1 Pedro
5 Kunanqa qankuna ukhupi umalliqkunatañataq* rimapayasaq. Umalliqmasiykichis jina, Cristoq ñak’arisqanta rikuq jina, qhepaman rikukunqa chay jatunchasqa kayman+ jaykuqmasiykichis jinan noqaqa qankunata valekuykichis: 2 Qankunaman encargasqa kaq Diospa ovejankunata allinta michiychis,+ paykunata qhawarinaykichispaqmi qankunaqa churasqa karqankichis, ichaqa aman kamachisqa jinachu chaytaqa ruwankichis, aswanpas Diospaq jinan ganaswan michinkichis,+ chaymantapas aman imatapas ganayta munaspachu ruwankichis,+ aswanpas tukuy sonqowan llank’aspan michinkichis. 3 Amallataqmi dueñochakuspachu michinkichisqa, aswanpas allin ejemplon paykunapaqqa kankichis,+ paykunaqa qankunaman encargasqa Diospa ovejankunan kanku.+ 4 Chhaynapin uma kaq michiq+ rijurimuqtin ancha qhapaq, mana ch’akiq coronata chaskinkichis.+
5 Kaqllataq qankunapas waynakuna, k’umuykukuywan kasukuychis kuraq qharikunata.+ Ichaqa llapaykichispas k’umuykukuq kaywan p’achakuychis, chhaynapi k’umuykukuywan qhawarinakunaykichispaq. Diosqa uma oqariqkunaq contranpin kashan, k’umuykukuq kaqkunamanmi ichaqa ancha sumaq sonqo kayninta rikuchin.+
6 Chayrayku k’umuykukuychis ancha atiyniyoq Diosman,* chhaynapi tiempollanpi jatunchanasuykichispaq.+ 7 Chaymantapas tukuy llakipakuyniykichista payman saqeychis,+ payqa qankunamantan llakikun.+ 8 Allin yuyaywanpuni imatapas ruwaychis, allintapuni cuidakuychis.+ Enemigoykichis Saqraqa qaparishaq león jinaraqmi muyupayashasunkichis pillatapas millp’uruyta munaspa.+ 9 Ichaqa allin iñiywan pay contra qaqata sayaychis;+ yachasqaykichis jina, lliu kay pachantinpi iñiqmasikunapas qankuna jinan ñak’arishanku.+ 10 Ichaqa juj tiempolla ñak’arisqaykichis qhepamanmi, Cristowan jujllachasqa kasqaykichisrayku wiñaypaq kaq lliflli kayninman wajasuqniykichis+ ancha sumaq sonqo kayta qoq Diosqa pay kikin entrenayta tukusunkichis. Paymi qaqata sayachisunkichis,+ paymi kallpasapaman tukuchisunkichis,+ payllataqmi allintapas tajyachisunkichis. 11 Paypaq kachun wiñay-wiñaypaq atiyqa. Amén.
12 Junt’aq sonqo iñiqmasinchis Silvanoq*+ yanapayninwanmi kay pisi simikunata qelqamushaykichis, chhaynapi qankunata kallpacharinaypaq, ancha sumaq sonqo kayninta qankunaman Diospa rikuchisqanqa cheqaq kasqanta sut’ita rikuchinaypaqwan. Amapunin kuyurinkichischu chaymantaqa. 13 Kay Babilonia llaqtapi qankuna jina ajllasqa señoran* napaykuyta apachimushasunkichis, napaykamullasunkichistaqmi waway Marcospas.+ 14 Munakuy much’awan napaykunakuychis.
Qankuna Cristowan jujllachasqa kaqkunapi thaj kay kachun.