Juan
3 Juj runan karqan Nicodemo+ sutiyoq, payqa fariseokunamanta jujninmi karqan, judiokunaq jujnin umallintaq karqanpas. 2 Paymi tutallapi+ Jesusman jamuspa nirqan: “Yachachikuq,*+ yachaykun qanqa Diospa kachamusqan yachachiq kasqaykita; ruwasqayki señalkunataqa manan pipas ruwayta atinmanchu+ manachus Dios paywan kashanman chayqa”,+ nispa. 3 Jinan Jesusqa nirqan: “Cheqaqtapunin niyki: Pipas Diospa gobiernonta rikunanpaqqa+ wajmantan nacenan”,*+ nispa. 4 Nicodemotaq nirqan: “¿Imaynapitaq runari machuña kashaspa wajmanta nacenman? ¿Atinmanchu mamanpa wijsanman kutiykuyta, chhaynapi wajmanta nacenanpaq?”, nispa. 5 Jesustaq nirqan: “Cheqaqtapunin niyki: Pipas Diospa gobiernonman jaykunanpaqqa unumanta+ espiritumantawanmi nacenan.+ 6 Runamanta naceqqa runallataqmi, espiritumanta naceqpas espiritullataqmi. 7 Ama admirakuychu, qankunaqa wajmantan nacenaykichis nisqaywanqa. 8 Wayraqa maychus munasqanmantan wayramun ¿riki?, suenasqallanmi uyarikun, ichaqa manan yachakunchu maymantachus jamun chayta ni maymanchus rin chaytapas. Chhaynallataqmi pasan espiritumanta llapa naceqkunawanpas”,+ nispa.
9 Jinan Nicodemoqa nirqan: “¿Imaynataq chaykunari kanman?”, nispa. 10 Chaymi Jesusqa nirqan: “¿Israelpi yachachiq kashaspachu chaykunata mana yachanki? 11 Cheqaqtapunin niyki: Noqaykuqa imachus yachasqaykutan rimayku, imachus rikusqaykumantan willaykupas, qankunan ichaqa willasqaykuta mana creenkichischu. 12 Kay pachapi kaqkunamanta willasqaytataq mana creewankichischu chayqa, ¿imaynapitaq creewankichisman janaq pachapi kaqkunamanta willaqtiyri? 13 Jinaspapas manan pipas janaq pachamanqa wicharqanchu,+ aswanpas janaq pachamanta uraykamuq runaq Churillanmi.+ 14 Imaynan Moisespas ch’inneqpi kashaspa mach’aqwayta warkurqan,+ chhaynallataqmi runaq Churinpas warkusqa kanqa,+ 15 chhaynapi pipas paypi creeqqa wiñay kausayniyoq kananpaq.+
16 ”Diosqa anchatapunin runakunata munakurqan, chaymi sapallan Churinta kachamurqan,+ pipas paypi iñisqanta rikuchiqqa ama wañunanpaq aswanpas wiñay kausayniyoq kananpaq.+ 17 Diosqa Churinta kay pachaman kachamurqan manan runakunata juchachananpaqchu, aswanpas kay pacha runakuna paywan salvasqa kanankupaqmi.+ 18 Pipas paypi iñiqqa manan juchachasqachu kanqa,+ mana iñiqmi ichaqa ña juchachasqaña kapun, Diospa sapallan Churinpa sutinpi mana iñisqanrayku.+ 19 K’anchaymi kay pachaman jamurqan,+ runakunan ichaqa ima ruwasqankupas mana allin kasqanrayku k’anchayta munakunankumantaqa tutayaqta munakunku, chayraykun paykunaqa juchachasqa kanku. 20 Pipas mana allin kaqkunata ruwaqqa cheqnikunmi k’anchayta, manataqmi k’anchaymanpas jamunchu, chhaynapi mana allin ruwasqankuna mana sut’iman orqosqa kananpaq. 21 Allin kaqkunata ruwaqmi ichaqa k’anchayman jamun,+ chhaynapi ima ruwasqankunapas Diospa munayninman jina kasqanta sut’ita reparakunanpaq”, nispa.
22 Chay qhepamanmi Jesusqa discipulonkunapiwan Judeapi jawa llaqtakunaman rirqan, chaypin payqa qatikuqninkunawan juj tiempo karqan, runakunatapas bautizarqanmi.*+ 23 Juanpas bautizasharqanmi Salin qaylla Enón llaqtapi, chaypiqa askhan unu karqan,+ runakunapas jamushallarqankun bautizachikuq.+ 24 Chay tiempopaqqa manaraqmi Juanqa carcelman wisq’asqachu karqan.+
25 Chaymantataq Juanpa discipulonkunaqa juj judío runawan ch’uyanchakuymanta discutirqanku. 26 Jinan paykunaqa Juanman jamuspa nirqanku: “Yachachikuq,* Jordán mayu chimpapi qanwan kasharqan paymantapas willasharqanki,+ chay runan kunanqa bautizashan, llapa runakunataqmi payman rishanku”, nispa. 27 Jinan Juanqa nirqan: “Runaqa manan imayoqpaschu kanman manachus janaq pachamanta chaskinman chayqa. 28 Qankuna kikiykichismá riki uyarirqankichis: Manan noqaqa Cristochu kani,+ aswanpas paypa ñaupanta kachamusqallan kani,+ nispa nisqaytaqa. 29 Noviaq dueñonqa novion.+ Chaywanpas novioq amigonqa ladonpi sayaykuspan payta uyarin, jinaspa anchatapuni kusikun casarakuq amigonpa kunkanta uyarispa. Chayraykun noqapas anchatapuni kusikuni. 30 Payqa yapakushallanqan, noqataq ichaqa pisiyapushallasaq”, nispa.
31 Wichaymanta jamuqqa lliumantapas aswan kuraqmi.+ Kay pachamanta kaqqa kay pachallamantan, kay pacha kaqkunallamantataqmi rimanpas. Janaq pachamanta jamuqqa lliumantapas aswan kuraqmi.+ 32 Payqa imachus rikusqanta imachus uyarisqantawanmi willan,+ ichaqa manan pipas chay willasqanta uyarinchu.+ 33 Willasqanta chaskikuqqa sut’itan yachan Diosqa cheqaq rimaq kasqanta.+ 34 Diospa kachamusqanqa Diospa rimasqantan riman,+ espiritunta mana mich’akuspa payman qosqanrayku. 35 Janaq pacha Taytaqa munakunmi Churita,+ chaymi tukuy imatapas payman jap’ichin.+ 36 Pipas Churipi iñiqqa wiñay kausayniyoqmi kanqa,+ pipas Churita mana kasukuqtaq ichaqa mana kausayta rikunqachu,+ aswanmi Diospa phiñakuynin payllapi kashanqa.+