Hechos

23 Jatun Juntapi* kaqkunata allinta qhawaykuspan Pabloqa nirqan: “Wayqeykuna, noqaqa kunan p’unchaykamapas ch’uya concienciayoqmi Diospa ñaupanpiqa kausashani”,+ nispa. 2 Jinan uma sacerdote Ananiasqa Pabloq ladonpi sayashaqkunata kamachirqan siminpi ch’aqlanankupaq. 3 Chaymi Pabloqa nirqan: “Yau iskay uya, Diosmi qanta k’irisunki. ¿Kamachikuy simiman jina juzgawanaykipaq tiyashaspachu kamachikuy simita p’akispa kamachikushanki ch’aqlawanankupaq?”, nispa. 4 Jinan ladonpi sayashaqkunaqa nirqanku: “¿Chhaynatachu Diospa uma sacerdotenta k’aminki?”, nispa. 5 Jinan Pabloqa nirqan: “Wayqeykuna, manan yacharqanichu uma sacerdote kasqantaqa. Qelqasqan kashan: Aman llaqtaykipi pi kamachikuqmantapas millaytaqa rimankichu,+ nispa”.

6 Chay Jatun Juntapi wakin saduceokuna kasqankuta, wakintaq fariseokuna kasqankuta reparaspan Pabloqa alto kunkawan nirqan: “Wayqeykuna, noqaqa fariseon kani, fariseokunaq wawan.+ Kausarimpuypi creesqaymantan juzgashawanku”, nispa. 7 Chay nisqanwanmi fariseokunawan saduceokunawanqa ch’aqwata jatarichirqanku, chaypi juñunakuqkunaqa t’aqanasqan kasharqanku. 8 Saduceokunaqa “manan kausarimpuypas, angelpas ni espiritupas* kanchu” ninkun; fariseokunan ichaqa chaykunapi creenku.+ 9 Chaymi sinchi ch’aqwa jatarirqan, chayllamanmi fariseokuna t’aqamanta kamachikuy simita wakin yachachiqkuna sinchita churapakamuyta qallarispanku nirqanku: “Manan ima mana allintapas kay runapiqa tariykuchu; ichaqa yaqapaschá juj espíritu otaq juj ángel payta rimaykurqan”,+ nispa. 10 Chhayna sinchi jap’inakuy kaqtinmi ejercitopi comandanteqa Pablota wañuchinankuta mancharikuspa kamachikurqan soldadokuna jamuspanku paykuna ukhumanta Pablota usqhaylla orqomunankupaq, jinaspa soldadokunaq cuartelninman apanankupaq.

11 Chay tutan Señorqa paypa ladonpi rijurispa nirqan: “¡Kallpachakuy,+ Pablo! Imaynan Jerusalén llaqtapipas noqamanta lliuman allinta willarqanki, chhaynatan Roma llaqtapipas willamunki”,+ nispa.

12 P’unchayamuqtinmi judiokunaqa rimanakuspanku jurarqanku: “Mayqenninchispas manaraq Pablota wañuchishaqtinchis mijunqapas ujanqapas chayqa, ñakasqa kachun”, nispa. 13 Chay juramentota ruwaq runakunaqa tawa chunka masmi karqanku. 14 Paykunan umalli sacerdotekunaman umalliq runakunamanwan* rirqanku, jinaspa nirqanku: “Juj juramentota ruwaspan rimanakuyku manaraq Pablota wañuchishaqtiyku mayqenniykupas imallatapas mijuqtinqa ñakasqa kananpaq. 15 Chayrayku Jatun Juntapi kaqkunapiwan ejercitopi comandanteta nimuychis Pablota qankunaman pusamunanpaq paymanta imatapas astawan yachayta munaq tumpalla. Noqaykutaq listo kashasaqku manaraq qayllaykamushaqtin wañuchinaykupaq”, nispa.

