Jueces

8 Efraín ayllu runakunan sinchi phiñasqa Gedeonta nirqanku: “¿Imaraykun qanlla mana willarikuspa Madián runakunawan maqanakuq rirqanki?”,+ nispa. Chaypin sinchita k’amirqanku.+ 2 Gedeontaq paykunata nirqan: “¿Manachu Efrainpa+ pallapasqan* uvas aswan allin kashan Abí-Ezerpa+ cosechasqan uvasmantaqa? Qankunaq ruwasqaykichismi aswan allinqa kashan noqaq ruwasqaymantaqa. 3 ¿Manachu qankunaman Diosqa entregarqasunkichis Madián runakunaq umallin Oreftapas Zeftapas?+ Chay ruwasqaykichiswan comparaspaqa manan imapaschu noqaq ruwasqayqa”, nispa. Gedeón chayta niqtinmi Efraín runakunaq phiñakuyninqa thasnupurqan.

4 Chaymantataq Gedeonqa Jordán mayuman chayaspa kinsa pachaj runakunantin chay mayuta chimparqan. Paykunaqa sinchi sayk’usqan kasharqanku, chaywanpas enemigonkutaqa qatipashallarqankun. 5 Sucoj llaqtaman chayaspan Gedeonqa chaypi tiyaq runakunata nirqan: “Ama jinachu kaychis, kay runaykunaman t’antaykichista qoyapuwaychis, sayk’usqan kashanku. Madián runakunaq reynin Zebata Zalmunatawanmi qatipashayku”, nispa. 6 Sucoj llaqtapi umallikunataq nirqanku: “¿Ñachu jap’iramunkichisña Zebata Zalmunatapas, t’antata soldadoykikunaman qonaykupaq?”, nispa. 7 Jinan Gedeonqa nirqan: “Chhaynatataq ninkichis chayqa, suyarillawaychis, Jehová Dios Zebata Zalmunatawan entregawaqtinmi kiskakunawan ch’inneqpi wiñaq kisakunawan ima waqtaspa aychaykichistaraq llik’isaq”,+ nispa. 8 Penuel llaqtaman chayaspan Gedeonqa chaypi tiyaq runakunata valekullarqantaq t’antata qonankupaq. Chay runakunapas Sucoj llaqta runakuna jinan nillarqankutaq. 9 Chaymi Gedeonqa Penuel llaqta runakunatapas nillarqantaq: “Chay reykunata atipaspa kutimuspaymi kay torreykichista kunan thunirapusaq”,+ nispa.

10 Iskaynin reykuna, Zebawan Zalmunapiwanqa Carcorpin kasharqanku yaqa chunka pisqayoq waranqa soldadokunantin. Chay soldadokunaqa puchuqkunallañan karqanku,+ pachaj iskay chunka waranqa soldadokunañan wañuchisqa karqanku. 11 Gedeonqa karpakunapi tiyaq runakunaq purinan ñannintan wicharqan, chayqa Nóba llaqtaq Jogbeá llaqtaq+ inti lloqsimuy ladonpin kasharqan. Jinan Gedeonqa enemigonkuq karpakusqanman qonqaylla phawaykurqan. 12 Madián runakunaq iskay reynin Zebawan Zalmunawantaq ayqekurqanku, Gedeontaq paykunaq qhepanta phawaspa jap’imurqan, chay reykunaq soldadonkunatapas khatatatachirqankuraqmi.*

13 Guerrata atipaspan Joaspa churin Gedeonqa Jeresman riq ñanninta kutimpurqan. 14 Jinaspan jamushasqan ñanpi Sucoj llaqtayoq waynata jap’irqan. Paytan tapurqan pikunachus Sucoj llaqtapi umalliqkuna* autoridadkuna kasharqanku chayta. Jinan payqa qelqapi churapurqan qanchis chunka qanchisniyoq umalliqkunaq autoridadkunaq sutinta. 15 Chaymantataq Gedeonqa Sucoj runakunaman rirqan, paykunatan nirqan: “Kayqa Zebapas Zalmunapas, paykunamanta rimaspan burlakuspa niwarqankichis: ¿Ñachu jap’iramunkichisña sayk’usqa soldadoykikunaman t’antata qonaykupaq?, nispa ¿riki?”,+ nispa. 16 Jinan Sucoj llaqtapi umalliqkunata kiskakunawan ch’inneqpi wiñaq kisakunawan ima waqtaykurqan, chhaynapi wananankupaq.+ 17 Penuel llaqta+ qharikunatapas wañuchirqanmi, torrenkutapas thunipurqanmi.

