1 Samuel
1 Efraín+ orqo-orqopi kaq Ramatain-Zofin+ llaqtapin tiyarqan Elcaná+ sutiyoq runa. Payqa Jerohanpa churinmi karqan, Jerohantaq Elihupa churin karqan, Elihutaq Touq churin karqan, Toutaq Zufpa churin karqan. 2 Elcanaqa iskay esposayoqmi karqan, jujninpa sutinmi karqan Ana, jujninpataq Peniná. Peninaqa askha wawakunayoqmi karqan, Anan ichaqa mana wawayoq karqan. 3 Sapa watanmi Elcanaqa Siló llaqtata riq, ejercitokunata kamachiq Jehová Diosta* adoraq, sacrificiokunata jaywaq ima.+ Chaypin Elipa wawan Ofnipas Finehaspas+ Jehová Diosta servisharqanku, paykunaqa sacerdotekunan karqanku.+
4 Juj kutinmi Elcanaqa sacrificio jaywasqanta rakirqan esposan Peninaman, llapa churinkunaman ususinkunamanwan,+ 5 Anamanmi ichaqa munakusqanrayku aswan allinnin kaq partenta qoykurqan. Ichaqa manan Jehová Diosqa payman wawakunata qorqanchu. 6 Juj kaq warmin Peninaqa Anamantan sapa kutin nishuta burlakuq Jehová Dios wawata mana qosqanrayku, chaywanmi sinchita sufrichiq. 7 Chhaynatapunin Peninaqa sapa watan ruwaq. Jehová Diospa wasinta+ sapa kuti riqtinkun Anamanta nishuta burlakuq, chaymi Anaqa waqaylla waqakuq manataq mijuqpaschu. 8 Jinan Elcanaqa Anata nirqan: “Ana, ¿imamantan waqanki? ¿Imaraykun mana mijunkichu? Amaña khaynaniraqta llakikuychu. ¿Manachu noqa chunka wawamantapas aswan allin kani?”, nispa.
9 Siló llaqtapi kashaspa mijusqanku ujasqanku qhepamanmi Anaqa jatarispa ripurqan. Chay ratun sacerdote Eliqa Jehová Diospa wasinman*+ jaykuna punkupi juj tiyanapi tiyasharqan. 10 Chaypin Anaqa sinchi llakisqa Jehová Diosmanta waqaspa mañakuyta qallarirqan,+ sonqonqa manapunin tiyaykuyta atirqanchu. 11 Jinaspa prometerqan: “Ejercitokunata kamachiq Jehová Diosníy, kay warmi kamachiykimanta yuyarikuy. ¡Qhawariy Diosnilláy! Sinchitan sufrishani, amayá qonqawaychu. Sichus juj qhari wawata qoykuwanki+ chayqa, qanllamantaqmi Jehová Diosníy qopusayki, qanta servinasuykipaq. Manan chujchanpas rutusqachu kanqa”,+ nispa.
12 Unayñan Anaqa chaypi Jehová Diosmanta mañakusharqan, sacerdote Elitaq Anaq simin kuyusqanta qhawasharqan. 13 Anaqa sonqollanpin mañakusharqan, simillanmi kuyusharqan, manan rimasqanqa uyarikurqanchu, chaymi Eliqa piensarqan machasqa kananpaq. 14 Chayraykun Anata nirqan: “¿Imatan kaypi machasqa ruwashanki? Amaña vinota tomaychu”, nispa. 15 Anataq nirqan: “Wiraqocháy, manan machasqachu kashani, manan vinotapas ni imatapas tomamunichu. Noqaqa sinchi llakisqan kashani, chaymi sonqo nanayniyta Jehová Diosman willakushani.+ 16 Ama mana valeq warmita jinaqa qhawariwaychu. Llakisqa kaspa, sonqo nanasqa kaspan noqaqa chhayna kashani”, nispa. 17 Jinan Eliqa nirqan: “Ama llakikuspalla ripuy, Israelpa Diosnin imachus mañakusqaykiman jina ruwachun”,+ nispa. 18 Anataq nirqan: “Gracias sumaqta qhawariwasqaykimanta”, nispa. Chay qhepamantaq Anaqa ripuspa mijurqan, manañataq llakisqachu karqan.
19 Qhepantin p’unchaytaq tutallamanta jatarispanku Jehová Diosman k’umuykuspanku Ramá+ llaqtapi wasinkuman ripurqanku. Chaymantataq Elcanaqa esposan Anawan puñurqan, Jehová Diostaq Anamanta yuyarikurqan.+ 20 Jinan Anaqa onqoq rijurirqan, jinaspa manaraq watapi* juj qhari wawata onqokurqan, jinan payqa nirqan: “Jehová Diosmantan mañakurqani”, nispa. Chayraykun chay wawata Samuel* nispa suticharqan.+
21 Chaymantataq Elcanaqa wasinpi kaqkunapiwan rirqan Jehová Diosman prometesqan ofrendata, sapa wata qonan sacrificiotawan jaywaq.+ 22 Anan ichaqa qosanta nirqan: “Manaraqmi riymanchu.+ Wawata p’itispayña* Jehová Diosman apasaq chaypi saqempunaypaq”,+ nispa. 23 Elcanataq nirqan: “Allinmi yuyaykusqaykiqa, chhaynaqa qhepakullay, wawata p’itispaña rinki. Jehová Dios mañakusqaykiman jina ruwachun”, nispa. Jinan Anaqa wasillanpi qhepakurqan wawanta ñuñumanta p’itinankama.
24 P’itiruspataq Anaqa wawanta aparikuspa Siló llaqtata rirqan. Apallarqantaqmi arroba* jak’uta, juj jatun p’uyñu vinota,+ kinsa watayoq torotawan. Siló+ llaqtaman chayaspataq wawanta pusarikuspa Jehová Diospa wasinta rirqan. 25 Chaymantataq torota ñak’arqanku, wawatataq sacerdote Eliman aparqanku. 26 Anataq Elita nirqan: “Disculpaykuway wiraqocháy, noqan ñaupaykipi Jehová Diosmanta mañakuq warmi kashani.+ 27 Jehová Diosmantan kay wawata mañakurqani, paypa qowasqanmi kay wawaqa kashan.+ 28 Chayraykun kayman pusamushani Jehová Diosman entreganaypaq,* payqa wañunan p’unchaykaman Jehová Diosta servinqa”, nispa.
Paytaq* Jehová Diospa ñaupanpi k’umuykurqan.