1 Samuel
10 Jinan Samuelqa p’uyñupi aceitewan Saulpa umanman jich’aykurqan,+ chaymantataq much’aykuspa nirqan: “Jehová Diosmi ajllasunki llaqtanta+ umallinaykipaq.+ 2 Kunan ripuspaykin Benjamín ayllupi kaq Zelzá llaqtapi Raquelpa sepulturanpa+ qayllanta pasaspa iskay runakunawan tupanki. Paykunan nisunkiku: Maskhasqaykichis asnokunataqa ñan taripunkuña. Papaykiqa manañan asnokunamantaqa llakikunñachu,+ kunanqa qankunamanta tapukuspañataqmi llakisqa purishan: ¿Imatan ruwasaq? Manan waway kutimunchu, nispa. 3 Chaymantataq Taborpi jatun sach’aq kasqanman chayanki. Chaypin tupanki kinsa runakunawan, paykunan Diosta yupaychaq Betel llaqtata seqashanqaku.+ Jujninmi apashanqa kinsa malta cabrachakunata, jujnintaq kinsa t’antata, juj kaqtaq jatun p’uyñupi vinota apashanqa. 4 Paykunan tapusunkiku: ¿Imaynallan kashanki?, nispa, chaymantataq iskay t’antata jaywarisunkiku, qanqa chaskikullay. 5 Chay qhepamantaq Dios yupaychana pataman* chayanki, chaypin kashanqaku juj t’aqa Filistea runakuna. Llaqtaman chayaspataq Dios yupaychana patamanta uraykamushaq juj t’aqa profetakunawan tupanki. Paykunaqa profetizaspan rishanqaku, ñaupankutataq askha runakuna rishanqaku cuerdayoq tocanata, tamborta, flautakunata,* arpata ima tocaspa. 6 Chay ratun Jehová Diospa espiritunqa junt’aykusunki,+ jinan qanpas paykunawan kuska profeta jina rimaspa riysikunki, juj runaman jinaraqmi cambianki.+ 7 Tukuy chaykuna junt’akuqtintaq kallpachakuy imachus ruwanaykita junt’anaykipaq, Diosqa qanwanmi kashanqa. 8 Chaymantataq manaraq noqa jaykushaqtiy Guilgal+ llaqtaman uraykamunki. Chayman jamuspayñan ruphachina sacrificiota sumaq kausay sacrificiotawan Diosman jaywasaq. Ichaqa chayamunaykaman qanchis p’unchayta chaypi suyawanki, chaypiña willasayki imatachus ruwanaykita”, nispa.
9 Saúl ripunanpaq kutiriqtin jinan Diosqa paypa sonqonta cambiarqan jujniray runa kananpaq. Chay p’unchaymi Samuelpa willasqan señalkunaqa llapan junt’akurqan. 10 Samuelpa willasqanman jinan Saulqa kamachinpiwan moqo pataman chayaspa profetakunawan chaypi tuparqanku. Chay ratun Diospa espiritun Saulman junt’aykurqan,+ jinan paypas profetakunawan kuska profeta jina rimayta qallarirqan.+ 11 Saulta ñaupaqmantaña reqsiq runakunataq profetakunawan puriqta rikuspa, profeta jina rimaqta rikuspa ima paykunapura ninakurqanku: “¿Imanaruntaq Quispa wawan Saultari? ¿Paypas profetachu kapun?”, nispa. 12 Jinan paykuna ukhumanta juj runa nirqan: “¿Pitaq wakin profetakunaq taytanri?”, nispa. Chaymantapachan rimay karqan: “¿Saulpas profetachu kapun?”,+ nispa.
13 Profeta jina rimayta tukuspataq Saulqa Dios yupaychana pataman rirqan. 14 Chaymantataq Saulpa tionqa paytawan kamachintawan tapurqan: “¿Maytan rirqankichis?”, nispa. Saultaq nirqan: “Asnokunata maskhaqmi rirqayku,+ manaña tarispaykutaq Samuelpa wasinta rirqayku”, nispa. 15 Tiontaq jujmanta tapullarqantaq: “Ama jinachu kay, willaykuway, ¿imanirqasunkichismi Samuel?”, nispa. 16 Saultaq nirqan: “Asnoykichiskunataqa ñan tarirunkuña, nispan niwanku”, nispa. Rey kananpaq Samuelpa nisqantan ichaqa mana imatapas willarqanchu.
17 Samuelqa llapa Israel runakunatan wajachirqan Mizpá+ llaqtapi Jehová Diospa ñaupanman juñukamunankupaq. 18 Chaypin paykunata nirqan: “Israelpa Diosnin Jehová Diosmi nin: Noqan Israel runakunataqa Egiptomanta orqomurqani.+ Noqan Egipto runakunaq makinmantapas, ñak’arichiqnin reykunaq makinmantapas librarqani. 19 Qankunataq ichaqa noqa Diosniykichista wijch’upuwankichis,+ llakikuyniykichismanta libraqniykichista, ñak’arisqaykichismanta salvaqniykichista. Qankunan nirqankichis: ¡Imapas kachun! ¡Juj reyta churapuwayku kamachiwanankupaq!, nispa. Chhaynaqa sapankaykichis kunan jamuychis ayllu-aylluntin, familia-familiantin, jinaspa Jehová Diospa ñaupanpi sayaychis, nispa”.
20 Jinan Samuelqa Israelpi llapa ayllukunata ch’ulla-ch’ullamanta qayllaykachimurqan,+ chaypin Benjamín ayllu+ ajllasqa karqan. 21 Chaymantataq Benjamín ayllupi llapa familiakunata ch’ulla-ch’ullallamanta qayllaykachimurqan. Chaypin Matar familia ajllasqa karqan, chay familiamantataq Quispa churin Saúl ajllasqa karqan.+ Chaymi Saulta maskharqanku, mana tarispataq 22 Jehová Diosta tapurqanku:+ “¿Kaypichu kashan Saúl?”, nispa. Jehová Diostaq nirqan: “Jaqaypin q’epikuna ukhupi pakakushan”, nispa. 23 Jinan phawaylla maskhaq rirqanku, pusamuspataq llaqta chaupipi sayaykachirqanku. Llapa runakunan rikurqanku payqa llapankumantapas aswan jatun kasqanta.+ 24 Samueltaq llapa runakunata nirqan: “¡Paytan Jehová Dios ajllan! ¡Paymi reyniykichis!+ Israel llaqtapiqa manan pipas pay jinaqa kanchu”, nispa. Jinan llapa llaqtantin qaparirqanku: “¡Kausachun rey!”, nispa.
25 Chaymantataq Samuelqa llapa runakunaman willarqan imakunatachus rey paykunamanta mañanqa chayta,+ chaytataq juj libropi qelqarqan jinaspa Jehová Diospa ñaupanman churarqan. Chaymantataq llapa runakunata wasinkuman kachapurqan. 26 Saulpas Guibeapi kaq wasintan ripurqan askha soldadokunantin. Chay soldadokunaq sonqontan Jehová Dios kuyurichirqan Saulta riysinankupaq. 27 Wakin mana valeq runakunan Saulta pisicharqanku: “¡Kaychu kunan librawasunman!”,+ nispa, manataq ima regalotapas aparqankuchu.+ Saulmi ichaqa mana imanirqanpaschu.