Éxodo
2 Chay tiempopin Leví ayllumanta juj runa ayllumasin warmiwan casarakurqan.+ 2 Chay warmin onqoq kapuspa juj qhari wawata onqokurqan. Munayllaña kasqanta rikuspataq kinsa killata pakarqan.+ 3 Manaña pakayta atispan+ chay warmiqa papiro* canastata jap’ispa breawan llut’arqan, jinaspa chay ukhuman wawanta churaykurqan, chaytataq Nilo mayu patapi wiñaq t’otora-t’otora chaupiman churaykurqan. 4 Chay wawaq pananqa+ karullamantan qhawamusharqan imachus wawawan pasanqa chayta yachananpaq.
5 Faraonpa* ususinmi Nilo mayuta bañakuq jaykurqan. Kamachin warmikunapas chaypin mayu patapi purisharqanku. Chayllamanmi payqa papiro chaupipi rikurqan juj canastata, jinan jujnin kamachinta kacharqan chay canastata orqomunanpaq.+ 6 Chay canastata kichaspa qhawaykuqtinmi chaypi juj wawa waqaykushasqa. Jinan payqa nirqan: “Kayqa hebreo runakunaq wawanmá riki”, nispa. Ichaqa khuyapayarqanmi. 7 Chay wawaq panantaq faraonpa ususinta nirqan: “¿Maskhampusaykichu juj hebreo warmita kay wawata uywapunasuykipaq?”,* nispa. 8 Jinan faraonpa ususinqa nirqan: “Arí, phaway maskharampuway”, nispa. Chaymi chay sipaschaqa chay ratupacha chay wawaq maman maskhaq pasarqan.+ 9 Chay warmitan faraonpa ususinqa nirqan: “Kay wawata apaspa uywampuway, pagapusaykin”, nispa. Jinan chay warmiqa chay wawata apaspa uywampurqan. 10 Chay wawa wiñaruqtintaq faraonpa ususinman entregapurqan, jinan payqa wawanta jina uywakapurqan,+ suticharqantaq Moisés nispa. Payqa nirqanmi: “Unumantan orqoni”, nispa.+
11 Qhepamanmi Moisesqa yuyayniyoq runaña kaspa hebreo wayqenkuna qhawaq rirqan. Chaypin rikurqan sasa llank’aykunawan ñak’arishasqankuta,+ rikullarqantaqmi juj hebreo runata Egipto runa maqashaqtapas. 12 Jinan Moisesqa lliu ladota qhawarikurqan, mana pitapas rikuspataq chay Egipto runata wañuchirqan, jinaspa aqopi p’amparqan.+
13 Qhepantin p’unchay lloqsimuspan Moisesqa rikurqan iskay hebreo runakuna maqanakushaqta. Chaymi payqa juchayoq runata nirqan: “¿Imaraykun wayqeykita maqashanki?”,+ nispa. 14 Chay runataq nirqan: “¿Pitaq qantari umalliyku kanaykipaq juezniyku kanaykipaqpas churarqasunki? ¿Egipto runata jinachu wañuchiyta munashawanki?”,+ nispa. Chayta uyarispan Moisesqa mancharikurqan, jinaspa nirqan: “¡Ñapaschá yacharunkuña imachus ruwasqayta!”, nispa.
15 Faraonmi yacharurqan Moisespa imachus ruwasqanta, chaymi faraonqa Moisesta wañuchiyta munarqan. Chayta yachaspan Moisesqa Madián+ runakunaq tiyasqan jallp’a ladoman ayqekurqan. Chayman chayaspataq juj pozoq ladonpi tiyaykurqan. 16 Madián runakunaq sacerdotenpa+ ususinkunan jamurqanku uywa ujanakunaman unu junt’achiq, chhaynapi taytankuq ovejankunaman unuta ujachinankupaq, paykunaqa qanchismi karqanku. 17 Ichaqa imaynatachus ruwallaqkupuni jinatan michiqkuna jamuspanku chay sipaskunata qatirirqanku. Chayta rikuspan Moisesqa sayarispa paykunata yanaparqan, ovejakunamanpas unuta ujachirqan. 18 Chay sipaskuna wasinkuman kutipuqtinkun taytanku Reuelqa*+ admirasqa nirqan: “¿Imaynapitaq kunan p’unchayri ratulla kutiramunkichis?”, nispa. 19 Jinan paykunaqa nirqanku: “Juj Egipto runan+ uywa michiqkunamanta defiendewanku, unuta iman orqompuwanku ovejakuna ujananpaq”, nispa. 20 Paytaq ususinkunata nirqan: “¿Maytaq payri? ¿Imaraykun saqeykamunkichis? Wajamuychis noqanchiswan kuska mijunanpaq”, nispa. 21 Chaymantataq Reuelqa Moisesta nirqan paywan qhepakunanpaq, Moisestaq qhepakurqan, jinan Reuelqa ususin Ziporawan+ casarachirqan. 22 Tiempowanmi Ziporaqa juj qhari wawata onqokurqan, chay wawatan Moisesqa suticharqan Guersom*+ nispa. Nirqanmi: “Waj llaqtapin forastero kani”,+ nispa.
23 Tiempowanmi Egipto reyqa wañupurqan,+ chaywanpas Israel runakunaqa kaqllan esclavo kasharqanku, chaymi waqashallarqanku sufrishallarqanku. Astawan-astawanraqmi cheqaq Diostapas wajakurqanku yanapananpaq.+ 24 Diostaq uyarirqan paykunata,+ yuyarirqantaqmi Abrahanwan, Isaacwan, Jacobwan ima rimanakusqantapas.+ 25 Chaymi Diosqa Israel runakunaq imaynachus tarikusqankuta rikuspa mayta paykunata khuyapayarqan.