Éxodo
25 Jehová Diosmi Moisesta nirqan: 2 “Israel runakunata niy ofrendakunata apamuwanankupaq. Llapa tukuy sonqowan apamuwasqankutan chaskinkichis.+ 3 Kay ofrendakunatan chaskinkichis: qorita,+ qolqeta,+ cobreta,+ 4 azul q’aytuta, azulniraq puka q’aytuta, k’anchaq puka q’aytuta, sumaq lino q’aytuta, cabra pelota, 5 puka teñisqa oveja qarata, foca qarata, acacia sach’a maderakunata,+ 6 mecheropaq* aceiteta,+ bálsamo aceitetawan; chay bálsamo aceitewanmi jawina aceiteta,+ sumaq q’apaq inciensotapas+ ruwakunqa. 7 Chaskillankichistaqmi ónice rumikunata, juj chhayna rumikunatapas chayta uma sacerdoteq unkunman*+ qhasqo* ch’uspanmanwan+ k’askachinapaq. 8 Noqata adorawanaykichispaqmi ch’uya karpata ruwapuwankichis, chaypin noqaqa qankuna chaupipi tiyasaq.+ 9 Chay karpatapas chay karpapi tukuy imatapas, imaynatachus rikuchisayki chay kikillantan ruwankichis.+
10 ”Acacia sach’a maderamantan juj arcata* ruwankichis. Largonmi kanqa iskay codo* kuskan, anchontaq kanqa juj codo kuskan, altonpas juj codo kuskallantaqmi kanqa.+ 11 Chaytan ukhunta jawantawan ch’uya qoriwan forranki.+ Cantonkunatapas qoriwanmi muyuchinki.+ 12 Ruwallankitaqmi tawa qori ninrikunatapas, chaykunatan churanki ruwasqayki arcaq tawantin chakinpa jawa qhatanman. Iskay ninritan juj ladonman churanki, iskaytataq jujnin ladonman. 13 Chaymantapas acacia sach’amantan k’aspikunata ruwanki, chaytan qoriwan forranki.+ 14 Chay k’aspikunatataq arcapi k’askasqa ninrikunaman suskhuchinki, chaykunawan arcata wantunankupaq. 15 Chay k’aspikunaqa arcaq ninrillanpin kanqa, aman orqonkichischu.+ 16 Chay arcapin churanki kamachikuykuna qelqasqay p’alta rumikunata.+
17 ”Ruwallankitaqmi arcaq tapantapas, chaytaqa ch’uya qorimantan ruwanki. Largonmi kanqa iskay codo kuskan, anchontaq kanqa juj codo kuskan.+ 18 Chay tapaq iskaynin cantonpin qorimanta iskay querubín angelkunata ruwanki, chay querubinkunatan formanki martillowan takaspa.+ 19 Juj querubintan tapaq jujnin cantonman churanki, jujnintataq juj kaq cantonman. 20 Chay querubinkunaqa chimpa-chimpapuran kanqaku arcaq tapanman k’umushaq. Rafrankunataq wichayman oqarisqa kanqa, arcaq tapanta pakaykuq jina.+ 21 Chay tapatan+ churanki ruwasqayki arca pataman. Chay arca ukhumantaq churanki kamachikuykuna qelqasqay p’alta rumikunata. 22 Chay tapa patamantan noqa rimapayasayki.+ Rimanakuyniy arca patapin kanqa iskaynin querubinkuna. Chay querubinkuna chaupimantan willasayki imatachus Israel runakunaman kamachinki chayta.
23 ”Acacia sach’a maderamantan juj mesata+ ruwallankitaq. Largonmi kanqa iskay codo, anchontaq kanqa juj codo, altontaq kanqa juj codo kuskan.+ 24 Chay mesatan ch’uya qoriwan forranki, canto patantataq qoriwan muyuchinki. 25 Canto patantan kanchachanki maki ancho sayayta,* chaytapas qoriwanmi muyuchillankitaq. 26 Ruwallankitaqmi tawa qori ninrikunatapas, chaykunatataq churanki mesaq tawantin esquinanman, maypichus chakinkuna kashan chayman. 27 Chay ninrikunaqa mesaq canto patanpa uranpin kanqa, chayninta mesa apana k’aspikunata suskhuchinapaq. 28 Acacia sach’amantan chay k’aspikunataqa ruwanki, jinaspan qoriwan forranki, chaykunawanmi mesata apanqaku.
29 ”Chaymantapas ch’uya qorimantan+ ruwanki chay mesapaq serviciokunata: platokunata, copakunata, vino ofrenda jich’anapaq jarrakunata, jatun p’ukukunatawan. 30 Ñaupaypi kaq mesamanmi mana faltayta churanki noqapaq t’aqasqa t’antata.+
31 ”Ch’uya qorimantan juj candelerota+ ruwallankitaq. Chay candeleroqa martillowan formasqan kanqa. Tiyananpas, chaupi k’aspinpas, k’allmankunapas, t’ika mujmunkunapas,* t’ikankunapas, phanchisqankunapas jujllamantan kanqa.+ 32 Chaupi k’aspinmantan soqta k’allmakuna lloqsimunqa; juj ladonmanmi kinsa k’allma lloqsinqa, juj ladonmanpas kinsa k’allmallataqmi lloqsinqa. 33 Sapanka k’allmapin kanqa kinsa t’ika mujmukuna almendra t’ikakuna jina, t’ikakunantin phanchikunantin ima. Sapanka k’allmatan chhaynata ruwanki. Soqtantin k’allmakunan chhaynakama kanqa. 34 Chay candeleroq chaupi k’aspinpin kallanqataq tawa t’ika mujmukuna almendra t’ikakuna jina, t’ikakunantin phanchikunantin ima. 35 Sapanka iskay k’allmaq uranpin kanqa juj t’ika. Ñaupaq kaq iskay k’allmaq uranpin kanqa juj t’ika, iskay kaq iskay k’allmaq uranpipas juj t’ikan kanqa, kinsa kaq iskay k’allmaq uranpipas juj t’ikan kallanqataq. Chhaynan kanqa chaupi k’aspimanta lloqsimuq soqtantin k’allmakunawan. 36 Chay candeleroq chaupi k’aspinpas, k’allmankunapas, k’allmanpi t’ikakunapas jujllan kanqa, ch’uya qorimanta ruwasqa, martillowan formasqa.+ 37 Chay candeleromanmi churanki qanchis mecherokunata, chaytan jap’ichinki k’anchananpaq.+ 38 Mecha jap’inakuna, sansa apana p’ukukunapas ch’uya qorimantan kanqa.+ 39 Kinsa chunka tawayoq kilo* ch’uya qorimantan ruwanki candelerota tukuy imaymanankunatawan. 40 Orqopi rikuchisqayman jinan chaykunataqa ruwanki.+