Jonás

4 Diospa perdonasqanta rikuspan Jonasqa sinchitapuni phiñakurqan. 2 Jinan Jonasqa Jehová Diosmanta mañakurqan: “Jehová Diosníy, noqaqa yacharqanipunin chay pasananta, chayraykun Tarsis ladomanpas ayqekurqani.+ Noqaqa yachanin sumaq sonqo, khuyapayakuq kasqaykita; pacienciakuq,* mana tukukuq may jatun munakuyniyoq kasqaykitapas.+ Yachanin juchasapa runakunata khuyapayaq kasqaykitapas. 3 Chayrayku Jehová Diosníy, wañuchipuwallayña, imapaqñan kausayman”,+ nispa.

4 Jinan Jehová Diosqa Jonasta tapurqan: “¿Razonwanchu chhaynaniraqta phiñakushanki?”, nispa.

5 Jonastaq llaqtamanta lloqsispa inti lloqsimuy ladoman rirqan, jinaspa chaypi tiyaykurqan. Chaypitaq llanthukunanpaq ch’ujllakurqan, chaymantan qhawarqan llaqtawan imachus pasananta.+ 6 Jehová Diostaq calabaza plantata wiñachirqan Jonasta llanthuykunanpaq, chhaynapi amaña sufrinanpaq. Chayta rikuspan Jonasqa anchata kusikurqan.

7 Qhepa p’unchaytataq illarimuyta jina Diosqa juj kuruta kachamurqan chay plantata k’utunanpaq, chhaynapin chay plantaqa ch’akipurqan. 8 Inti lloqsimuqtinmi Diosqa q’oñi wayrata wayrachimurqan inti lloqsimuy ladomanta. Ruphaytaq Jonaspa umanta chayasharqan, yaqañan yuyayninpas chinkasharqan. Chaymi payqa astawanraq wañuyta mañakurqan: “Wañupullasaqña, imapaqñan kausayman”,+ nispa.

9 Diostaq Jonasta tapurqan: “¿Allinchu calabaza plantaq ch’akipusqanmanta chhaynaniraqta phiñakusqayki?”,+ nispa.

Jinan Jonasqa nirqan: “¡Arí, razonwanmi sinchi phiñasqa kashani, wañuytaraqmi munashanipas!”, nispa. 10 Chayta uyarispan Jehová Diosqa nirqan: “¿Chay calabazamantachu llakikushanki? Chay calabazaqa juj tutallapin wiñarqan juj tutallapitaqmi ch’akipurqanpas. Chaytaqa manan qanchu plantarqanki, manan qanchu wiñachirqankipas. 11 Chhaynaqa, ¿manachu noqapas jatun Nínive llaqtamanta+ llakikuyman? Chaypin kashan 120.000 más runakuna, paykunaqa manan reparankuchu allin kaqta mana allin kaqtapas. Kashallantaqmi askha animalkunapas”,+ nispa.