Isaías
52 ¡Sion,+ rijch’ariy! ¡Jatariy! ¡Kallpawan p’achakuy!+
¡Jerusalén, ch’uya llaqta, munay p’achaykiwan p’achakuy!+
Qan ukhumanqa manan pi qhelli runapas jaykumunqachu,
manan qhari kaynin qaracha mana kuchusqapas jaykumunqachu.+
2 Jerusalén, jatariy, polvota chhafchirikuy, tronopi tiyaykuy.
Sion llaqta, kunkaykipi cadenakunata paskakuy,
preso jap’iqniyki waskhakunata paskakuy.+
3 Jehová Diosmi khaynata nin:
“Qankunaqa mana qolqellapaqmi vendesqa karqankichis,+
mana qolqellawantaqmi rantisqapas kankichis”,+ nispa.
4 Tukuy munayniyoq Señor Jehová Diosmi nillantaq:
“Ñaupaqtaqa Egiptomanmi llaqtayqa jaykurqan, chaypin paykunaqa tiyapakurqanku,+
chaymantataq Asiria runakuna mana imallamanta ñak’arichirqanku”, nispa.
5 “Chhaynataq kashan chayqa, ¿imatataq ruwasaq?” ninmi Jehová Dios.
“Yanqamantan llaqtayta apapunku.
Kamachiqnin runakunan sarunchashanku,+
tukuy p’unchaymi sutiytapas pisichashanku”+ nispan nin Jehová Dios.
6 “Chaymi noqaqa llaqtayman sutiyta reqsichisaq,+
chay p’unchaymi paykunaqa yachanqaku noqa rimapayasqayta.
¡Arí, noqan paykunataqa rimapayashani!” ninmi Diosqa.
7 ¡May munaymi orqo patankunata allin willakuykunata apaqpa chakinqa!+
Thaj kay kananmanta willakuyta apaqpa chakinqa,+
allin ruwaykuna kananmanta willakuyta apaqpa chakinqa,
salvación kananmanta willakuyta apaqpa chakinqa.
Sionta “¡Diosniykin rey kapun!”+ niqpa chakinqa.
8 ¡Qhawariychis! Llaqta qhawaq runakunan wajakamushan,
llapankun kusisqa wajakamushanku.
Paykunaqa allintan rikunqaku Jehová Dios Sionta juñupusqanta.
9 Kusikuymanta qapariychis Jerusalenpi raqay-raqaykuna,*+
Jehová Diosmi llaqtanta khuyapayan,+ Jerusalentan jujmanta rantipun.+
10 Jehová Diosmi ch’uya makinta llapa nacionkunaman rikuchin;+
jallp’a pachaq k’uchunkunapiraqmi Diosninchispa salvay atisqanta rikunqaku.+
11 ¡Lloqsiychis, karunchakuychis, lloqsiychis chaymanta!+
¡Ama ima qhelli kaqtapas llamiychischu!+
Jehová Diospa ch’uya servicionkunata apaqkuna,+
paypa chaupinmanta lloqsipuychis,+ ama qhellichakuychischu.
12 Qankunaqa manan q’aqchasqa* jinachu lloqsinkichis,
manan phaway-phawayllachu ripunkichis,
Jehová Diosmi qankunaq ñaupaykichista rinqa,+
Israelpa Diosninmi qhepaykichistapas jamunqa.+
13 Kamachiyqa allin yuyaywanmi imatapas ruwanqa.+
Payqa jatun autoridadtan chaskinqa,
jatunchasqan, allin qhapaqchasqan kanqa.+
14 Paytaqa juj runakunamanta mastan uyanta k’irirqanku,
lliu runakunamanta mastan cuerpontapas k’irirqanku,
chaytan askha runakuna admirasqa qhawarqanku.
15 Chhaynatan payqa llapa nacionkunata admirasqata saqenqa.+