waskhankunatawan;+ 19 ch’uya partepi servinapaq allin awasqa munay p’achakunata,+ Aaronpaq sacerdote p’achakunata,+ churinkunapaq p’achakunatawan. Chaywan churakuspan paykunaqa serviwanqaku, nispa”.
20 Chaymantataq Israel runakunaqa Moisespa qayllanmanta ripurqanku. 21 Jinaspa llapa sonqonkuq kallpachasqan+ runakuna tukuy sonqomanta Jehová Diospaq ofrendakunata apamurqanku. Chaykunawanmi ruwakunan karqan Dioswan tupana karpata, chay karpapi llapa imachus necesitakusqanta, Diosta servinapaq p’achakunata ima. 22 Llapankun qharikunapas warmikunapas tukuy sonqowan apamurqanku munay qori t’ipanakunata, aretekunata, anillokunata, imaymana alajakunata, imaymana qori cosaskunatawan. Llapankun qori ofrendankuta Jehová Diosman jaywarqanku.+ 23 Azul q’aytuyoqkunapas, azulniraq puka q’aytuyoqkunapas, k’anchaq puka q’aytuyoqkunapas, sumaq lino q’aytuyoqkunapas, cabra peloyoqkunapas, puka teñisqa oveja qarayoqkunapas, foca qarayoqkunapas llapankun chaykunata apamurqanku. 24 Pipas qolqeyoqqa cobreyoqqa chaytan Jehová Diosman apamurqan, pipas acacia sach’a maderayoqpas chaytan apamurqan imakunachus ruwakunan karqan chaykunata ruwakunanpaq.
25 Llapa allin puskay yachaq warmikunan+ makillankuwan puskasqanku azul q’aytuta, azulniraq puka q’aytuta, k’anchaq puka q’aytuta, sumaq lino q’aytutawan apamurqanku. 26 Puskayta allinta yachaq warmikunapas sonqonkuq kallpachasqanmi cabraq pelonta puskarqanku.
27 Israelpi umallikunapas apamurqankun ónice rumikunata, juj chhayna rumikunatapas chayta uma sacerdoteq unkunman qhasqo ch’uspanmanwan+ k’askachinapaq. 28 Apamullarqankutaqmi bálsamo aceiteta, jinallataq mecheropaq, jawina aceitepaq,+ sumaq q’apaq inciensopaq+ aceitetapas. 29 Llapa sonqonkuq kallpachasqan qharikuna warmikuna iman ofrendankuta apamurqanku, chaykunawan Moisesman Jehová Diospa kamachisqankunata ruwakunanpaq. Israel runakunaqa llapankun voluntadninkuta Jehová Diosman apamurqanku.+
30 Chaymantataq Moisesqa Israel runakunata nirqan: “Jehová Diosmi Judá ayllumanta+ Hurpa nieton, Uripa churin Bezalelta ajllan. 31 Paytan Diosqa espiritunwan junt’aykun, chhaynapi allin yachayniyoq, allin yuyayniyoq kananpaq, allin yachaq artesano ima kananpaq. 32 Paymi umallanmanta imaymana dibujokunata ruwayta yachanqa; yachanqan qoripi, qolqepi, cobrepi llank’aytapas, 33 jinallataq rumikuna thupayta may munasqanman kabichiytapas. Yachallanqataqmi maderakunapi imaymana ruwaytapas. 34 Chaymantapas Bezalelpa sonqonman, Dan ayllumanta Aisamacpa churin Oholiabpa+ sonqonman iman churan yachayta jujkunaman yachachinanpaq. 35 Paykunamanmi Diosqa yachaywan junt’aykurqan+ allin yachaq* artesanokuna kanankupaq, imaymana dibujokuna ruwayta yachanankupaq; azul q’aytuwan, azulniraq puka q’aytuwan, k’anchaq puka q’aytuwan, sumaq lino q’aytuwan bordayta awaytawan yachanankupaq. Paykunan imaymana llank’anakunata aparinqaku; paykunan dibujanqaku imapas imaynachus kanqa chaytapas”, nispa.