1 Reyes

14 Chay tiempopin Jeroboanpa churin Abiasqa onqorapurqan. 2 Chaymi Jeroboanqa esposanta nirqan: “Ama jinachu kay, phaway Siló llaqtata riruy, profeta Aiyaq kasqanman. Ichaqa juj p’achawan churarakamuy, chhaynapi esposay kasqaykita mana pipas reparananpaq. Profeta Aiyan niwarqan kay llaqtapi rey kanaypaq.+ 3 Chay profetaman aparikuy tortakunata, chunka t’antata, juj jarra mieltawan. Paymi nimusunki imachus wawanchiswan pasanqa chayta”, nispa.

4 Jinan Jeroboanpa esposanqa qosanpa nisqanman jina ruwarqan, jinaspa Siló+ llaqtaman rispa profeta Aiyaq wasinman chayarqan. Profeta Aiyaqa sinchi kuraqñan karqan, chaymi ñawinqa mana rikurqanñachu.

5 Jehová Diosmi ichaqa Aiyata nirqanña: “Jeroboanpa esposanmi jamushan, onqosqa wawanwan imachus pasanqa chayta tapukuqmi jamushan. Noqan nisayki imachus ninaykita. Payqa juj p’achawan churarukuspan jamushan”, nispa.

6 Wasinman qayllaykamushasqanta reparaspataq Aiyaqa nirqan: “Jaykumuy Jeroboanpa esposan. ¿Imaraykun juj p’achawan churarukuspa jamushanki? Diosmi niwan qanman mana allin willakuyta willanaypaq. 7 Phaway Jeroboanman willamuy Israelpa Diosnin Jehová Diospa nisqanta, Diosmi payta nin: Noqan llaqtamasiykikuna ukhumanta ajllarqayki Israel llaqtayta umallinaykipaq,+ 8 Davidpa familianmanta kamachikuyninta qechuspaytaq qanman qopurqayki.+ Qanmi ichaqa mana kamachiy David jinachu karqanki, payqa kamachikuyniykunatan kasukurqan, munasqayman jinan lliutapas tukuy sonqomanta ruwarqan.+ 9 Qanpa ñaupaykita kaq reykunamantapas aswan mana allintaraqmi qanqa ruwarqanki. Metalmanta idolokunatan ruwakurqanki diosniyki kananpaq, chaykunata ruwaspan noqata phiñachiwarqanki,+ jinaspa saqerpariwarqanki.+ 10 Chaymi familiaykita ñak’arichisaq. Familiaykimanta kaq qharikunatan* lliuta Israelmanta chinkachisaq, pisichasqakunatapas pisi kallpakunatapas manan khuyapayasaqchu. Imaynan uywa akatapas lliuta pichakun chhaynatan familiaykitapas lliuta pichasaq, manan pipas qhepanqachu.+ 11 Llaqtapi wañuq familiaykitaqa alqokunan mijupunqaku, campopi wañuq familiaykitataq phalaq animalkuna mijupunqaku. Noqa Jehová Diosmi chayta nini, chaykunaqa junt’akunqapunin, nispa.

12 ”Kunanqa wasiykiman kutipuy, llaqtaykiman chayaqtiyki jinan wawaykiqa wañupunqa. 13 Jinan llapa Israel runakuna paymanta waqanqaku, jinaspataq p’ampapunqaku. Jeroboanpa familiankunamantaqa chay wawaykiq sonqollanpin Jehová Diosqa ima allintapas tarirqan, chaymi paylla Jeroboanpa familianmantaqa sepulturapi p’ampasqa kanqa. 14 Jehová Diosmi Israel contra juj reyta jatarichinqa, chay reymi Jeroboanpa familianta lliuta chinkachinqa.+ Chay chinkachinan p’unchayqa ñan kaypiña kashan. 15 Jehová Diosmi Israel llaqtata chhafchinqa, imaynan aytikuq unupas carrizota* chhafchin jinata. Israel runakunaqa yupaychanankupaq sayashaq k’ullukunata*+ ruwakuspankun Jehová Diosta phiñachirqanku, chaymi Diosqa ñaupa taytankuman qosqan jallp’amanta paykunata lliuta wijch’unqa,+ jinaspa Éufrates mayuq waj ladonkamaraq ch’eqechinqa.+ 16 Israel runakunata Jeroboán juchallichisqanrayku, paypas juchallikusqanrayku iman Diosqa Israel runakunata saqepunqa”,+ nispa.