16 Chay rimanakusqankutan ichaqa Pabloq pananpa wawan uyarirqan, jinaspan soldadokunaq cuartelninman jaykuspa Pabloman chayta willarqan. 17 Jinan Pabloqa ejercitopi jujnin capitanta wajaspa nirqan: “Kay waynachata pusaripuway comandanteman, juj willakuytan payman willanan kashan”, nispa. 18 Jinan capitanqa chay waynachata comandanteman pusarqan, jinaspa nirqan: “Kaypi preso kashaq Pablon wajamuwaspa valekamuwan kay waynachata qanman pusamunaypaq, juj willakuytas willasunki”, nispa. 19 Chaymi comandanteqa makinmanta juj ladoman pusaspa tapurqan: “¿Imatan willayta munashawanki?”, nispa. 20 Jinan payqa nirqan: “Judiokunan rimanakushanku: Pablomanta astawan yachaq tumpalla paqarin comandanteta valekusun Jatun Juntaman pusaykamunanpaq,+ nispanku. 21 Ichaqa aman paykunata kasunkichu, paykunamanta tawa chunka más runakunan makilla payta suyapakushanqaku* jap’inankupaq, paykunan juranku: Mayqenninchispas Pablota manaraq wañuchishaspa mijunqapas ujanqapas chayqa, ñakasqa kachun, nispanku;+ paykunaqa mañakusqankuman arí ninallaykitañan munashanku”, nispa. 22 Comandantetaq chay waynata nirqan: “Aman pimanpas willankichu kay willawasqaykitaqa”, nispa, chaymantataq kacharparipurqan.

23 Jinan comandanteqa wajachimurqan iskay capitankunata, paykunatan nirqan: “Kunan tuta las nueveta jina* Cesarea llaqtaman rinapaq alistaychis iskay pachaj soldadokunata, caballopi sillasqa puriq qanchis chunka soldadokunata, lanza jap’iq iskay pachaj soldadokunatawan. 24 Alistallaychistaq caballokunatapas, chhaynapi Pablota sillaykachispa kamachikuq Felixman allillanta qhalillata chayachinaykichispaq”, nispa. 25 Chaymantataq juj cartata qelqarqan:

26 “Ancha respetasqa kamachikuq Félix, noqa Claudio Lisiasmi napaykamuyki: 27 Kay runatan judiokunaqa jap’irusqaku, jinaspa wañuchinankuña kashasqa. Roma llaqtayoq+ kasqanta yachaspaymi noqaqa soldadoykunantin usqhaylla rispa paykunamanta qechumurqani.+ 28 Imamantachus juchachashasqankuta yachayta munaspaytaq paykunaq Jatun Juntanman pusarqani.+ 29 Jinan yacharqani kamachikuyninku simi+ jawa juchachasqa kasqanta, ichaqa manan paypiqa ima juchatapas tarinichu wañunanpaq jinaqa ni carcelpi wisq’asqa kananpaq jinapas. 30 Chaywanpas chay judiokunaqa kay runata wañuchinankupaqmi rimanakusqaku,+ chaymi qanman kachamushayki, juchachaqninkunatapas kamachiniñan ñaupaykipi paymanta rimanankupaq”, nispa.

31 Jinan soldadokunaqa comandanteq kamachisqanman jina Pablota+ Antípatris llaqtaman tuta aparqanku. 32 Qhepantin p’unchaytaq caballopi sillaykusqa soldadokunallaña Pablowan rirqanku, wakin soldadokunataq cuartelninkuman kutimpurqanku. 33 Caballopi sillaykusqa soldadokunaqa Cesarea llaqtaman chayaspankun apasqanku cartata kamachikuqman entregarqanku, Pablotapas qayllanmanmi pusaykurqanku. 34 Kamachikuqtaq chay cartata leespa tapukurqan maymantachus Pablo kasqanta, jinan yacharqan Cilicia provinciamanta+ kasqanta. 35 Jinaspa Pablota nirqan: “Juchachaqniyki runakuna chayamuqtinñan lliuta uyarisayki”,+ nispa. Chaymantataq kamachikurqan Herodespa kamachikunan wasipi presochasqata jap’inankupaq.