1 Reyes

4 Rey Salomonqa lliu Israel nacionpin kamachikusharqan.+ 2 Kaykunan karqan Salomonpa churasqan autoridadkuna: Sadocpa+ churin Azariasmi karqan sacerdote; 3 Sisapa churinkuna Eliorefwan Aiyawanmi karqanku secretariokuna;+ Ailujpa churin Jehosafat-taq+ karqan reypa qelqaqnin; 4 Jehoiadapa churin Benayataq+ karqan soldadokunaq umallin; Sadocwan Abiatarwantaq+ karqanku sacerdotekuna; 5 Natanpa+ churin Azariastaq karqan mijuykunata juñumunankupaq encargakuqkunaq umallin; Natanpa churin Zabujtaq karqan sacerdote, reypa amigon ima;+ 6 Aisartaq karqan reypa wasinpi encargakuq; Afdapa churin Adonirantaq+ karqan juñusqa llank’aqkunamanta encargakuq. Paykunaqa reypaq llank’anankupaqmi kamachisqa karqanku.+

7 Salomonqa chunka iskayniyoq runakunatan Israelpi churarqan mijuykunata juñumunankupaq. Paykunan encargakuqku reypaqpas wasinpi kaqkunapaqpas mijuykunata juñumunankupaq. Sapankankun watapi juj killa chayta ruwaqku.+ 8 Kay runakunan encargakurqanku mijuykunata juñumunankupaq: Hurpa churinmi encargakurqan Efraín orqo-orqopi kaq llaqtakunamanta; 9 Dequerpa churintaq encargakurqan Macazmanta, Salbin+ llaqtamanta, Bej-Semes llaqtamanta, Elón-Bej-Anán llaqtamantawan; 10 Jesejpa churintaq encargakurqan Aruboj llaqtamanta (payqa encargakullarqantaqmi Socomantapas llapan Héfer jallp’akunamantapas); 11 Abinadabpa churintaq encargakurqan Dor qhatakunapi llaqtakunamanta (paymi casarakurqan rey Salomonpa ususin Tafajwan); 12 Ailujpa churin Banataq encargakurqan Tanac llaqtamanta, Meguidó+ llaqtamanta, lliu Bej-Seán+ llaqtamantawan, Bej-Seanmantataq Abel-Meolakama jinallataq Jocmean+ jallp’a ladokama, Bej-Seanqa Zaretán llaqtaq qayllanpin kasharqan Jezrel llaqtaq uray ladonpi; 13 Gueberpa churintaq encargakurqan Ramoj-Galaad+ llaqtamanta (paymi encargakullarqantaq Galaad+ jallp’api kaq Manasespa churin Jairpa+ tiyasqan llaqtachakunamantapas,* jinallataq llapa Basanpi+ kaq Argof+ jallp’akunamantapas, chaypin karqan soqta chunka jatun allin perqasqa llaqtakuna, punkunpi cobremanta trankanakunayoq); 14 Idopa churin Ainadaftaq encargakurqan Manain+ llaqtamanta; 15 Aimaztaq encargakurqan lliu Neftalí ayllumanta (paymi casarakurqan rey Salomonpa juj kaq ususin Basemajwan); 16 Jusaipa churin Banataq encargakurqan lliu Aser ayllumanta Bealoj jallp’amantawan; 17 Paruaq churin Jehosafat-taq encargakurqan lliu Isacar ayllumanta; 18 Elapa churin Simeitaq+ encargakurqan lliu Benjamín ayllumanta;+ 19 Uripa churin Guebertaq encargakurqan lliu Galaad+ jallp’amanta, chay jallp’akunapin kamachikurqan amorreo runakunaq reynin Sehón,+ Basán runakunaq reynin Ogpas.+ Chaymantapas kallarqantaqmi mijuykunata juñumunankupaq llapa chay encargakuqkunaq umallinpas.

20 Israelpi Judapi runakunaqa sinchi askhallañan karqanku lamar-qocha patapi aqo jinaraq.+ Paykunaqa mijuspa ujaspa iman kusisqa tiyarqanku.+

21 Salomonqa lliu llaqtakunatan kamachirqan Éufrates mayumanta+ Filistea runakunaq tiyasqan jallp’akama, uray ladomantaq Egiptowan linderokama.* Llapan chay runakunan rey Salomonman impuestota pagaqku, tukuy kausasqan tiempotaq payta servirqanku.+

22 Salomonmanqa sapa p’unchaymi apaqku kinsa chunka carga* allin jak’uta,* soqta chunka carga chhanqa* jak’uta, 23 allin wirayachisqa chunka torokunata, pastollata mijuq iskay chunka torokunata, pachaj ovejakunatawan. Chaymantapas apallaqkutaqmi tarukakunata,* wirayachisqa phalaq animalkunatawan. 24 Salomonqa kamachirqan Éufrates mayumanta+ llapa kay lado llaqtakunatan, Tifsamanta Gaza+ llaqtakama. Chaymantapas kamachirqanmi chay llaqtakunapi kaq reykunatapas. Llapan chay kamachisqan llaqtakunapin thaj kay karqan, jinallataq muyuriqninkunapipas.+ 25 Rey Salomonpa kamachikusqan tiempopiqa Israel runakunapas Judá ayllu runakunapas Danmanta Ber-Sebakaman thajpi kausarqanku. Sapankankun uvas sach’anku k’uchupi, higos sach’anku k’uchupi thaj tiyakurqanku.

26 Salomonpa caballonkunata waqaychananmi tawa waranqaman* t’aqasqa karqan, chaypin carretankunata aysaq caballokunata waqaychaq, caballonkunaqa* chunka iskayniyoq waranqan karqan.+

27 Mijuykunata juñumunankupaq encargakuqkunan Salomonwan kuska mesanpi mijuqkunamanpas mijuykunata apaqku. Paykunaqa ima killachus tupasqanman jinan mana faltayta apaqku.+ 28 Chaymantapas carreta aysaq caballokunapaq sillakuna caballokunapaq iman cebadata pajata ima apaqku. Chaytaqa apaqku reypa mañasqanman jinan, maypichus necesitakusqanman jina.

29 Diosmi Salomonman qorqan yachayta, yuyayniyoq kayta, allin reparaq sonqotawan. Chaykunatan Diosqa askhanpi qorqan lamar-qocha patapi aqota jinaraq.+ 30 Salomonqa inti lloqsimuy ladopi kaq runakunamantapas Egipto llaqta runakunamantapas aswan yachayniyoqpunin karqan.+ 31 Payqa llapa runakunamantapas aswan yachayniyoqmi karqan, Zerá runa Etanmantapas,+ Majolpa churinkuna Emanmantapas,+ Calcolmantapas,+ Dardamantapas. Chaymi Salomonqa allin reqsisqa kapurqan Israelpa muyuriqnin nacionkunapipas.+ 32 Salomonmi qelqarqan* kinsa waranqa yachaywan rimaykunata,*+ waranqa pisqayoq takikunatawan.+ 33 Salomonqa imaymana clase sach’akunamantan rimaq: Líbano orqopi cedro sach’akunamanta, perqa qhatapi wiñaq hisopo plantakunamantapas.+ Chaymantapas imaymana clase animalkunamantan+ rimaq: phalaq animalkunamanta,+ pampanta suchuq animalkunamanta, imaymana kurukunamanta,+ unupi tiyaq animalkunamantapas. 34 Salomón yachayniyoq kasqanta yachaspan runakunaqa lliu nacionkunamanta jamurqanku. Jamullarqankutaqmi lliu nacionkunamanta reykunapas, chhaynapi Salomonpa yachayninta uyarinankupaq.+