Éxodo

30 ”Acacia sach’a tablamantan juj altarta ruwanki incienso q’apachinapaq.+ 2 Chay altarqa cuadradon kanqa, largonmi kanqa juj codo,* anchonpas juj codon kanqa, altontaq iskay codo. Altarpas waqrankunapas jujllan kanqa.+ 3 Chay altartaqa llapantan jawantapas, muyuriq qhatantapas, waqrankunatapas ch’uya qoriwan forranki. Cantontapas llapa muyuriqtan qoriwan muyuchinki. 4 Cantonpa uranpin sapanka ladopi iskay qori ninrikunata churanki. Chaynintan apanapaq k’aspikunata suskhuchikunqa. 5 Acacia sach’amantan chay k’aspikunataqa ruwanki, jinaspa qoriwan forranki. 6 Chay altartan churanki rimanakuyniy arcaq+ ladonpi kaq cortinaq ñaupanpi, chhaynapi rimanakuyniy arca cercapi kananpaq. Noqaqa chay arcaq tapan patapin qanman presentakusaq.+

7 ”Aaronmi+ sapa tutamantan chay altar+ patapi sumaq q’apaq inciensota+ ruphachinqa. Chaykamataq candeleropi mecherokunata*+ alistanqa. 8 Inti jaykuy qhepata mecherota jap’ichispapas jujmantan Aaronqa inciensota q’apachillanqataq. Chay incienso ofrendataqa sapa p’unchaymi noqa Jehová Diospa ñaupaypi q’apachikunqa. Chaytaqa tukuy tiempon ruwanqaku. 9 Chay altarpiqa aman mana kamachisqay inciensotaqa+ q’apachinkichischu, aman ruphachina ofrendatapas ni jak’u ofrendatapas jaywankichischu, amallataqmi vino ofrendatapas chaymanqa jich’aykunkichischu. 10 Watapi juj kutitan+ Aaronqa jucha pampachaypaq+ ñak’akusqan animalpa yawarninta chay altarpa waqrankunaman llusiykunqa, chhaynapi chay altarta ch’uyanchakunanpaq. Chaytaqa tukuy tiempon watapi juj kutita ruwakunqa. Chay altarqa ch’uyay-ch’uyaymi noqa Jehová Diospaqqa”, nispa.

11 Jehová Diosmi Moisesta nillarqantaq: 12 “Israel runakunata yupanki+ chayqa, sapankankun vidankumanta noqa Jehová Diosman juj preciota pagawanqaku. Chhaynapi yupashaqtiyki ama pipas castigasqa kananpaq. 13 Llapa yupasqakunan kuskan siclo* qolqeta paganqaku. Chay kuskan sicloqa kanqa yupaychana karpapi peso kasqanman jinan.+ Juj sicloqa iskay chunka guerá* qolqen. Noqa Jehová Diospaqqa kuskan siclo qolqen+ kanqa. 14 Iskay chunka watayoqmanta wichayman yupasqakunan noqa Jehová Diospaq chay qolqeta qonqaku.+ 15 Manan qhapaqmantachu masta mañakunqa nitaq wajchamantachu menosta mañakunqa, llapankun kuskan siclo qolqeta noqa Jehová Diosman qowanqaku vidankuta libranankupaq. 16 Israel runakuna vidankuta libranankupaq llapa qosqanku qolqetan chaskinki, chaytataq tupana karpapaq qonki. Chay qolqeqa noqa Jehová Diospa ñaupaypi Israel runakuna yuyarisqa kanankupaqmi, vidaykichistapas wañuymanta libranapaqmi kanqa”, nispa.

