Éxodo
19 Egiptomanta lloqsimusqanku qhepamanmi kinsa kaq killapi* Israel runakunaqa Sinaí ch’inneqman chayamurqanku. 2 Refidinmanta+ lloqsimuspan Sinaí ch’inneqman chayamurqanku, chaypin Sinaí orqo chimpapi karpakurqanku.+
3 Chaymantan Moisesqa Diospa ñaupanman seqarqan. Jehová Diosmi payta orqomantapacha wajamuspa+ nirqan: “Jacobpa wawankunata, Israel runakunatan ninki: 4 Diosmi nin: Qankunaqa allintan yachankichis imatachus Egipto runakunata ruwarqani chayta,+ anka jina rafraykunapi qankunata kaykama apamusqaytapas.+ 5 Tukuy imapichus simiyta kasukunkichis, qankunawan rimanakusqaytapas junt’ankichischus chayqa, qankunan llapa llaqtakunamantapas aswan munakusqay llaqta kankichis.+ Llapa kay pachaqa noqaqmi.+ 6 Chaymantapas qankunaqa kamachikuq sacerdotekunan kankichis, noqapaq t’aqasqa ch’uya nacionmi kankichis,+ nispa”. Diosqa nillarqantaqmi: “Llapa chay nisqaytan willanki Israel runakunaman”, nispa.
7 Jinan Moisesqa orqomanta uraykamuspa Israelpi llapa umalliqkunata* juñurqan, jinaspa paykunaman willarqan Jehová Diospa tukuy imachus nisqanta.+ 8 Llaqtantin runakunataq juj nisqalla nirqanku: “Noqaykuqa Jehová Diospa llapa imachus nisqantan kasukusaqku”,+ nispa. Jinan Moisesqa kaq ratu rirqan llaqta runakunaq imachus nisqanta Jehová Diosman willaq. 9 Jehová Diosmi Moisesta nirqan: “Yana phuyupin jamusaq qanwan rimaq, chhaynapi llapa runakuna qanwan rimasqayta uyarinanpaq, tukuy tiempo qanpi confianankupaqwan”, nispa. Moisestaq runakunaq imachus nisqanta Jehová Diosman willarqan.
10 Chaymantataq Jehová Diosqa Moisesta nirqan: “Phaway runakunata nimuy ch’uyanchakunankupaq, kunanta paqarintawan ch’uyanchakuchunku. Chaymantapas p’achankuta t’aqsachunku. 11 Kinsa kaq p’unchaypaqqa listoñan kashananku, chay p’unchaymi noqa Jehová Diosqa Sinaí orqoman uraykamusaq lliu runaq rikushasqan. 12 Orqo muyuriqpin señalkunata churanki ama runakuna pasamunanpaq, jinaspa paykunata ninki: Aman kay orqomanqa seqankichischu ni cantollantapas saruykunkichischu. Pipas kay orqota tupaykuqqa wañuchisqan kanqa. 13 Chaymantapas pipas kay orqota tupaykuqtaqa aman tupaykunkichischu, aswanmi rumiwan ch’aqespa otaq flechawan wach’ispa wañuchinkichis. Runaña animalña kaqtinpas wañuchinkichismi,+ nispayki. Oveja waqra waqamuqtinmi+ runakunaqa kay orqoman qayllaykamunqaku”, nispa.
14 Chaymantataq Moisesqa orqomanta uraykamuspa runakunata ch’uyanchachirqan, p’achankutapas t’aqsachirqan.+ 15 Chaymantataq paykunata nirqan: “Kinsa kaq p’unchaypaq preparakuychis. Aman warmiykichiswanpas kankichischu”, nispa.
16 Kinsa kaq p’unchay tutamantanmi phuyukunapi llifllikiy t’ojay ima karqan. Sinaí orqomanmi yana phuyu+ junt’aykurqan, oveja waqra tocay iman uyarikurqan. Chaykunata rikuspan karpa-karpapi runakunaqa khatatatayta* qallarirqanku.+ 17 Moisestaq llapa runakunata karpa-karpamanta lloqsichimurqan Dioswan tupaq rinankupaq, jinan paykunaqa Sinaí orqoq cantonkunapi sayaykurqanku. 18 Jehová Diosqa nina sonqopin Sinaí orqoman uraykamurqan,+ chaywanmi lliu orqontin q’osñirirqan. Chay q’osñiqa hornomanta jinaraqmi lloqsimurqan, llapa orqontintaqmi sinchita chhafchikurqan.+ 19 Oveja waqra tocayqa astawan-astawanraqmi uyarikusharqan. Moisesmi Diosta rimapayasharqan, Diostaq payta kutichimusharqan.
20 Jehová Diosqa Sinaí orqo patamanmi uraykamurqan. Jinaspan Jehová Diosqa Moisesta wajamurqan Sinaí orqo pataman seqananpaq, Moisestaq seqarqan.+ 21 Jehová Diosmi Moisesta nirqan: “Uraykuspa runakunata nimuy ama noqa Jehová Diosta qhawaq asuykamunankupaq, mana chayqa askhan wañunqaku. 22 Noqa Jehová Diosman sapa kutillan asuykamuq sacerdotekunapas ch’uyanchakuchunku, chhaynapi noqa Jehová Dios paykunata ama wañuchinaypaq”,+ nispa. 23 Moisestaq Jehová Diosta nirqan: “Runakunaqa manan seqamunqakuchu Sinaí orqomanqa. Qanqa ñamá niwankiña: Orqoq cantonkunaman señalkunata churay, ch’uyanchay ima,+ nispa”. 24 Jehová Diosqa nillarqantaqmi: “Phaway uraykuspa Aaronta pusamuy. Ichaqa amapuni sacerdotekunapas ni runakunapas noqa Jehová Diosmanqa asuykamuwachunkuchu, chhaynapi paykunata ama wañuchinaypaq”,+ nispa. 25 Moisestaq runakunaq kasqanman uraykuspa Diospa imachus nisqanta paykunaman willarqan.