1 Corintios

4 Noqaykuqa munayku Cristoq kamachinkunata jina runakuna rikuwanankutan, jinallataq Diospa pakasqa ch’uya yachayninmanta mayordomokunata jina rikuwanankuta.+ 2 Ichaqa mayordomokunaqa junt’aq sonqon kananku. 3 Noqapaqqa manan imapaschu kanman qankuna juzgawankichisman chayqa, ni pi juezña juzgawanman chaypas. Manan noqa kikiypas juzgakunichu 4 concienciay mana imamantapas juchachawasqanrayku; ichaqa manan chayraykuchu niyman “chaninmi kani” nispaqa, aswanpas Jehová* Diosmi juzgawaqniyqa.+ 5 Chayrayku ama pitapas juzgaychischu+ manaraq tiempopiqa, Señorpa chayamunankama. Paymi laqhayaqpi* kaqkunata k’anchayman orqomunqa, sonqoq imachus munasqankunatapas sut’imanmi orqonqa. Chayman jinan Diosqa pitapas jatunchanqapas manapas.+

6 Wayqeykuna,* chaykuna nisqaymantaqa noqawan Apolospiwanmi+ ejemplo kayku qankunaq allinniykichispaq, chhaynapi “imachus qelqasqa kashan chaykunallatan ruwanki” nisqa kamachikuyta yachanaykichispaq. Chhaynapin mana jatunchakunkichischu+ nitaq pimanpas sayapakunkichischu ni pisichankichispaschu. 7 ¿Imaykiwantaq qanri jujkunamanta jatunpaq qhawarikunki? ¿Manachu tukuy imatapas Dios qorqasunki?+ Paytaq qorqasunki chayqa, ¿imaraykutaq qanri jatunchakunki kallpaykiwanpas tariwaq karqan jinaraq?

8 Qankunaqa “sajsañan kayku” nishankichischá, “qhapaqñan kayku” nishankichischá, “reyñan kayku” nispapaschá mana noqallaykuwan kamachikuytaña qallarishankichis;+ allinchá kanman reyña kaspa kamachikuyta qallarishawaqchis chayqa, chhaynapi noqaykupas qankunawan kuska kamachikunaykupaq.+ 9 Noqaq qhawarisqayman jinaqa, noqayku apostolkunataqa wañuchinapaq juchachasqa runakunata jinatachus jina+ qhepallamanña Diosqa churawanku. Arí, noqaykuqa coliseopi runakunaq qhawakunanmi kapuyku,+ angelkunaq qhawakunan ima. 10 Cristoraykun noqaykutaqa mana yuyayniyoqta jina qhawariwanku,+ qankunataq ichaqa Cristorayku allin yuyayniyoqpaq piensakunkichis; noqaykuqa pisi kallpan kayku, qankunataq ichaqa kallpasapa kankichis; qankunaqa respetasqan kankichis, noqaykutaq ichaqa pisichasqa kayku. 11 Kunankamapas noqaykuqa yarqaymanta,+ ch’akiymantan kashayku;+ mana allin p’achasqa,* maqasqa,+ mana wasiyoq, 12 sinchita llank’aspa iman kashayku.+ Runakuna k’amiwaqtinkupas+ noqaykuqa sumaqtan kutichiyku, qatikachawaqtinkupas pacienciawanmi aguantayku.+ 13 Mana kaqmanta tumpawaqtinkupas sumaqtan kutichiyku,+ noqaykuqa kunankaman kay pachaq q’opan jina, runaq wijch’usqan tukuy imaymana qhelli jina qhawarisqa kashayku.

14 Kaykunataqa qelqamushaykichis manan p’enqachinaypaqchu, aswanpas munakusqay wawaykunata jina yuyaychanaypaqmi. 15 Cristota qatikuypi uywaqniykichiskuna chunka waranqaña kanman chaypas, manan askha taytayoqchu kankichis. Noqan taytaykichis kani qankunaman allin willakuykunata willasqayrayku+ Cristo Jesusta qatikuyta yachachisqayrayku ima. 16 Chayraykun tukuy sonqoywan valekuykichis noqa jina kanaykichispaq.+ 17 Chaypaqmi ancha munasqa waway Timoteota kachamushaykichis, payqa junt’aq sonqowanmi Señorta servishan, paymi yuyarichisunkichis Cristo Jesusta serviypi imaynatachus imatapas ruwani chayta;+ arí, imaynatachus lliupi llapa iñiq t’aqakunaman yachachimushani chaytan yuyarichisunkichis.

18 Wakinqa “manan jamunqachu” nispapaschá jatunchakushanku. 19 Jehová* Dios munaqtinqa jamusaqñan. Chay jatunchakuqkunatan rikuyta munashani, ichaqa manan rimayninkuta yachanaypaqchu, aswanpas paykunapi kanchus manachus Diospa atiynin chayta yachanaypaqmi. 20 Diospa gobiernonqa manan rimaywanchu rikuchikun, aswanpas Diospa atiyninwanmi. 21 ¿Imatataq qankunari munankichis? ¿K’aspiwan jamunaytachu+ icha munakuywan llamp’u sonqowan jamunaytachu?