Jeremías
32 Judá rey Sedequías chunka wataña kamachikushaqtinmi, Babilonia rey Nabucodonosorpas+ chunka pusaqniyoq wataña kamachikushaqtinmi Jehová Dios Jeremiasta rimapayarqan. 2 Chay tiempopin Jerusalenqa Babilonia reypa soldadonkunawan muyuykusqa kasharqan, profeta Jeremiastaq preso kasharqan Guardiakunaq Pation nisqapi,+ Judá reypa wasinpa* ladonpi. 3 Judá rey Sedequiasmi khaynata nispa wisq’achisqa:+ “¿Imaraykun khaynata willanki? Qanmi ninki: Jehová Diosmi nin: Kay llaqtatan Babilonia reyman entregaykusaq, paymi jap’ikapunqa,+ 4 Judá rey Sedequiaspas manan Caldea runakunamanta ayqeyta atinqachu, Babilonia reypa makinmanmi entregasqa kanqa, uya-uyapura tupaspan paywan rimanqa, nispa.+ 5 Paymi Sedequiasta Babiloniaman apanqa, chaypin kamunqa noqa yuyarimunaykama. Caldea runakunawanña maqanakunkichis chaypas manan atipankichischu,+ ninmi Jehová Dios, nispa”.
6 Jeremiasmi nin: “Jehová Diosmi khaynata niwarqan: 7 Salum tioykiq* churin Janamelmi jamuspa nisunki: Anatoj llaqtapi jallp’ayta rantikuway,+ qanmi ñaupaqta rantikunaykipaq derechoyoq kanki,+ nispa”.
8 Jehová Diospa nisqanman jinan tioypa churin Janamelqa Guardiakunaq Pation nisqaman jamuspa niwarqan: “Benjamín ayllupi Anatoj llaqtapi jallp’ayta rantikuway, qanmi rantikunaykipaq derechoyoq kashanki, ama jinachu kay, rantikapuway”, nispa. Chaywanmi yacharqani Jehová Diospa simin kasqanta.
9 Chaymi Anatoj llaqtapi jallp’ata tioypa churin Janamelmanta rantikapurqani. Qanchis siclo* qolqeta chunka qolqetawanmi payman pesapurqani.+ 10 Chaymantan documentota ruwaspa,+ allinta k’uyuykuspa sellota churarqani, testigokunatataq wajachimurqani firmanankupaq,+ jinaspan balanzapi qolqeta pesarqani. 11 Chaymantataq kamachikuypa nisqanman jina ruwasqay documentota mana wisq’asqa documentotawan jap’ispa 12 Maseyaq churin Neriaspa+ churin Barucman+ entregarqani. Chaytan ruwarqani tioypa churin Janamelpa ñaupanpi, documentota firmaq testigokunaq ñaupanpi, Guardiakunaq Pation nisqapi kashaq llapa judío runakunaq ñaupanpi ima.+
13 Paykunaq ñaupanpin Baructa nirqani: 14 “Ejercitokunata kamachiq Jehová Diosmi, Israelpa Diosninmi nin: Kay sellasqa documentota mana sellasqa documentotawan t’uru mankapi waqaychamuy, chhaynapi ama imanakunanpaq, nispa. 15 Ejercitokunata kamachiq Jehová Diosmi, Israelpa Diosninmi nin: Kay suyupin jujmanta rantikunqa wasikunata, campokunata, uvas chajrakunata+ ima, nispa”.
16 Neriaspa churin Barucman jallp’a rantisqay documentota qospan Jehová Diosmanta mañakurqani, khaynatan nirqani: 17 “¡Tukuy munayniyoq Señorníy Jehová! Qanmi janaq pachata kay pachatapas jatun atiyniykiwan,+ kallpasapa makiykiwan ruwarqanki. Qanpaqqa manan imapas sasachu. 18 Qanqa waranqa-waranqa miraykaman mana tukukuq munakuyniykita* rikuchinki, ichaqa jinallatan qhawanki taytankuq juchankumanta wawanku ñak’arinanta.+ Qanqa cheqaq Diosmi kanki, ancha jatunmi kanki, atiyniyoqmi kanki, ejercitokunata kamachiq Jehová sutiyoq Diosmi kanki. 19 Yuyaychayniykikunaqa may allinpunin, atiywanmi imatapas ruwanki.+ Qanqa makillan runakunaq imachus ruwasqanta qhawamushanki,+ sapankaman imayna kasqankuman jina, imachus ruwasqankuman jina pagapunaykipaq.+ 20 Egiptopin imaymana milagrokunata señalkunata ruwarqanki, chaytaqa kunankaman yuyarikun, chhaynatan Israelpi, runakuna ukhupipas reqsichikurqanki,+ imaynan kunan p’unchay kashan jinata. 21 Egiptomantan Israel llaqtaykita orqomurqanki señalkunawan, milagrokunawan, jatun atiyniykiwan, kallpasapa makiykiwan, manchakuy ruwaykunawan+ ima.
