2 Timoteo

3 Kayta allinta yachay: Tukukuy p’unchaykunataqa+ manchakuy sinchi sasa tiempokunan chayamunqa. 2 Runakunan kanqa paykuna kikinkuta munakuqkuna, qolqe sonqokuna, alabakuqkuna, jujkunata pisichaspa uma oqariqkuna, millayta k’amikuqkuna, tayta-mamankuta mana kasukuqkuna, mana agradecekuqkuna, jujkunapaq mana junt’aq kaqkuna,* 3 runamasinkuta mana munakuqkuna, mana uyakuq k’ullukuna, yanqa tumpaqkuna, cuerponkuta mana kamachiqkuna, sinchi k’araq sonqokuna, allin kaqta mana munakuqkuna, 4 traicionerokuna, tercokuna, sinchita jatunchakuqkuna, Diosta munakunankumantaqa aycha kusichiyllapi puriyta munaqkuna; 5 Dios sonqo runamanmi rijch’akunqakupas, ichaqa manan chayman jinachu kausanqaku.+ Qanqa aman jayk’aqpas chhayna runakunawanqa juñukunkichu. 6 Chhayna runakuna ukhumantan lloqsimun engañaqkuna, paykunan pisi kallpayoq juchasapa warmikunaq wasinman engañollawan jaykuspa chay warmikunaq sonqonta suwanku; chay warmikunaqa sonqonkuq munapayasqanpa kamachinmi kanku. 7 Estudiashallankun kanpas, ichaqa manapunin entiendeyta atinkuchu cheqaq yachachikuytaqa.

8 Chay runakunaqa imaynan Janespas Jambrespas Moisés contra sayarirqanku chhaynatan cheqaq yachachikuypa contranpi sayarishanku. Chaymantapas, chay runakunaqa ismusqa yuyayniyoqmi kanku, manataqmi iñiyman jinachu kausanku, chaymi Diosqa mana paykunata chaskinchu. 9 Ichaqa lliumi reparanqaku chay runakunaq mana yuyaywan ruwasqankuta, imaynan chay iskay runakunaqtapas repararqanku jinata,+ chaymi chay runakunaqa manaña imatawanpas ruwayta atinqakuchu. 10 Qanmi ichaqa tukuy yuyaywan qatikurqanki imachus yachachisqayta, imaynachus kausasqayman,+ imachus ruway munasqayman, imayna iñiqchus kasqayman, pacienciakuq kasqayman, munakuq kasqayman, aguantaq kasqaymanpas. 11 Chaymantapas, yachasqayki jina, Antioquía llaqtapi,+ Iconio llaqtapi,+ Listra llaqtapi+ iman noqaqa qatikachasqa ñak’arichisqa ima karqani, Señortaqmi librawarqan lliu chaykunamantaqa.+ 12 Pipas Cristo Jesuswan jujllachasqa kaspa Diosta serviqqa* qatikachasqallataqmi kanqa.+ 13 Sinchi millay runakunapas engañaq runakunapas aswan-aswan mana allinmanmi tukupunqaku, engañaspanku engañachikuspanku ima.+

14 Qan ichaqa qaqata sayay imatachus allinta yachachirqasunkiku, iñinaykipaqpas yanaparqasunkiku chaypi;+ chaymantapas, qanqa allintamá riki yachashanki pikunachus yachachirqasunki chaytaqa. 15 Chaymantapas nacesqaykimantapachan*+ ch’uya qelqakunamantaqa yacharqanki+ ¿riki? Chaykunan yanapasunki yachayniyoq kanaykipaq, chhaynapi Cristo Jesuspi iñispa salvasqa kanaykipaq.+ 16 Diospa simin qelqapi qelqasqa kaqqa llapanmi Diospa yuyaychasqan,+ chaymi chaykunaqa allinpuni yachachinapaq,+ anyanapaq, imatapas allinyachinapaq, imachus allin kaqwan yachachinapaqpas;*+ 17 chhaynapi Diosta serviq runaqa allin preparasqa kananpaq, arí, tukuy allin ruwaykunapaq allin-allin preparasqa kananpaq.