Lucas

7 Runakunaman imachus yachachinanta tukuspataq Jesusqa Capernaún llaqtaman jaykurqan. 2 Chaypin ejercitopi juj capitanpa* ancha munakusqan kamachin sinchi onqosqa kasharqan, yaqañan wañupusharqanpas.+ 3 Chaymi capitanqa Jesusmanta rimaqta uyarispa judiokunamanta wakin umalliq runakunata* kacharqan payta valekamunankupaq, chhaynapi jamuspa kamachinta qhaliyachinanpaq. 4 Jinan chay runakunaqa Jesusman rispa tukuy sonqowan rogakuyta qallarirqanku: “Payqa imachus mañakusqanta ruwapunaykipaq jinapunin, 5 munakunmi nacionninchistapas, chaymi sinagogatapas jatarichipuwarqanku”, nispa. 6 Jinan Jesusqa paykunawan rirqan. Wasinman manaraq chayashaqtintaq ejercitopi capitanqa Jesusman kachamusqaña wakin amigonkunata: “Wiraqocha, amaña jamuychu, noqaqa manan wasiyman jaykumunaykipaq jinachu kani.+ 7 Chayraykun mana noqa kikiychu qanman jamurqani. Aswanpas rimarillay, chhaynapi kamachiy qhaliyananpaq. 8 Noqapas kamachina runan kani, kamachinitaqmi soldadokunatapas, jujnintan nini phaway nispa, jinan rin; jujnintataq nini jamuy nispa, jinan jamun; kamachiytapas nini kayta ruway nispa, jinan ruwan”, nispa ninankupaq. 9 Chayta uyarispan Jesusqa anchata admirakurqan, jinan qhepanta jamuq runakunata qhawarispa nirqan: “Niykichismi: Manan Israel llaqtantinpipas khayna iñiyniyoq runataqa tarirqanichu”,+ nispa. 10 Capitanpa kachasqan runakunataq wasiman kutipuspanku kamachita qhalita tarirqanku.+

11 Chay qhepallamanmi Jesusqa Naín nisqa llaqtata rirqan, paywan kuskan rirqanku discipulonkunapas ancha askha runakunapas. 12 Llaqta jaykunaman qayllaykushaqtinmi juj warmiq sapallan wawanta p’ampanankupaq orqomushasqaku,+ chay warmiqa viudan kasqa, askhataq llaqtamanta runakunapas payta jamuysishasqaku. 13 Jinan Señorqa chay viudata rikuspa maytapuni khuyapayaykurqan,+ jinaspa nirqan: “Amaña waqaychu”,+ nispa. 14 Kaq ratu qayllaykuspataq aya wantunata llamiykurqan, apashaqkunataq sayaykurqanku. Jinan Jesusqa nirqan: “Wayna, qantan niyki: ¡Jatariy!”,+ nispa. 15 Jinan wañusqaqa tiyarispa rimayta qallarirqan, Jesustaq mamanman qopurqan.+ 16 Chaywanmi llapa runakuna admirakurqanku,* jinaspa Diosta jatunchaspa nirqanku: “Juj jatun profetan noqanchis ukhupi rijurin”,+ “Diosmi llaqtanta yuyarimun”,+ nispa. 17 Jesuspa chay ruwasqanmanta willakuyqa chayneqpi llapa llaqtakunaman Judeapi llapa llaqtakunamanwanmi ch’eqerirqan.

18 Juanpa discipulonkunataq llapa chaykunata payman willarqanku.+ 19 Chaymi Juanqa iskay discipulonkunata wajachispa Señorman kacharqan: “¿Qanchu kanki jamunan karqan chay,+ icha jujtachu suyakusaqku?”, nispa tapumunankupaq. 20 Jinan paykunaqa Jesuspa kasqanman chayaspanku nirqanku: “Bautizaq Juanmi qanman kachamushawanku: ¿Qanchu kanki jamunan karqan chay, icha jujtachu suyakusaqku?, nispa tapuqta”, nispa. 21 Chay ratupin Jesusqa askha runakunata qhaliyachirqan imaymana onqoyninkumanta,+ qarqorqanmi millay espiritukunatapas, askha ñausakunatataq qhawarichirqanpas. 22 Jinaspan Jesusqa paykunata nirqan: “Juanman kutispa willamuychis imachus rikusqaykichista uyarisqaykichistawan: ñausakunan qhawarinku,+ such’ukunan puririnku, lepra onqoyniyoqkunan qhaliyachisqa kanku, roqt’ukunan uyarinku,+ wañusqakunan kausarichisqa* kanku, wajchakunamantaq allin willakuykunata willakushan.+ 23 Kusisqan mana iskayaspa noqapi confiaqqa”,*+ nispa.

