Hechos
12 Chay tiempopin Herodesqa* iñiq t’aqamanta wakinta qatikachayta qallarirqan.+ 2 Paymi Juanpa+ wayqen Santiagota espadawan wañuchirqan.+ 3 Chay ruwasqanwan judiokuna kusikusqanta rikuspan payqa Pedrotapas presota jap’ichirqan. (Chayqa karqan Mana Levadurayoq T’anta Fiesta p’unchaykuna kashaqtinmi).+ 4 Jap’ichispataq carcelman wisq’achirqan,+ jinaspa tawa t’aqa soldadokunaman entregarqan sapanka t’aqa qhawanankupaq, sapanka t’aqapin karqan tawa soldadokuna. Payqa Pascua Fiesta tukuytan llaqta runakunaman orqomuyta munasharqan. 5 Chaykamaqa carcelpin Pedroqa kasharqan, iñiq t’aqapi kaqkunan ichaqa tukuy sonqowan Diosmanta mañapusharqanku.+
6 Pedroqa iskay cadenawan watasqan puñusharqan iskay soldadokunaq chaupinpi, guardiakunapas punkupin sayasharqanku punkuta qhawaspa. Paqariqtinmi Herodesqa Pedrota runakunaman orqomunan karqan. 7 Chayllamanmi Jehová* Diospa angelninqa rijurirqan,+ juj k’anchaytaq Pedrota wisq’asqanku ukhupi k’ancharirqan. Jinan angelqa Pedrota waqtanmanta kuyurichispa rijch’arichirqan, jinaspa nirqan: “Usqhaylla jatariy”, nispa. Jinan makinpi cadenakunaqa urmapurqan.+ 8 Jinaspan angelqa nillarqantaq: “P’achakuy, usut’aykitapas churakuy”, nispa. Chayta ruwaqtintaq angelqa nirqan: “Jawa p’achaykiwan churakuspa qhepayta jamuy”, nispa. 9 Jinan payqa lloqsispa qhepanta rirqan, ichaqa manan repararqanchu angelpa ruwasqan cheqaqpuni kashasqanta, payqa juj rijuriyta rikunanpaqmi piensasharqan. 10 Ñaupaq t’aqa guardiakunata iskay kaq t’aqa guardiakunatapas pasaruspataq, llaqtaman lloqsina fierro punkuman chayarqanku, chay punkuqa kikillanmi paykunapaq kicharikurqan. Lloqsispankutaq juj callenta rirqanku, chayllamanmi angelqa Pedroq qayllanmanta chinkapurqan. 11 Chayraqmi Pedroqa cuentata qokurqan, jinaspa nirqan: “Jehová* Diosmá angelninta kachamuwasqa, chhaynapi Herodespa makinmanta, judiokuna noqapaq mana allinta munasqankumantawan librawananpaq”,+ nispa.
12 Chayta reparaspan Pedroqa Mariaq wasinta rirqan, payqa Marcos+ nisqa Juanpa mamanmi karqan, chaypin askha iñiqkuna juñunasqa Diosmanta mañakusharqanku. 13 Punkuta takaykuqtinmi Rode sutiyoq warmi kamachi lloqsimurqan pichus takamushan chayta qhawaq. 14 Pedroq kunkanta uyarispataq payqa anchata kusikurqan, chaymi mana punkutapas kicharqanchu aswanmi phawaylla kutiykuspa willamurqan: “Pedron punku jawapi kashan”, nispa. 15 Jinan paykunaqa nirqanku: “Locayashankichá”, nispa. Paymi ichaqa nirqan: “Pedropunin kashan”, nispa. Chaymi paykunaqa ninakurqanku: “Chhaynaqa angelninchá”, nispanku. 16 Pedroqa takakushallarqanmi punkuta, kichaspankutaq payta rikuspa anchata admirakurqanku. 17 Pedron ichaqa makillanwan paykunata nirqan ch’inlla kanankupaq, chaymantataq lliuta willarqan imaynatas Jehová* Dios carcelmanta orqomurqan chayta, nirqantaq: “Llapa chaykunata Santiagoman+ iñiqmasikunamanwan willamuychis”, nispa. Chaymanta lloqsispataq juj ladoman ripurqan.
18 P’unchayamuqtintaq soldadokunaqa afanta rimasharqanku, imachus Pedrowan pasasqanmanta. 19 Herodesqa lliutan maskhachirqan, mana tariqtinkutaq guardiakunata allinta tapurqan, jinaspa kamachikurqan paykunata apaspa castigamunankupaq.*+ Chaymantataq Herodesqa Judeamanta Cesarea llaqtaman uraykurqan, chaypin juj tiempo qhepakurqan.
20 Payqa Tiro llaqtapaq Sidón llaqtapaq iman phiñasqa kasharqan. Chay llaqta runakunaqa Herodespa kamachisqan llaqtamantan mijuyta rantiqku, chaymi paykunaqa juj yuyaylla jamuspanku reypa wasinpi encargasqa Blastota valekurqanku yanapananpaq, jinaspa reywan rimarqanku allipunakapunankupaq. 21 Juj señalasqa p’unchaymi Herodesqa kamachikunan allin p’achanwan p’acharukuspa juzgana tiyanapi tiyaykurqan, jinaspa runakunata rimapayayta qallarirqan. 22 Chayta uyarispan chaypi juñunasqa runakunaqa qaparirqanku: “¡Kayqa manamá runaq kunkanchu, juj diospa kunkanmá!”, nispanku. 23 Chayta niqtinku jinan Jehová* Diospa angelninqa Herodesta onqoywan jap’ichirqan Diosta mana jatunchasqanrayku; jinan payqa kuruq tukusqan wañupurqan.
24 Jehová* Diospa siminqa jinantinmanmi ch’eqerisharqan, askha runakunataq iñipusharqanku.+
25 Bernabewan+ Saulowantaq yanapay apamusqankuta Jerusalenpi+ saqeykuspa Antioquía llaqtaman kutipurqanku. Paykunaqa Marcos nisqa Juantawanmi+ pusarikurqanku.