Éxodo

8 Chaymantan Jehová Diosqa Moisesta nirqan: “Faraonpa* kasqanman rispa nimuy, Jehová Diosmi nin: Llaqtayta kachariy adorawananpaq.+ 2 Manachus kacharinki chayqa, lliu Egiptotan k’ayrakunawan junt’achisaq.+ 3 Nilo mayun k’ayrakunawan junt’a kanqa. Chay k’ayrakunan lloqsimuspa wasiykiman, puñunayki wasiman, puñunayki patakunaman, serviqniykikunaq wasinman, hornoykiman, masa ruwanaykiman, lliu llaqtaykiman ima junt’aykunqa.+ 4 Chay k’ayrakunan qanman, kamachiykikunaman, llaqtayki runakunamanwan saltaykusunkichis, nispa”.

5 Qhepamanmi Jehová Diosqa Moisesta nillarqantaq: “Aaronta niy varanta mayukunaman, yarqhakunaman,* qochakunamanwan jaywarinanpaq, chhaynapi Egiptoman k’ayrakuna junt’ananpaq”, nispa. 6 Jinan Aaronqa varanta jaywarirqan Egiptopi unukunaman, chaymantan k’ayrakuna lloqsimuyta qallarirqan, jinaspa lliu Egiptoman junt’aykurqan. 7 Egiptopi watuq sacerdotekunapas layqa ruwaykunata ruwaspan k’ayrakunata Egiptoman lloqsichimullarqankutaq.+ 8 Chaymantan faraonqa Moisesta Aarontawan wajachimuspa nirqan: “Jehovata valekapuwayku llaqtaymanta noqamantawan kay k’ayrakunata chinkachinanpaq.+ Noqaqa kacharisaqmi Israel runakunata Jehovaman sacrificiokunata jaywamunankupaq”, nispa. 9 Jinan Moisesqa nirqan: “Qan niway jayk’aq Diosmanta mañapunaypaq, chhaynapi qanpas, kamachiykikunapas, llaqtaykipas, wasiykikunapas k’ayrakunamanta libre kanaykichispaq. K’ayrakunaqa Nilo mayullapiñan qhepanqa”, nispa. 10 Faraontaq nirqan: “Paqarin”, nispa. Jinan Moisesqa nillarqantaq: “Nisqaykiman jinan kanqa, chhaynapin yachanki Jehová Diosniyku jinaqa mana ima diospas kasqanta.+ 11 Wasiykipipas, kamachiykikunaq wasinpipas, llaqtaykipipas manañan k’ayrakunaqa kanqachu. Nilo mayullapiñan kanqa”,+ nispa.

12 Chaymantataq Moiseswan Aaronwanqa faraonpa ñaupanmanta lloqsimpurqanku. Jinamantaq Moisesqa Jehová Diosta rogakurqan faraonman kachamusqan k’ayrakunata chinkachipunanpaq.+ 13 Jehová Diosqa Moisespa mañakusqanman jinan ruwarqan, jinan k’ayrakunaqa wañuyta qallarirqan wasikunapi, patiokunapi, campokunapi ima. 14 Egipto runakunaqa askhatan monton-montonta juñurqanku wañusqa k’ayrakunata, chaywanmi Egiptoqa millayta asnarirqan. 15 Manaña chaykuna kapuqtintaq faraonqa jujmanta sonqonta k’ulluyachirqan.+ Jehová Diospa nisqanman jinan mana kasurqanchu Moisesta Aarontawan.

16 Jinan Jehová Diosqa Moisesta nirqan: “Aaronta niy varanta oqarispa pampapi ñut’u jallp’ata waqtananpaq. Chay ñut’u jallp’an ch’uspiman tukuspa Egiptoman junt’aykunqa”, nispa. 17 Chaytan paykunaqa ruwarqanku. Aaronmi varanta oqarispa pampata waqtarqan, jinan ñut’u jallp’aqa ch’uspiman tukurqan, jinaspa runakunaman uywakunamanwan junt’aykuspa kanirqan. Egiptopi llapa ñut’u jallp’an ch’uspiman tukurqan.+ 18 Egiptopi watuq sacerdotekunapas layqa ruwaykunata ruwaspan kaqta ruwayta munarqanku,+ ichaqa manan atirqankuchu. Chay ch’uspikunaqa runakunaman uywakunamanwan junt’aykuspan sinchitapuni kanirqan. 19 Jinan chay watuq sacerdotekunaqa faraonta nirqanku: “Kayqa Diospa atiyninmi”,*+ nispa. Faraonpa sonqonmi ichaqa rumiyasqalla kasharqan, Jehová Diospa nisqanman jinan mana kasukurqanchu.