24 Juanpa discipulonkuna pasapuqtintaq Jesusqa runakunata Juanmanta tapuyta qallarirqan: “¿Pin karqan ch’inneqpi rikusqaykichis runa? ¿Wayraq maywiykachasqan carrizo* jina runachu karqan?+ Manan. 25 Chhaynaqa, ¿pin karqan? ¿Llamp’u p’achawan p’achasqa runachu?+ Manan, sumaq fino p’achawan p’achasqa qhapaq runakunaqa reykunaq wasinpimá kashanku. 26 Chhaynaqa, ¿pipunitaq karqanri? ¿Juj profetachu? Arí, juj profetan payqa karqan, profetakunamantapas aswanraqmi.+ 27 Paymantan qelqasqa kashan: Noqan ñaupaykita willaqniyta kachasaq, paymi ñaupaykipi ñanta allichapusunki,+ nisqa. 28 Niykichismi: Runakunamantaqa* manan pipas Juanmanta aswan kuraqqa kanchu, chaywanpas Diospa gobiernonpiqa aswan juch’uy kaqmi Juanmanta aswan kuraqqa”,+ nispa. 29 Chayta uyarispan llapan runakunapas impuesto cobraqkunapas Diosqa chanin kasqanta rimarirqanku, Juanpa bautizasqan kasqankurayku.+ 30 Fariseokunawan kamachikuy simita yachachiqkunapiwanmi ichaqa mana uyarikurqankuchu paykunaman Diospa imachus nisqanta, chaymi paykunaqa mana Juanwan bautizachikurqankuchu.+

31 Jesusqa nillarqantaqmi: “¿Pikunamanmi tupanachisaq kay tiempo runakunata? ¿Pikuna jinan kanku?+ 32 Paykunaqa mercado plazapi tiyaykuspa wajanakuq erqechakuna jinan kanku, chay erqechakunan ninakunku: Flautatan* tocapurqaykiku, manataq tusurqankichischu; khuyaytan waqarqayku, manataq waqarqankichischu, nispa. 33 Bautizaq Juanqa t’antata mana mijuspa, vinota mana ujaspan jamurqan, qankunataq ninkichis: Supaypa junt’aykusqanmi kashan,+ nispa. 34 Runaq Churinmi ichaqa jamurqan mijuspa ujaspa ima, qankunataq ninkichis: Qhawariychis kay runata, payqa rajrapun,* machaqmi, impuesto cobraqkunaq juchasapakunaq amigonmi,+ nispa. 35 Chaywanpas runaqa imatapas allinta* ruwasqanwanmi rikuchinqa yachayniyoq kasqanta”,+ nispa.

36 Juj fariseon Jesusta invitarqan paywan mijunanpaq. Jinan payqa fariseoq wasinman jaykuspa mesapi tiyaykurqan. 37 Llaqtapi juchasapamanta reqsisqa warmitaq fariseoq wasinpi Jesuspa mijushasqanta yachaspa, yuraq rumi p’uyñuchapi sumaq q’apaq jawina aceitentin chayman jaykurqan;+ 38 jinan Jesuspa chakinman k’umuykuspa waqayta qallarirqan, weqentataq chakinkunaman sut’uykachirqan, jinaspa chujchanwan ch’akichirqan. Chaymantapas chakinta ancha munakuywan much’aykuspan sumaq q’apaq jawinawan jich’aykurqan. 39 Chayta rikuspan invitaqnin fariseoqa sonqollanpi nirqan: “Kay runa profetapuni kanman chayqa, yachanmanchá llamiykuqnin warmiqa juchasapa kasqanta”,+ nispa. 40 Chayta reparaspan Jesusqa nirqan: “Simón, jujta nisayki”, nispa. Paytaq “¡niway, yachachikuq!” nirqan.

41 Jinan Jesusqa nirqan: “Iskay runakunan manu karqanku juj qolqe manuq runaman. Jujninmi pisqa pachaj denario qolqemanta* manu karqan, jujnintaq pisqa chunka qolqemanta. 42 Mana imankupas pagapunankupaq kaqtintaq manuqqa tukuy sonqowan iskayninkuta perdonapurqan. Niway, ¿mayqenmi chay manuqta astawan munakunqa?”, nispa. 43 Jinan Simonqa nirqan: “Askha qolqeta manukuqninchá riki”, nispa. Jesustaq: “Allintan ninki”, nirqan. 44 Chay warmita qhawarispataq Simonta nirqan: “¿Rikushankichu kay warmita? Wasiykiman jaykumuqtiymi qanqa mana chakiypaq unuta qowarqankichu; kay warmin ichaqa weqenwan chakiyta maqchin, chujchanwantaq ch’akichin. 45 Manan much’aykuwarqankichu, kay warmin ichaqa jaykumusqanmantapacha chakiyta much’aykushan. 46 Manan umaymanpas aceitewan jich’aykuwarqankichu, kay warmin ichaqa sumaq q’apaq jawinawan chakiyman jich’aykuwan. 47 Chayraykun niyki: May askhaña paypa juchankuna chaypas, perdonasqan kapun,+ chaymi payqa anchata munakun. Pisillapi perdonasqa kaqmi ichaqa pisillata munakun”, nispa. 48 Chaymantataq Jesusqa chay warmita nirqan: “Juchaykikunan perdonasqa kapun”,+ nispa. 49 Paywan mesapi tiyashaqkunataq sonqollankupi nirqanku: “¿Pitaq kay runari, chaytaq juchakunatapas perdonanri?”,+ nispa. 50 Jesustaq chay warmita nirqan: “Iñiyniykin salvasunki,+ ama llakikuspalla ripuy”, nispa.