Éxodo

22 ”Pipas torota otaq ovejata suwakuspa ñak’anqapas vendenqapas chayqa, toromantan pisqa torota qopunqa, ovejamantataq tawa ovejata qopunqa.+

2 ”(Juj suwachus tutapi wasita jaykushaqta jap’ichikunqa,+ wañuchisqataqchus kanman chayqa, manan chay wañuchiqqa juchayoqchu kanqa. 3 Ichaqa p’unchayamuqtinñachus chay pasanman chayqa, juchayoqmi kanqa pipas wañuchiqqa).

”Suwaqa imachus suwakusqanmantan llapanta pagapunqa. Manachus imanpas kanqa chayqa, pay kikinmi vendesqa kanqa pagapunanpaq. 4 Ichaqa kausashaqtachus uywata suwaq makinpi pipas tarinman chayqa, juj uywamantan jujtawan dueñonman qopunqa, toroña, asnoña, ovejaña kanman chaypas.

5 ”Pipas uywanta michishanman pastonpi otaq uvas chajranpi, uywankunatataq jujpa chajranman jaykuchinman chayqa, chajranpa allin kaq rurunta otaq uvas chajranpa allin kaq ruruntan dueñoman qopunqa.

6 ”Pipas ninata jap’iykachinman, ninataq kiskakunaman chayaspa trigota* ruphanman rutusqatapas sayashaqtapas otaq llapa chajrantintapas chayqa, chay nina jap’ichiq runan llapa ruphasqanmanta kaqta qopunqa.

7 ”Pipas runamasinman qolqentapas imantapas waqaychapunanpaq jap’ichikunman, chaytataq chay runaq wasinmanta suwa apapunman, suwakuq runataq jap’isqa kanman chayqa, suwakusqanmanta juj kutitawanmi payqa dueñoman qopunqa.+ 8 Manachus suwata jap’inqaku chayqa, wasiyoq runan juezkunaq ñaupanman rinqa,+ chhaynapi paychus runamasinpa kaqninta pakarqan icha manachus chayta noqa cheqaq Dios sut’iman orqonaypaq. 9 Pipas torotapas, asnotapas, ovejatapas, p’achatapas imatapas piqpa makinpipas rikuspa ninman: Kayqa noqaqmi, nispa chayqa, iskayninkun chay quejata noqa cheqaq Diospa ñaupayman apamunqaku.+ Noqan nisaq mayqenchus juchayoq chayta, jinan juchayoq runaqa apasqanmanta jujtawan runamasinman qopunqa.+

10 ”Pipas runamasinta valekunman asnontapas, torontapas, ovejantapas ima uywantapas qhawaripunanpaq, chay uywataqchus wañunman otaq k’irisqa kanman, mana piqpa rikusqanpas apapunkuman chayqa, 11 uywa qhawariq runan noqa Jehová Diospa ñaupaypi juranqa: Manan noqaqa runamasiypa uywantaqa tupaykunichu, nispa. Dueñoqa chaskinqan chay juramentota, manataqmi imatapas pagachikunqachu.+ 12 Ichaqa, chay cuidaq runachus suwachikurqan chayqa, paymi dueñoman pagapunqa. 13 Phiña animalchus chay uywata jap’irqan chayqa, puchuntan apamunqa chayta yachakunanpaq. Chhaynapunichus karqan chayqa, manañan imatapas paganqachu chay uywamantaqa.

14 ”Pipas runamasinpa uywanta mañakunman, chay uywataq dueñoq mana rikushasqan k’irisqa kanman otaq wañunmanpas chayqa, mañakuq runan chay uywamanta pagapunqa. 15 Dueñochus chaypi kasharqan chayqa, mañakuqqa manan ima pagotapas qonqachu. Uywachus qolqewan fletasqa karqan chayqa, chay qolqen pago kapunqa.

16 ”Juj runachus doncella sipasta* engañaspa paywan puñunman chayqa, chay runan chay sipasmanta jayk’achus pagananta paganqa, jinaspa paywan casarakapunqa.+ 17 Chay sipaspa papanña manapuni munanqachu ususin chay runawan casarakunanta chaypas, chay runaqa paganqapunin jayk’atachus casarakunapaq juj sipasmanta pagakun chayta.

18 ”Layqa warmitaqa wañuchinkichismi.+

19 ”Pipas juj animalwan t’inkinakuqtaqa wañuchinkichismi.+

20 ”Pipas noqa Jehová Diosman sacrificio jaywananta yanqa dioskunaman jaywanqa chayqa, wañuchisqan kanqa.+

21 ”Aman jayk’aqpas ñak’arichinkichischu forastero runataqa.+ Qankunapas forastero jinan tiyamurqankichis Egiptopi.+

22 ”Aman jayk’aqpas sufrichinkichischu viudatapas ni mana taytayoq wawatapas.*+ 23 Sichus imaynallapipas sufrichinkichis, paykunataqchus wajakamuwanqaku chayqa, noqaqa uyarimusaqmi paykunata.+ 24 Jinaspan sinchita phiñakuspa llapaykichista espadawan wañuchisaykichis. Jinan warmiykichiskunaqa viuda kapunqaku, wawaykichiskunapas mana taytayoq kapunqaku.

25 ”Qolqetachus mañanki llaqtaypi kaq wajcha* runaman, llaqtamasiyki runaman chayqa, aman prestamota qoq runakuna jinachu paypaqqa kanki. Aman interestapas cobrankichu.+

26 ”Juj runachus qolqe mañasqaykimanta p’achanta prendapi saqesunki chayqa,+ manaraq inti jaykupushaqtinmi kutichipunki. 27 Chayllataq kanman cuerponta q’oñichiq p’acha chayqa, ¿imawantaq churakunman puñunanpaqri?+ Chay runachus wajakamuwanqa chayqa, noqaqa uyarimusaqmi. Noqaqa khuyapayakuq Diosmi kani.+

28 ”Aman jayk’aqpas ñakawankichu* noqa Diosniykita ni llaqtaykipi mayqen umallitapas.+

29 ”Ama iskayaspan apamuwanki askha mijuy oqarisqaykimanta ofrendaykita, askha vinoykimanta ofrendaykita, askha aceiteykimanta ofrendaykitapas.+ Phiwi* churiykitaqa noqamanmi qopuwanki.+ 30 Ñaupaq wachay toroykitapas ovejaykitapas qopuwallankitaqmi.+ Qanchis p’unchaymi mamanwan kanqa, pusaq kaq p’unchaytaq noqaman qopuwanki.+

31 ”Qankunaqa allintan rikuchinaykichis ch’uya llaqtay kasqaykichista.+ Campopichus tarinkichis phiña animalpa puchun aychata chayqa, aman chay aychataqa mijunkichischu+ aswanmi alqoman qarapunkichis.