18 Chaymantataq Gedeonqa Zebata Zalmunatawan tapurqan: “¿Imayna runakunan karqanku Tabor orqopi wañuchisqaykichis runakuna?”, nispa. Paykunataq nirqanku: “Qan jinan kasqaku, reypa churinkuna jina”, nispa. 19 Jinan Gedeonqa nirqan: “Paykunaqa wayqeykunan karqan, mamaypa wawankuna. Wiñaypaq kausaq Jehová Diospa sutinpin jurani, manachus paykunata wañuchiwaqchis karqan chayqa manan qankunatapas wañuchiykichismanchu karqan”, nispa. 20 Chaymantataq Gedeonqa phiwi* churin Jeterta nirqan: “¡Sayariy! Kay runakunata wañuchiy”, nispa. Jetermi ichaqa waynallaraq kasqanrayku manchakuymanta mana espadallantapas orqokurqanchu. 21 Jinan Zebawan Zalmunapiwanqa nirqanku: “Qhari kaspaqa, qanyá wañuchiwayku”, nispa. Chaymi Gedeonqa sayarispa Zebata Zalmunatawan wañuchirqan.+ Chaymantataq chay runakunaq camellonkuq kunkanmanta orqorqan kuskan killaman rijch’akuq adornokunata.

22 Chay qhepamantaq Israel runakunaqa Gedeonta nirqanku: “Qantaq Madián runakunamanta librawankiku+ chayqa qanyá kamachiqniyku kapuy, qan qhepamantaq churiykikunapas nietoykikunapas kamachiqniyku kallachuntaq”, nispa. 23 Gedeonmi ichaqa nirqan: “Manan noqapas ni churiypas qankunaq kamachiqniykichisqa kaykumanchu, Jehová Diosmi qankunataqa kamachisunkichis”,+ nispa. 24 Gedeonqa nillarqantaqmi: “Aswanpas valekusaykichis, senqaman churakuna argollakuna qechumusqaykichismanta sapankaykichis jujta qowaychis”, nispa. (Paykunaqa Ismael runakunamantan+ qori argollakunata qechumurqanku). 25 Jinan paykunaqa nirqanku: “Arí, qosaykikun”, nispa. Chaymantataq juj jatun capata mast’arispanku sapanka runa qechumusqankumanta juj argollata churaykurqanku. 26 Senqapaq qori argollakuna juñusqanqa waranqa qanchis pachaj qori siclotan* pesarqan. Juñullarqantaqmi kuskan killaman rijch’akuq adornokunata, aretekunata, Madián reykunaq churakusqan azulniraq puka p’achakunata, camellokunaman churana collarkunatapas.+

27 Chay juñusqanwanmi Gedeonqa juj jatun sacerdote unkuta* ruwarqan,+ chaytataq Ofrá llaqtanpi+ churarqan llapa runakuna rikunanpaq. Chaytan Israel runakunaqa idolota jina adorayta qallarirqanku.*+ Chaymi Gedeonpaq familianpaqpas trampa jina karqan.+

28 Chhaynapin Israel runakunaqa Madián runakunata+ atiparqanku, manañan jayk’aqpas paykunaqa churapakurqankuñachu. Jinan Israel runakunaqa Gedeonpa tiemponpi tawa chunka watata thajpi kausarqanku.+

29 Joaspa churin Jerubaaltaq*+ wasinman kutipuspa chaypi qhepakurqan.

30 Gedeonqa askha esposayoqmi karqan, jinan qanchis chunka wawakunayoq karqan. 31 Shejen llaqtapi tiyaqmasin warmipas* juj wawatan onqokullarqantaq, paytan Gedeonqa suticharqan Abimélec+ nispa. 32 Chaymantataq Joaspa churin Gedeonqa unayta kausaspa wañukapurqan. Jinaspan taytan Joasta p’ampasqanku sepulturapi p’ampapurqanku, Abí-Ézer runakunaq+ tiyasqan Ofrá llaqtapi.

33 Gedeonpa wañukapusqan qhepallamanmi Israel runakunaqa jujmanta Baal idolokunata adorayta* qallarillarqankutaq.+ Paykunan Baal-Berij nisqa idolota ajllakurqanku diosninku kananpaq.+ 34 Israel runakunaqa qonqapurqankun Jehová Diosninkuta,+ payña muyuriqninkupi llapa enemigonkumanta librarqan chaypas.+ 35 Manallataqmi Jerubaal nisqa Gedeonpa familianmanpas munakuyninkuta* rikuchirqankuchu, payña imaymana allinkunata paykunapaq ruwapurqan chaypas.+