Gálatas
3 ¡Yau mana yuyayniyoq Galacia llaqta runakuna! ¿Pitaq qankunatari mana allin ruwayman aysashasunkichis?+ Qankunaqa allin yachachisqamá riki karqankichis Jesucristo k’aspipi clavasqa kasqanmantaqa,+ rikushawaqchispas karqan jinatamá riki chaytaqa yacharqankichis. 2 Kayllatan tapuyta munaykichis:* ¿Imaynapitaq espiritutari chaskirqankichis? ¿Kamachikuy simiq nisqanman jina ruwasqaykichisraykuchu icha uyarisqaykichispi iñisqaykichisraykuchu?+ 3 ¿Imaynapitaq Diospa espiritunman jina puriyta qallarishaspari aychaq munayninman jina purishankichis?+ ¿Chhaynaniraq mana yuyayniyoqchu kankichis? 4 ¿Yanqapaqchu imaymanakunawan ñak’arirqankichis? Manapunichá yanqapaqqa ñak’ariwaqchischu karqan. 5 Espirituta qoqniykichisqa, milagrokunatapas* qankuna ukhupi ruwaqqa,+ ¿kamachikuy simiq nisqanman jina ruwasqaykichisraykuchu chaykunata ruwan icha uyarisqaykichispi iñisqaykichisraykuchu? 6 Abrahanpas “Jehová* Diospi iñisqanraykun chaninpaq jap’isqa karqan”+ ¿riki?
7 Yachasqaykichis jina, iñiqkunan Abrahanpa wawankunaqa kanku.+ 8 Simin qelqapin Diosqa willarqanña waj nacionkunamanta runakunata iñisqankurayku chaninpaq jap’inanmanta, chaymi ñaupaqmantaña Abrahanman willarqan allin willakuykunata: “Qanraykun llapa nacionkuna bendecisqa kanqa”,+ nispa. 9 Abrahanqa iñisqanraykun bendecisqa karqan, pay jinan kunanpas iñiqkunaqa bendecisqa kashanku.+
10 Kamachikuy simipi confiaqkunaqa ñakasqan kashanku, Diospa simin qelqapipunin nishan: “Ñakasqa kachun pipas kamachikuy simi qelqa k’uyuq llapa nisqanta mana junt’aqqa”,+ nispa. 11 Chaymantapas Diospa simin qelqapiqa nillantaqmi: “Chanin runaqa iñisqanraykun kausanqa”,+ nispa. Chhaynaqa manan kamachikuy simiraykuchu Diosqa pitapas chaninpaq jap’inqa.+ 12 Kamachikuy simiqa manan iñiypichu saphichasqa kashan, chaymi qelqasqa kashan: “Pipas chaykunata kasukuqqa chay kamachikuyraykun kausanqa”,+ nisqa. 13 Chaymantapas qelqasqan kashallantaq: “Ñakasqa kachun pipas k’aspipi warkusqa kaqqa”,+ nisqa. Kamachikuy simiq chay ñakayninmantan Cristoqa librawarqanchis+ noqanchispa rantinchispi ñakasqa kaspa, chhaynapitaq rantikapuwarqanchis.+ 14 Chayqa karqan Abrahanman prometesqa bendición Jesucristowan llapa nacionkunaman chayananpaqmi,+ chhaynapi noqanchispas iñisqanchisrayku Diospa prometesqan espirituta chaskinanchispaq.+
15 Wayqeykuna,* imaynan firmasqa acuerdotaqa mana pipas mana valeqman tukuchinmanchu ni chayman yapaytapas atinmanchu, 16 chhaynallataqmi Diospa promesa ruwasqanpas. Paymi Abrahanman juj promesata ruwarqan mirayninmanta rimapayaspa.+ Ichaqa manan “mirayniykikuna” nirqanchu askhamantapas rimashanman jinata, aswanpas “mirayniyki” nirqanmi, chaywanqa jujllamantan rimasharqan, chay mirayqa Criston.+ 17 Manan kamachikuy simiqa atinmanchu Diospa acuerdo ruwasqanta yanqayachiytaqa ni promesa ruwasqanta chinkachiytapas, chaymantapas tawa pachaj kinsa chunka wata qhepatañan kamachikuy simiqa chayamurqan.+ 18 Kamachikuy simiwanchus Diospa qosqan herencia kanman karqan chayqa, manachá Diospa promesa ruwasqanraykuchu chay herenciaqa kanman karqan; ichaqa sumaq sonqo kayninpin Diosqa promesa ruwasqanrayku Abrahanman herenciata qorqan.+
19 Chhaynaqa, ¿imapaqtaq kamachikuy simiri karqan? Chayqa karqan jucha sut’iman orqosqa kananpaqmi,+ pimantachus promesata ruwakurqan chay miray chayamunankamallataqmi kananpas karqan,+ chay kamachikuytaqa Diosmi angelkunawan allipunachiq Moisesman willachirqan,+ Moisestaq runakunaman willarqan.+ 20 Ichaqa jujllachus promesa ruwaq kanman chayqa, manan necesitakunmanchu allipunachiqtaqa; chhaynan Dioswanpas, pay sapallanmi promesa ruwaqqa karqan. 21 Chhaynaqa, ¿Diospa promesa ruwasqan contrapichu kashan kamachikuy simi? ¡Manan! Kamachikuy simichus kausay qoq kanman karqan chayqa, chay kamachikuy simiraykuchá runakunaqa chaninpaq jap’isqa kasunman karqan. 22 Ichaqa Diospa simin qelqan lliuta juchaman jap’iykachirqan, chhaynapi prometesqa bendicionqa Jesucristopi iñiqkunaman qosqa kananpaq; arí, chay bendicionta chaskinapaqqa Jesucristopin iñina.
23 Manaraq iñiy chayamushaqtinmi ichaqa kamachikuy simiq cuidasqan kasharqanchis, chayman jap’iykachisqataqmi kasharqanchispas, chay iñiy chayamunanta suyakuspa.+ 24 Chhaynapin kamachikuy simiqa Cristoman pusaq uywaqninchis kapurqan,+ chhaynapi iñisqanchisrayku chaninpaq jap’isqa kananchispaq.+ 25 Kunanqa ñataq iñiy chayamunña chayqa,+ manañan kamachikuy simiq uywasqanchu kashanchis.+
26 Qankunaqa Cristo Jesuspi iñisqaykichisraykun+ llapaykichis Diospa wawankuna kankichis.+ 27 Chaymantapas qankuna Cristopi bautizasqa kaqkunaqa paywan p’achasqan kashankichis.+ 28 Qankunaqa judío runaña griego runaña* kankichis chaypas,+ kamachiña libreña kankichis chaypas,+ qhariña warmiña kankichis chaypas,+ jujllan kankichis Cristo Jesuswan jujllachasqa kasqaykichisrayku.+ 29 Cristoqchus kankichis chayqa, Abrahanpa mirayninpunin kankichis,+ prometesqa herenciata chaskiqkunataqmi kankichispas.+