20 Jehová Diosmi Moisesta nirqan: “Paqarin tutallamanta jatarispa faraonwan tupaq rinki, payqa mayutan rinqa. Paytan ninki: Jehová Diosmi nin: Llaqtayta kachariy adorawananpaq. 21 Manachus kacharinki chayqa tankayllukunatan* kachamusayki qanman, serviqniykikunaman, llaqtayki runakunaman, wasiykikunamanwan. Egipto runakunaq tiyasqan wasikunapi lliu pampakunapi imaraqmi tankayllukunaqa junt’a kanqa. 22 Chay p’unchayqa manan llaqtaypa tiyasqan Gosén jallp’apiqa ima tankayllupas kanqachu.+ Chhaynapin yachanki noqa Jehová Diosqa kay jallp’api kashasqayta.+ 23 Llaqtaytan t’aqasaq llaqtaykimanta, chay señalqa paqarinmi kanqa, nispa”.

24 Chay nisqanman jinan Jehová Diosqa ruwarqan. Faraonpa wasinman, kamachinkunaq wasinman iman phuyuta jinaraq tankayllukunata junt’aykachirqan. Llapa Egiptomanmi tankayllukunaqa junt’aykurqan, lliutan ñak’arichirqan.+ 25 Jinan faraonqa Moisesta Aarontawan wajachimuspa nirqan: “Riychis, Diosniykichisman sacrificiokunata jaywamuychis, ichaqa kay Egipto jallp’apin chayta ruwankichis”, nispa. 26 Moisesmi ichaqa nirqan: “Manan chaytaqa ruwaykumanchu, Egipto runakunachá phiñakunkuman Jehová Diosniykuman ima sacrificiokunachus jaywasqaykumanta.+ Paykunaq ñaupankupi chay sacrificiokunata jaywaykuman chayqa, rumiwan ch’aqespachá wañuchiwankuman. 27 Chaymi kinsa p’unchay puriyta ch’inneqman risaqku, chaypin Jehová Diosniykuman sacrificiokunata jaywamusaqku paypa kamachiwasqankuman jina”,+ nispa.

28 Jinan faraonqa nirqan: “Chhaynaqa rinkichischá riki Jehová Diosniykichisman ch’inneqpi sacrificiota jaywaq. Ichaqa aman sinchi karutaqa rinkichischu. Mañapuwaychisyá Diosniykichismanta+ kay tankayllukuna chinkananpaq”, nispa. 29 Moisestaq nirqan: “Lloqsispay jinan Jehová Diosmanta mañakusaq tankayllukunata paqarin chinkachinanpaq, chhaynapi manaña qantapas, serviqniykikunatapas ni llaqtayki runakunatapas kaninanpaq. Ichaqa chaytaq jujmanta engañawankikuman,* jinaspa mana kachariwankikumanchu Jehová Diosman sacrificiokuna jaywaq rinaykupaq”,+ nispa. 30 Chaymantataq Moisesqa faraonpa ñaupanmanta lloqsimuspa Jehová Diosmanta mañakurqan.+ 31 Jehová Diosqa Moisespa mañakusqanman jinan ruwarqan. Llapa tankayllukunatan chinkachirqan, manan jujpas Egiptopiqa qheparqanchu. Chhaynapin faraonpas, serviqninkunapas, llaqtan runakunapas tankayllukunamanta libre kapurqanku. 32 Faraonmi ichaqa jujmanta sonqonta rumiyachirqan, jinaspa mana Israel runakunata kacharirqanchu.