Isaías
14 Jehová Diosmi Jacobta khuyapayanqa,+ paymi jujmanta Israelta ajllakunqa.+ Diosmi paykunataqa jallp’ankupi tiyachipunqa,*+ waj llaqtayoq runakunapas Jacobpa mirayninmanmi juñukamunqaku.+ 2 Israel runakunataqa waj llaqtakunamanta runakunan llaqtankuman jujmanta kutichimpunqaku. Jehová Diospa qosqan jallp’apin chay runakunaqa Israel runakunaq qhari kamachinku warmi kamachinku kapunqaku.+ Chhaynapin Israel runakunaqa preso jap’iqninkunata presoman tukuchinqaku, capataz jina llank’achiqninkutapas paykunan kamachinqaku.
3 Juj p’unchaymi Jehová Diosqa samachisunki nanayniykimanta, llakikuyniykimanta, esclavo jina llank’asqaykimanta,+ 4 chay p’unchaymi Babilonia reyta asipayaspa ninki:
“¡Qhawariychis! Jujkunata nishuta llank’achiqqa manan kanñachu.
¡Qhawariychis! Sinchi ñak’ariypas tukupunñan.+
5 Jehová Diosmi millay runakunaq varanta p’akipun,
paymi kamachikuqkunaq varanta p’akipun,+
6 llaqtakunaman phawaykuspa sinchita waqtaqpa varantan p’akipun,+
nacionkunata qatikachaspa k’umuchiqtan tukuchipun.+
7 Kunanqa kay pachaqa thajmi kashan,
runakunapas kusikuymantan qaparishanku.+
8 Enebro sach’akunapas chhaynapi tarikusqaykimantan kusikunku,
Libanopi kaq sach’akunapas kusisqan kashanku,
paykunan ninku: Urmasqaykimantapachan,
thunisqa kasqaykimantapachan mana pipas wit’uwankuñachu, nispa.
9 Sepulturapas* listoñan kashan,
chaskinasuykipaqmi alistakushan.
Qanraykun wañusqakunatapas rijch’arichin,
jallp’api millay kamachikuqkunatan jatarichin.
Nacionkunapi llapa reykunatan trononkumanta jatarichin.
10 Llapankun rimayta qallarispa ninku:
¿Qanpas noqayku jinachu pisi kallpayapunki?
¿Noqayku jinachu kapunki?
11 Jatunchakuq kayniykiqa Sepultura* ukhupin kashan,
cuerdayoq tocanaykikunapas qanwan kuskan kashan.+
Qanqa kurukuna patapin puñushanki,
qatanaykipas kurukunan kapun, nispa.
12 ¡K’ancharishaq ch’aska, cielomantan urmaykampunki!
¡Illarimuy ch’aska, imaynapin khaynapi tarikunki!
¡Qanqa nacionkunatamá riki atipaq karqanki!+
Kunantaq wit’usqa, pampapi wijch’usqa kashanki.
13 Qanmi sonqoykipi nirqanki: Janaq pachamanraqmi chayasaq,+
Diospa ch’askankunamantapas aswan altopiraqmi tronoyqa kanqa,+
wichay ladopi kaq karu orqokunapin tiyaykusaq,
Dios yupaychana orqo patapin tiyasaq,+
14 phuyu patakunamanraqmi wichasaq,
ancha jatun Dios jinan kasaq, nispa.
15 Ichaqa Sepulturamanmi* wijch’uykusqa kanki,
t’oqopi aswan ukhumanraqmi wijch’uykusqa kanki.
16 Qanta rikuqkunaqa allintan qhawaykusunkiku,
chaki puntaykimanta uma puntaykikamaraq qhawaykuspan nisunkiku:
¿Manachu kay runaqa jallp’ata khatatatachiq* kashan?
¿Manachu nacionkunapi runakunata manchachiq kashan?+
17 ¿Manachu payqa jallp’akunata purunyachirqan?
Paymá riki llaqtakunatapas jap’ikapuq,+
payqa manamá riki preso jap’isqan runakunatapas kachariqchu,+ nispa.
18 Nacionkunapi reykunaqa samashankun,
paykunataqa sumaqtan p’ampapurqanku,
maypichus samanankupin samashanku.
19 Qantan ichaqa mana p’ampasqata wijch’usunkiku,
cheqnisqa ch’ijchita jinan saqerparisunkiku,
espadawan wañuq runakuna ukhupin kumparayanki,
rumi-rumi t’oqopin wijch’urayanki,
lliu sarusqa aya jinan wijch’urayanki.
20 Qanqa manan reykunawan kuskachu p’ampasqa kanki;
qanqa jallp’aykitan thunirqanki,
llaqtayki runakunatan wañuchirqanki.
Millay runaq mirayninmantaqa manañan jayk’aqpas rimakunqachu.
21 Juj cheqasta alistaspa wawankunata wañuchiychis,
ñaupa taytankunaq juchanmanta paykunata wañuchiychis,
chhaynapi ama jallp’ata jap’ikapunankupaq,
ama llaqtakunatapas jatarichinankupaq”, nispa.
22 “Noqan paykuna contra sayarisaq”+ ninmi ejercitokunata kamachiq Jehová Dios.
“Babilonia sutitan chinkachisaq, chaypi qhepaqkunatan, llapa mirayninkunatan chinkachisaq”+ ninmi Jehová Dios.
23 “Noqan erizo animalta kamachisaq chay llaqtaman junt’aykunanpaq, lliutan qocha-qochaman tukuchisaq, pichasqata jinan ch’usaqyachisaq”+ nillantaqmi ejercitokunata kamachiq Jehová Diosqa.
24 Ejercitokunata kamachiq Jehová Diosmi juran:
“Imachus yuyaykusqayqa ruwakunqapunin,
imachus nisqayqa junt’akunqapunin.
25 Asiria runakunataqa jallp’aypin ñit’isaq,
orqo pataykunapin paykunataqa sarusaq,+
llaqtaymantan paykunaq yugonta wijch’usaq,
llaqtaypa much’unmantan paykunaq q’epinta choqasaq”,+ nispa.
26 Jallp’a pachata imachus pasananqa ñan rimasqaña kashan,
nacionkunata tukuchiq makiqa ñan listoña kashan.
27 Ejercitokunata kamachiq Jehová Diosqa ñan ninña imachus ruwananta,
¿pin payta jark’anman?+
Makintapas ñan jaywarinña,
¿pin payta qhepaman kutichinman?+
28 Rey Ajazpa wañupusqan watapin+ kay willakuy karqan:
29 “Filistea runakuna, ama kusikuychischu,
p’anaqniykiq taunallanmi p’akisqa kashan.
30 Mana piniyoqkunaq phiwi* wawankunan allinta mijunqaku,
wajchakunapas thajpin puñunqaku;
qanpa runaykikunatan ichaqa yarqaymanta wañuchisaq,
qankunamanta qhepaqkunatapas lliutan chinkachisaq.+
31 ¡Punku k’uchupi waqaychis, llaqta ukhupi qapariychis!
¡Filistea, qanqa may llakipin tarikunki!
Wichay ladomantan soldadokuna q’osñi jinaraq jamushanku,
paykunaqa llapallankun kuskalla jamushanku”, nispa.
32 ¿Imanispan kutichikunqa nacionkunaq willaqninkunaman?
“Jehová Diosmi Sion llaqtata allinta tajyachin,+
chaypin ñak’ariqkunaqa allin pakaykusqa kanqaku” nispan nikunqa.