17 Chaymantataq Jeroboanpa esposanqa ripurqan, jinaspa Tirzá llaqtaman chayarqan. Wasin punkuman saruykuqtintaq wawanqa wañupurqan. 18 Jinan chay wawataqa p’ampapurqanku, llapa Israel runakunataq paymanta waqaykurqanku. Chhaynapin profeta Aiyawan Jehová Diospa willachisqanqa junt’akurqan.

19 Jeroboanpa guerrapi maqanakusqankunapas,+ imayna kamachikusqanpas, wakin ruwasqankunapas Israel reykunamanta willaq libropin qelqasqa kashan. 20 Jeroboanqa iskay chunka iskayniyoq watan Israelpi kamachirqan. Chaymantataq ñaupa taytankuna jina wañukapurqan.+ Chay qhepamantaq Jeroboanpa churin Nadab rey kapurqan.+

21 Judá ayllupitaq Salomonpa churin Rehoboam rey nombrasqa karqan. Payqa tawa chunka jujniyoq watanpi kashaspan kamachikuyta qallarirqan, chunka qanchisniyoq watataqmi Jerusalenmanta kamachikurqan. Chay llaqtatan Jehová Diosqa llapa ayllukunamanta ajllakurqan+ sutinta jatunchananpaq.+ Rehoboampa mamanmi karqan Namá, payqa Anmón jallp’amantan karqan.+ 22 Judá ayllu runakunaqa Jehová Diospa cheqnikusqan ruwaykunatan ruwarqanku,+ chhaynata juchallikuspan paykunaqa ñaupa taytankumantapas astawanraq Diosta phiñachirqanku.+ 23 Chaymantapas llapa moqo patakunapi,+ k’allmasapa sach’a ukhukunapin+ ruwashallarqanku yupaychana patakunata,* yupaychana sayashaq rumikunatapas,+ yupaychana sayashaq k’ullukunatapas.* 24 Templokunapitaq karqan qharimasinkuman cuerponkuta vendespa idolonkuta yupaychaq qharikuna.+ Chhaynatan Judá ayllu runakunaqa millakunapaq ruwaykunata ruwarqanku chay jallp’amanta Jehová Diospa qarqosqan nacionkunaq ruwasqanta jina.

25 Pisqa wataña Rehoboam kamachikushaqtinmi Egipto rey Sisacqa+ Jerusalén llaqta contra maqanakuq jamurqan.+ 26 Jinaspa Jehová Diospa wasinmantapas reypa wasinmantapas* llapa valorniyoq cosaskunata apapurqan.+ Apapullarqantaqmi Salomonpa ruwasqan llapa qorimanta jark’apakuna escudokunatapas.+ 27 Chay escudokunaq rantinpin rey Rehoboamqa cobremanta escudokunata ruwachirqan, chay escudokunata cuidanankupaqtaq encargarqan reypa wasinpi kaq soldadokunaq umallinkunaman, chay soldadokunaqa reypa wasintan cuidaqku. 28 Sapa kutin Jehová Diospa wasinman rey jamuqtinmi soldadokunaqa chay escudokunata apamuqku, chaymantataq kaqta kutichipuqku soldadokunaq kasqan cuartoman.

29 Rey Rehoboampa wakin ruwasqankunapas lliumi Judá ayllu reykunamanta willaq libropi qelqasqa kashan.+ 30 Rehoboamwan Jeroboanwanqa tukuy tiempon guerrallapi kasharqanku.+ 31 Chaymantataq Rehoboamqa ñaupa taytankuna jina wañukapurqan, jinaspa ñaupa taytankunawan kuskata Davidpa Llaqtan+ nisqapi p’ampapurqanku. Paypa mamanmi karqan Anmón jallp’amanta Namá.+ Rehoboampa wañupusqan qhepamantaq churin Abiyan*+ rey kapurqan.