22 ”Tiempowanqa ñaupa taytankuman qonaykipaq prometesqayki jallp’atan qorqanki,+ maypichus lechepas mielpas askha kan chay jallp’ata.+ 23 Chayman jaykuspan paykunaqa chaypi tiyarqanku, ichaqa manan imachus nisqaykita kasukurqankuchu, manan kamachikuyniykikunaman jinachu purirqanku. Manan nisqaykiman jinachu imatapas ruwarqanku, chayraykun kay ñak’ariykunata paykunaman chayachimurqanki.+ 24 ¡Qhawariy!, runakunan llaqtata jap’ikapunankupaq perqa k’uchuman k’ullukunata montoshanku.+ Espadaraykun,+ yarqayraykun, millay onqoyraykun+ llaqtaqa Caldea runakunaq makinman urmanqa, rikusqayki jina llapa nisqaykikunan junt’akushan. 25 Tukuy munayniyoq Señorníy Jehová, jallp’ata rantikuy, testigokunata wajachiy nispan niwanki, kay llaqta Caldea runakunaq mankinmanña urmanan kashaqtinpas”, nispa.
26 Jinan Jehová Diosqa Jeremiasta nirqan: 27 “Noqaqa llapa runakunaq Diosnin Jehová Diosmi kani, ¿kanmanchu noqapaq imapas mana ruway atina? 28 Chayraykun noqa Jehová Diosqa kayta nini, kay llaqtatan Caldea runakunaq makinman urmachisaq, Babilonia rey Nabucodonosorpa makinmanmi urmachisaq, paymi jap’ikapunqa.+ 29 Kay llaqta contra maqanakuq Caldea runakunan llaqtaman phawaykuspa lliuta kanaykunqaku. Ninawanmi jap’iykachinqaku+ Baalman sacrificiokuna jaywananku wasi patakunata, noqata phiñachiwanankupaqmi chaypi juj dioskunaman vino ofrendakunata jich’arqanku.+
30 ”Israel runakunapas Judá runakunapas wayna kasqankumantapachan cheqnisqay ruwaykunata ruwarqanku,+ Israel llaqtaqa imaymana ruwasqanwanmi phiñachishallawan, ninmi Jehová Dios. 31 Kay llaqtaqa jatarichisqankumanta kunankamapas phiñachishallawanmi,+ chayraykun ñaupaymanta chinkachisqa kanan,+ 32 Israel runakunapas Judá runakunapas imaymana mana allinkunatan ruwarqanku phiñachiwanankupaq, reyninkupas,+ autoridadninkupas,+ sacerdotenkupas, profetankupas,+ Judá runakunapas, Jerusalenpi tiyaqkunapas ruwasqankuwanmi phiñachiwarqanku. 33 Kutirikamuwanankumantaqa sapa kutillanmi qhepanchawarqanku,+ sapa kutillanmi yachachiyta munarqani, ichaqa manan mayqenninkupas uyarikuyta munarqankuchu, manan wanachisqaytapas chaskikuyta munarqankuchu.+ 34 Sutiyta apaq wasitan qhellicharqanku millakunapaq kaq idolonkuta chayman churaspa.+ 35 Chaymantapas Hinón* wayq’opin yupaychana patakunata Baalpaq ruwarqanku,+ chaypi churinkuta ususinkuta ruphachispa Molekman sacrificiota jaywanankupaq,+ manan chaytaqa kamachirqanichu.+ Manan chhayna mana allin kaqta ruwanankupaq kamachiytaqa yuyaykullarqanipaschu. Chhaynatan Judata juchallichirqanku.
36 ”Babilonia reymanmi espadawan, yarqaywan, millay onqoywan jap’iykachisqa kanqa, nispa nisqaykichis kay llaqtamantan Jehová Dios, Israelpa Diosnin nin: 37 May jallp’akunamanchus sinchi k’araq phiñakuyniywan ch’eqechirqani,+ chaykunamantan pusakampusaq, kay jallp’amanmi kutichimpusaq, chaypin mana imata manchakuspa tiyanqaku.+ 38 Paykunan llaqtay kanqaku, noqataq Diosninku kasaq.+ 39 Juj sonqollatan, juj ñanllatan paykunaman qosaq+ tukuy tiempo manchakuwanankupaq, chayqa paykunaq allinninkupaq, wawankuq allinninpaqwanmi kanqa.+ 40 Wiñaypaq rimanakuytan paykunawan ruwasaq;+ allin kaqkunatan paykunapaq ruwashallasaq,+ sonqonkumanmi manchakuyta churasaq, mana noqamanta karunchakunankupaq.+ 41 Allin kaqkunata paykunapaq ruwaspan kusikusaq,+ tukuy sonqoywanmi, tukuy kallpaywanmi, paykunata kay jallp’api tukuy tiempo tiyachisaq,+ nispa.
42 ”Jehová Diosmi khaynata nin: Imaynan ñak’ariykunata kay llaqtaman chayachimurqani, chhaynatan prometesqay allin kaqkunata chayachimusaq.+ 43 Kay jallp’aqa ch’usaqmi, mana runakunayoqmi, mana uywakunayoqmi kapun, Caldea runakunamanmi entregasqa kapun nishankichisña chaypas, wajmantan kay suyupi jallp’akunata rantikunqa,+ nispa.
44 ”Runakunan qolqewan jallp’ata rantikuspa documentota ruwanqaku sellanqaku ima, testigokunatan wajachinqaku Benjamín ayllukunapi,+ Jerusalenpa muyuriqninkunapi, Judapa llaqtankunapi,+ orqo-orqo llaqtakunapi, urayniraq llaqtakunapi,+ uray lado llaqtakunapi ima, preso apasqakunata kutichimpusqayrayku,+ ninmi Jehová Dios”, nispa.