17 Jehová Diosqa nillarqantaqmi: 18 “Maqchikunapaqmi juj jatun cobre puruñata* ruwanki. Tiyananpas cobrellamantataqmi+ kanqa. Chay puruñatan tupana karpawan altarwan chaupipi churanki, jinaspa chayman unuta junt’achinki.+ 19 Chaypin Aaronpas churinkunapas makinkuta chakinkutawan maqchikunqaku.+ 20 Chay unuwanmi maqchikunqaku tupana karpaman jaykunankupaq, altarpi servinankupaq, chay altarpi noqa Jehová Diospaq ofrendakunata ninapi ruphachinankupaqpas. Chhaynapin mana wañunqakuchu. 21 Chakinkuta makinkutawanmi maqchikunqaku mana wañunankupaq. Chay kamachikuytan kasukunqaku Aaronpas llapa miraynin runakunapas”,+ nispa.

22 Wajmantan Jehová Diosqa Moisesta nillarqantaq: 23 “Allinnin sumaq q’apaq plantakunatan juñunki: soqta kilo sumaq q’apaq ch’aki mirra weqeta, kinsa kilo sumaq q’apaq canelata, kinsa kilo sumaq q’apaq cálamo plantata, 24 soqta kilo sumaq q’apaq casia qarata ima. Chaykunaqa yupaychana karpapi siclo pesoman jinan+ pesasqa kanqa. Juñullankitaqmi kinsa litro kuskan* aceituna aceitetapas.* 25 Chaykunamantan Diospaq t’aqasqa jawina aceiteta ruwanki. Chay aceiteqa allin-allin preparasqa+ aceiten kanqa, Diospaq t’aqasqa jawina aceiten kanqa.

26 ”Chay aceitetan jich’aykunki tupana karpaman,+ rimanakuyniy arcaman, 27 mesaman tukuy imaymananmanwan, candeleroman tukuy imaymananmanwan, incienso q’apachina altarman, 28 ruphachina ofrenda jaywana altarman tukuy imaymananmanwan, cobre puruñaman tiyananman ima. 29 Chaykunatan ch’uyanchanki ch’uyay-ch’uya+ kananpaq. Pipas chaykunata tupaykuqqa ch’uyan+ kanan. 30 Aarontapas+ wawankunatapas+ chay aceitewanmi jich’aykunki, chhaynapin sacerdotey kananpaq+ ch’uyanchasqa kanqaku.

31 ”Israel runakunatan ninki: Diosmi nin: Jayk’a mirayña qankunaq qhepaykichisman jamunqa chaypas, kay jawina aceiteqa noqapaq t’aqasqan kanqa.+ 32 Aman pimanpas chaytaqa jich’aykunkichischu, amataqmi chay aceiteta jinaqa pipas ruwanqachu. Chay aceiteqa noqapaq t’aqasqan kanqa, noqaq aceiteyta jinan chaytaqa qhawarinkichis. 33 Pipas kay aceiteta jina ruwanqa jinaspa mana ajllasqay runaman* jich’aykunqa chayqa, wañuchisqan kanqa,+ nispa”.

34 Jehová Diosmi Moisesta nillarqantaq: “Sumaq q’apaq estacte sach’a weqeta, sumaq q’apaq ch’uruta, sumaq q’apaq gálbano weqeta, ch’uya yuraq inciensota* iman juñumunki. Chaykunaqa sapankan kasqallanta pesanqa.+ 35 Chaykunamantan inciensota ruwanki.+ Chay inciensoqa Diospaq t’aqasqa allin-allin preparasqa incienson kanqa, manan ima qhellinpas kanqachu, kachiwan+ iman kachichanki. 36 Chay ruwasqayki wakin inciensotan ñut’uta kutanki, jinaspa kutasqaykimanta wakinta tupana karpapi rimanakuyniy arcaq ñaupanpi churanki, chaypin qanman presentakusaq. Chay inciensoqa Diospaq t’aqasqan kanqa. 37 Aman chhayna inciensotaqa qankunapaqqa ruwakunkichischu.+ Noqa Jehová Diospaq t’aqasqata jinapunin chay inciensotaqa rikunkichis. 38 Pipas q’apachikunanpaq chhayna inciensota ruwakunqa chayqa wañuchisqan kanqa”, nispa.