Romanos
5 Iñisqanchisraykutaq chaninpaq jap’isqa kanchis chayqa,+ Señorninchis Jesucristorayku Dioswan sumaqta kausasun.+ 2 Paypi iñisqanchisraykun juj ñan kicharikun ancha sumaq sonqo kayninta Dios rikuchiwananchispaq, chaytan kunanqa chaskishanchis;+ noqanchisqa Dios jatunchawananchistan suyakushanchis, chaymi kusisqa kashananchis.* 3 Sasachakuykunapi tarikushaspapas kusikunallanchistaqmi;+ yachasqanchis jina, sasachakuykunaqa aguantaq kanapaqmi yanapawasun,+ 4 aguantaytaq Diospa sumaq qhawarisqan kanapaq,+ Diospa sumaq qhawarisqan kaytaq suyakuyta qowasun,+ 5 chay suyakuyqa manataqmi yanqachu;+ Diosqa qowasqanchis santo espirituwanmi munakuyninta rikuchiwanchis.+
6 Juchasaparaq kashaqtinchismi+ Cristoqa Diosta mana manchakuqkunarayku señalasqa tiempopi wañurqan. 7 Juj runa chaninña kanman chaypas, ñak’aytan pipas payraykuqa wañunman, juj allin runaraykuqa ichapaschá pipas wañunman. 8 Criston ichaqa juchasaparaq kashaqtinchis noqanchisrayku wañurqan,+ chaywanmi Diosqa munakuyninta rikuchiwarqanchis. 9 Chhaynaqa Cristoq yawarninraykun chaninpaq jap’isqa kanchis,+ chay yawarmi salvawasun Diospa k’araq phiñakuyninmantapas.+ 10 Diospa enemigon kashaqtinchistaq Churinpa wañusqanrayku paywan allipunakapurqanchis chayqa,+ astawanraqmi paywan allipunasqaña kashaspanchisqa paypa kausasqanrayku salvasqa kasun. 11 Chaymantapas noqanchisqa kusisqan kashananchis Señorninchis Jesucristorayku Dioswan allinpi kasqanchismanta, paymi Diostawan noqanchistawanqa allipunachiwanchis.+
12 Chhaynaqa, juj runallawanmi juchaqa kay pachapi rijurirqan, wañuytaq jucharayku rijurirqan;+ chhaynapin wañuyqa llapa runaman chayarqan llapallanku juchallikusqankurayku.+ 13 Manaraq kamachikuy simi kashaqtinmi juchaqa kasharqanña kay pachapi, ichaqa manan pitapas juchachakunmanchu kamachikuy simi mana kaqtinqa.+ 14 Chaywanpas wañuyqa Adanpa tiemponmantapachan Moisespa tiemponkama rey jina llapa runata kamachisharqan, manaña Adán jinachu paykuna juchallikurqanku chaypas. Adanqa pichus jamunan karqan chay jinan karqan.+
15 Diospa qokuyninmi ichaqa mana imaynachus jucha jawa karqan chhaynachu. Juj runallaq juchallikusqanraykun askha wañushanku, chhaynallataqmi juj runallaq+ ancha sumaq sonqo kayninrayku askha runakuna Diospa ancha sumaq sonqo kayninta gratislla qokuynintawan chaskishanku, chay runaqa Jesucriston.+ 16 Manallataqmi Diospa gratislla qokuyninqa imaynan juj runaq juchallikusqan jawa+ karqan chhaynachu. Juj runallaq juchallikusqan jawan llapa runakuna juchachasqa karqanku,+ ichaqa askha jucharayku Diospa qokuyninwanmi askha runakuna chaninpaq jap’isqa kanku.+ 17 Juj runaq juchanraykullan wañuyqa rey jina kamachikurqan.+ Diospa ancha sumaq sonqo kaynin, chanin runa kananchispaq gratislla qokuynin iman ichaqa aswan jatunraq aswan allinraq.+ Chaykunata chaskiqkunaqa Jesucristoraykun kausanqaku,+ rey jinataq kamachikamunqakupas.+
18 Chhaynaqa, juj jucharaykullataq imaymana clase runakuna juchachasqa karqanku chayqa,+ juj chanin ruwayraykullataqmi imaymana clase runakuna chaninpaq jap’isqa kanqaku,+ chhaynapi kausayta chaskinankupaq.+ 19 Imaynan juj runallaq mana kasukusqanrayku askha runakuna juchasapa kapurqanku,+ chhaynallataqmi juj runallaq kasukusqanrayku askha runakuna chaninpaq jap’isqa kapunqaku.+ 20 Kamachikuy simiqa rijurimurqan runakuna sinchi juchasapa kasqankuta reparachinanpaqmi,+ ichaqa maypichus sinchi jucha kasqanpin Diospas astawanraq ancha sumaq sonqo kayninta rikuchin. 21 ¿Imaraykun chayta ruwan? Chaytaqa ruwan, imaynan juchawan wañuywan rey jina kamachirqanku+ chhaynata Diospa ancha sumaq sonqo kayninpas rey jina chanin kaywan kamachinanpaqmi, chhaynapi Señorninchis Jesucristorayku runakuna wiñay kausayta chaskinankupaq.+